Atzealdea

Ekonomia Suspertzeko Planak irismena zabaldu eta 3.800 enpresa eta eragile babestu ditu

Foto Ekonomia Suspertzeko Planak irismena zabaldu eta 3.800 enpresa eta eragile babestu ditu

Ekonomia Suspertzeko Planak irismena zabaldu eta 3.800 enpresa eta eragile babestu ditu

Markel Olano diputatu nagusiak egoera ekonomikoaren balorazio positiboa egin eta lanean jarraitzeko deia luzatu du

2017ko balantzea

Ekonomia Suspertzeko Plana 2016-2019 ekuatorera iritsi da eta bere bigarren urtean 3.789 enpresa, zentro eta eragilek martxan jarritako ekintza eta proiektu ekonomikoak sustatu ditu, hainbat alorretan. Gipuzkoako diputatu nagusiak, Markel Olanok, Ekonomia Sustapena, Landa Ingurunea eta Lurralde Orekako diputatu Ainhoa Aizpururekin batera, orain arte egindako bidearen zein 2017an martxan jarritako programen balorazio positiboa egin du. 

Diputatu nagusiak baloratu egin ditu aurten abiarazitako lerroak, “emaitza onak” eman baitituzte. Argitara emandako deialdi eta programa berriek “erantzun ona” eman dute eskari kopuruaren eta aurkeztutako proiektuen kalitateari dagokionez. “Esku artean dauzkagun datuen arabera, pareko ahalegin batekin, enpresa gehiagora iritsi gara, pertsona gehiagora”, azpimarratu du Olanok. 

Gipuzkoako Ekonomia Suspertzeko Planak 200 milioiko inbertsioa aurreikusten du 2019ra arte, lurraldeko ekonomia, enplegua eta ongizatea bultzatzea helburu. Lau arlotan banatuta –industria, lehen sektorea, gizarteratzea eta kultura eta turismoa–, eta fiskalitatea zeharkako lerro gisa hartuta, 2017ko atalean 50 milioi aktibatu dira aurten. Laguntza horien irismena zabaldu egin da,  ia 3.800 enpresa, zentro eta eragilek babesa jaso baitute. Horrez gain, 510 enpresa eta negozio berriren sorrera bultzatu du plangintzak eta, foru erakundearen estimazioen arabera, 2.121 lanposturen sorrera bultzatu du zuzenenean eta zeharka.

Markel Olanok irakurketa “positiboa” egin du egungo testuinguru ekonomikoaren harira, baina, aldi berean, dei egin die lurraldeko enpresa eta eragile sozio-ekonomikoei “lanean eta lankidetza eremuak sendotzen jarraitzeko”, gisa horretan “lehiakortasunean eta berrikuntzan aurrera egiten segitzeko” nahiz “enplegua sortzen jarraitu eta egoera kritikoak ekiditeko”. “Enpresa lehiakorrak, partaidetza sustatzen dutenak, berritzaileak, izaten dira enpresa errotuenak eta, gainera, zalantza uneei aurre egiteko tresna gehiago izaten dituzte. Enpresa eredu gipuzkoar horretan sakontzen jarraitu behar dugu egoera kritikoei aurre hartu eta ekiditeko”, berretsi du.

Lurraldeko ekonomiaren egoerari dagokionez, azken hilabeteotan sendotzen ari diren “zeinu positiboak” aipatu ditu diputatu nagusiak. “Langabezia %9,1an kokatu da gure lurraldean Eustatek argitaratu dituen azken datuen arabera, enpresen sorrerak ere gorakako bidean jarraitzen du eta BPGren hazkundea ere %3 inguruan dago. Hala ere, Olanok “zuhurtzia” posizio batean kokatu du bere burua, badirelako “zalantza eremuak” ere, eta aktibitate eta lanpostu berriak sorraraziko dituzten “apustuak” egiten jarraitzeko beharra nabarmendu du.

Testuinguru horretan, diputatu nagusiak gogorarazi du Foru Aldundia lanean ari dela “proiektu estrategikoak gauzatzeko, etorkizuneko sektoreetan lanpostuak sortuko dituzten industria eta ekonomia aktibitate berria” hauspotzea helburu: fabrikazio aurreratua eta zibersegurtasuna, biozientziak eta osasuna, elektromugikortasuna eta energia biltegiratzea, kasu. “Ekonomia susperraldia finkatzeko lan konpartitu horretan gure eskuetan dagoen guztia egiten jarraituko dugu, enpresekin elkarlanean eta lurraldeko ekonomiaren mesedetan apustu berri eta berritzaileak eginez”, laburbildu du Olanok.

Enpresa proiektu berriak

Ekonomia Sustapena, Landa Ingurunea eta Lurralde Orekako diputatuak, Ainhoa Aizpuruk, Ekonomia Sustapena eta Industriaren alorrean martxan jarritako neurri eta programen balorazioa egin du. Hasteko, “areagotzen ari den bizitasuna” nabarmendu du ekintzailetasuna bultzatzeko programetan; izan ere, Foru Aldundiko laguntzek 510 enpresa eta negozio berriren sorreran eragin dute, “iaz baino ehun inguru gehiago”. “Enpresa proiektu berri horietatik 220 emakumeek bultzatu dituzte, datu esanguratsua benetan. Gainera, oinarri teknologikodun 43 proiektu sustatu dira, hain zuzen ere horiek dira hazkunde potentzial handiena eta merkatuetan kokatzeko aukera gehien dutenak, horrek dakarren lanpostuak sortzeko gaitasunarekin”, aintzatetsi du. Enpresen barne ekintzailetasuneko 20 proiektu ere bultzatu dituzte. 

Lurraldeko enpresen lehiakortasuna, errotzea eta berrikuntza hobetzeko programei dagokienez, Aizpuruk jakitera eman du 800 enpresa ingururi eskaini diotela laguntza, eta horrek “eragin positiboa” du lurraldeko 30.000 langileren eguneroko lanean. 

“Azpimarratzeko modukoa da, baita ere, gure enpresak digitalizazioaren alorrean egiten ari diren lana. Bi milioi euroko diru-laguntzak eskaini ditugu alor honetan, 4.0 kontzeptuak eta fabrikazio aurreratuko makineria zabaltzeko, gisa horretan 50 digitalizazio-proiektu sustatuz. Alor honetan nabarmendu dezakegu inbertsio berriak eragiteko gaitasuna: jarri dugun milioi bakoitzeko hiru aldiz gehiago balio duten inbertsioak sorrarazi ditugu”, xehetu du diputatuak. 2017an, gainera, Gipuzkoa 4.0 Fabrikazio Aurreratuko Sarea abian jarri dute, Gipuzkoako 200 ETEri lagunduz; horiek guztiek fabrikazio aurreratuan azken aurrerapenak ezagutu ahal izan dituzte, enpresa liderren eskutik. 

Datorren urteari dagokionez, Ainhoa Aizpuruk nabarmendu duenez, Ekonomia Suspertzeko Planak –Etorkizuna Eraikiz egitasmoan kokatuko da aurrerantzean–, Gipuzkoako apostu estrategikoetan sakontzeko neurri eta programetan lanean jarraituko du: elektromugikortasuna eta energia biltegiratzea, fabrikazio aureratua eta biozientziak eta osasunaren alorrak”. Gainera, lehiakortasuna, ekintzailetasuna eta berrikuntzara bideratutako programetan sakontzeari eutsiko dio Foru Aldundiak eta, aldi berean, “talentua sortu, erakarri eta mantentzeko” estrategia indartuko du. “Gero eta enpresa gehiagok aipatzen digute profil espezializatu berriak behar dituztela, kosta egiten zaiela profil horietako lanpostuak osatzea. Errealitate horri aurre egin behar diogu lurraldeko gainontzeko eragile sozio-ekonomikoekin. Lanean ari gara horretan eta 2018an emaitzak lortzea espero dugu”, laburbildu du Aizpuruk.