Etengabeko hobekuntzarekiko konpromisoa: Lurraldebusek E21 linea egokitu du, irailaren 30era arte Hondarribiko aireportuko geralekua kenduta

•    Azahara Domínguez diputatuak jakinarazi duenez, Lurraldebusen E21 lineak Hondarribiko aireportuaren kanpoaldean geldialdia egiteari utziko dio uztailaren 21etik aurrera eta E30 linea martxan dagoen bitartean (ekainaren 20tik irailaren 30era), Hondarribiko erabiltzaileentzat bidaia erosoagoa egiteko eta, horrela, geldialdi horrek eguneroko joan-etorrietan sortzen zizkien eragozpenak arintzeko.

•    Azahara Domínguez, Mugikortasuneko, Turismoko eta Lurralde Antolaketako diputatua: "erabaki honek behar nabarmen bati erantzuten dio, alegia, Hondarribiko erabiltzaileei ibilbide erosoagoa eskaintzea. E30 linea abian dagoen bitartean aireportutik kanpoko geralekua kentzeak zerbitzuaren erosotasuna indartzeko aukera ematen digu".

2025eko uztailaren 15a.- Gipuzkoako Foru Aldundiko Mugikortasuneko, Turismoko eta Lurralde Antolaketako Departamentuak jakinarazi du uztailaren 21etik aurrera Lurraldebusen E21 lineak (Aireportua – Hondarribia – Donostia) ez duela geldialdirik egingo Hondarribiko aireportuan E30 linea abian dagoen hilabeteetan (ekainaren 20tik irailaren 30era bitartean).

Hain zuzen ere, erabaki hori hartu dugu 2024ko udan eta aurtengoan aireportuari zerbitzua emateko E30 linea espezifikoa martxan jarri arren, Hondarribiko ohiko erabiltzaileek eragozpenak izaten jarraitzen zutela ikusi delako. Horregatik, beste urrats bat emango dugu: E21 linean, aireportuko kanpoko geralekua bertan behera geldituko da.

Azahara Domínguez diputatuak honako hau nabarmendu du: "neurri horrek argi eta garbi adierazten du zerbitzu publikoa herritarren behar aldakorretara egokitzeko etengabeko konpromisoa izateaz gain, sor daitezkeen arazoei ere erantzuten diegula. Iazko udan eta aurten E30 linea jarri dugu martxan, aireporturako trafikoa hartzeko, baina ikusi dugu ez dela nahikoa: E21 lineak aireportuaren kanpoaldean egiten duen geldialdiak eragin negatiboa du, oraindik ere, egunero aisialdiaz bestelako arrazoiengatik erabiltzen dutenentzat. Horregatik, hain zuzen ere, aurten erabaki dugu aireportuko kanpoko geralekua kentzea, E30a izan dadin Hondarribiko aireportuko zerbitzua ematen duen linea bakarra, eta udako hilabeteetan berariaz jardungo duena, harik eta emakida berria abian jarri arte. Emakida horren bidez urte osoan zehar eskainiko da zerbitzua, eta aireportuko konexioetan zerbitzu hoberena emateko berariaz diseinatutako ibilgailuak izango ditu. Ibilgailu horiek maletak eta eskuko poltsak eramateko bereziki prestatutako tokia izango dute, bai eta irisgarritasun, segurtasun eta erosotasun hobekuntza nabarmenak ere, bidaiarien beharretara eta ibilbidearen ezaugarrietara erabat egokitutako zerbitzua bermatzeko."

Doikuntza hori departamentuak herritarren eskaera aldakorrei eta sortzen diren arazoei arintasunez eta eraginkortasunez erantzuteko duen moduaren adibide argia da, mugikortasuna hobetzeko eta, azken batean, pertsonen bizi kalitatea hobetzeko etengabeko konpromisoa erakusten baitu. Garraio zerbitzu publikoak benetako beharretara egokitzeak, joan-etorriak efizienteagoak, azkarragoak eta erosoagoak izatea ahalbidetzeaz gain, garraio publikoaren erabilera efizienteagoa eta jasangarriagoa sustatzen laguntzen du.

Bestalde, Hondarribiko alkateak honako hau nabarmendu nahi izan du: "garraio publikoa funtsezkoa da herritarren eguneroko bizitzan, eta oinarrizko tresna da herritarrek gure probintziako udalerrien artean egiten dituzten eguneroko joan-etorrietarako. Horregatik, Hondarribiko autobusa eta hiriburua E-21 linearen bidez zuzenean lotzea oso baliabide garrantzitsua izan zen hondarribiarrentzat."

Alkateak adierazi duenez, "zerbitzuaren erabiltzaileek eragozpenen berri eman izan digute askotan, autobusa ia beteta iristen baitzen aireportutik Hondarribiko lehen geralekura (pertsonak eta maletak), eta, beraz, askotan esaten ziguten arazoak izaten zituztela autobusean behar bezala joateko." 

"Horregatik, eskerrak eman behar dizkiot Gipuzkoako Foru Aldundiko Mugikortasuneko diputatuari erakundeei eta herritarrei entzun dielako zerbitzua hondarribiarren eguneroko erabilera beharretara egokitzeko, eskura dauden baliabide mugatuekin"