Amaitu da Amezketako mugikortasuna eta natura-ingurunea eraldatuko dituen saneamendu eta bidegorriaren proiektu integralaren lehen fasea

José Ignacio Asensiok azpimarratu duenez, “jarduera honek mugarri bat jartzen du Amezketarako. Uraren kudeaketa hobetzen dugu, ibaiak berreskuratzen ditugu eta urrats sendoak egiten ditugu mugikortasun-eredu osasungarriagoa eta jasangarriagoa lortzeko”.

Xabier Arruti: “Ongizate integralaz ari garenean, mugikortasunaz, konexioaz, segurtasunaz, osasunaz eta aisialdiaz ere ari gara. Bidegorri hori, hain zuzen ere, helburu horrekin garatu da: Amezketako biztanleen bizi kalitatea hobetzea, udalerriaren barne konektibitatea erraztuz, herritarren benetako premietara egokitutako irtenbide jasangarrien bidez ”.

Amezketak GI-2133 errepidearekiko paraleloa den bidegorri berriaren eta saneamendu-obren lehen fasea inauguratu du gaur. Jarduketa estrategiko horrek aurrerapen handia dakar Amezketa eta Oria ibaien ingurumen-kalitatearen hobekuntzan eta udalerriko mugikortasun jasangarrian.

Inaugurazio-ekitaldian izan dira Jasangarritasuneko diputatu José Ignacio Asensio, Lurralde Oreka Berdeko diputatu Xabier Arruti, Gipuzkoako Ur Kontsortzioko presidente Leire Artola eta Amezketako alkate Mikel Arteaga.

Inauguratutako jarduketa 4.636.567,72 euroko (BEZa barne) aurrekontua duen proiektu integral baten barruan dago. Proiektuaren finantzaketa honela banatzen da: Gipuzkoako Foru Aldundiko Jasangarritasun Departamentua (1.037.635,35 euro), Lurralde Orekako Departamentua (1.151.537,46 euro), Gipuzkoako Urak (1.346.143,29 euro) eta Amezketako Udala (1.101.251,62 euro).

Lehen fase horri esker, ur beltzen kolektore nagusi berri batetik 3.100 metro eta bigarren mailako adarretatik 300 metro egin ahal izan dira. Gainera, Ugarte urez hornitzeko eroanbidea berritu da, 1.800 metro lineal hodi berrirekin eta suteen aurkako 3 ur-hartune instalatu dira. Ugarte auzoa ere gas-azpiegituraz hornitu da, esku-hartzea aprobetxatuz.

Gainera, dagoeneko errealitate bilakatu da 1.750 metro luzeko eta 3 metro zabaleko bidegorri berria, Amezketako herrigunea Ugarte auzoarekin lotzen duena, Lurralde Oreka Berdearen Departamentuak eta Amezketako Udalak sustatua. Txirrindularientzako eta oinezkoentzako bide horrek argiztapena, seinaleztapena, hesiak eta balizak ditu, eta nabarmen hobetzen ditu udalerriaren barneko mugikortasuna eta konektibitatea.

Proiektuaren bigarren faseak, oraindik gauzatzeke dagoenak, saneamendu-sistema Ugartetik Alegiaraino luzatzea aurreikusten du, Oria erdialdeko hodi biltzailearekin lotuz eta, horrela, hondakin-uren kudeaketa zentralizatua ahalbidetuz Adunako Uraldeko araztegian. Fase horretan, Abaltzisketako isurketak ere jasoko dira, eta, hura osatzean, Errotaldekoak, Larraitz auzokoak eta Beistin auzokoak, Alegian.

José Ignacio Asensiok azpimarratu duenez, “jarduera honek mugarri bat jartzen du Amezketarako. Uraren kudeaketa hobetzen dugu, ibaiak berreskuratzen ditugu eta urrats sendoak egiten ditugu mugikortasun-eredu osasungarriagoa eta jasangarriagoa lortzeko”.

Xabier Arrutik adierazi duenez, “ongizate integralaz ari garenean, mugikortasunaz, konexioaz, segurtasunaz, osasunaz eta aisialdiaz ere ari gara. Bidegorri hori, hain zuzen ere, helburu horrekin garatu da: Amezketako biztanleen bizi kalitatea hobetzea, udalerriaren barne konektibitatea erraztuz, herritarren benetako premietara egokitutako irtenbide jasangarrien bidez ”.

Inaugurazio honekin, ingurumen-jasangarritasuna, lurralde-kohesioa eta oinarrizko zerbitzuen hobekuntza uztartzen dituen proiektu eraldatzaile bat finkatu da, Gipuzkoa berdeago, konektatuago eta udalerri guztientzako etorkizun handiagoarekin lerrokatuta.