Gipuzkoak nazioarteko lankidetza indartzen du, material sozio-sanitarioaren berrerabiltzea bultzatuz

Naturklimak dohaintzan emandako ekipamendua zaintzeko lekua utzi du, eta Lankidetza Departamentuak bideratuko du, Ayuda Contenedores eta Andade GKEen bitartez, Kamerungo hezkuntza bereziko eskola batera.

Gipuzkoako Foru Aldundiko Jasangarritasun Departamentuak eta Andade elkarteak urtebete baino gehiago daramate material sozio-sanitarioaren berrerabilpena bultzatzeko lan ildo bateratu batean, hondakinak murrizteko eta testuinguru ahuletan justizia sozialeko proiektuak laguntzeko bi helbururekin.

Lankidetza horren ondorioz, laguntza- eta hezkuntza-ekipamenduko lote bat bildu da — gurpil-aulkiak, ohatilak edo material informatikoa —, eta Mirando por África GKEak Douala hirian (Kamerun) kudeatzen duen Lamina hezkuntza bereziko eskolari emango zaio.

Gipuzkoako Klima Aldaketaren Fundazioak, Jasangarritasun Departamentuaren mende dagoen Naturklimak, Andadek bildutako materiala aldi baterako zaintzeko duen gune logistikoa jarri du eskuragarri, Gipuzkoak klimaren eta zirkularraren ikuspegitik nazioarteko lankidetzarekin duen konpromisoaren erakusgarri.

Lan hori Kultura eta Lankidetza Departamentuarekin koordinatuta egin da, eta Ayuda Contenedores eta Andade GKEen bidez bideratzen du bidalketa.

José Ignacio Asensio Jasangarritasun diputatuak nabarmendu du ekintza hori ekonomia zirkularraren printzipioak maila globalean aplikatzeko modu zehatz bat dela: “Jasangarritasun Departamentutik material sozio-sanitarioaren berrerabilera bultzatzen ari gara, hondakinak murrizteko eta, aldi berean, behar duten komunitateetan eragin positiboa sortzeko tresna gisa. Lankidetza mota honek jasangarritasuna eta elkartasuna eskutik helduta joan daitezkeela erakusten du”.

Asensiok gaineratu du lan-ildo horrek bere horretan jarraituko duela: “Andade bezalako erakundeekin lanean jarraitu nahi dugu praktika hori sendotzeko. Helburu sozialetarako berrerabiltzeak erakusten du lankidetzan aritzeko beste modu bat — bidezkoagoa, zirkularragoa eta eraldatzaileagoa — posible dela”.

Dohaintzan emandako materiala

Naturkliman bildu eta biltegiratutako materialak honako hauek dira:

• Helduentzako 12 gurpil-aulki

• 4 zoru-koltxoneta

• 2 kontsulta-ohatila

• 4 ordenagailu

• 2 inprimagailu

• 4 bidaia-sehaska

• 2 sehaska normal

• 4 haur-orgatxo

• 2 kutxa nitrilozko eskularru

• Txirrista 1

• Pilota-kaxa 1

• Eskuzko nekazaritza-erreminten kit 1 (ezkurra)

Ekipamendu hori Lamina eskolara bideratuko da. Alima Ngoume aktibista kamerundarrak sortutako zentroa da, Mirando por África erakundearen sortzailea. Emakume migratuek gidatutako GKEa da, eta 2016tik ari da lanean Doualan, desgaitasuna duten haurrak duintzeko, gizarte-bazterkeriak, zerbitzu espezializatuen faltak eta estigma kulturalek markatutako ingurunean.

Horri dagokionez, Goizane Álvarez Kultura eta Lankidetza diputatuak nabarmendu du lankidetza horrek islatzen duela Gipuzkoak pertsonengan oinarritutako nazioarteko lankidetzarekin duen konpromisoa: “Erakundeek eta herritarrek ahaleginak batzen ditugunean, urrunago iristea lortzen dugu. Gipuzkoatik elkartasun eta duintasun zubiak eraikitzen jarraitu nahi dugu, bereziki erresilientziatik, memoria migratzailetik eta Alima bezalako emakumeen lidergotik bultzatutako ekimenekin”.

Eskola integratzailea

Proiektu honen historia Laminaren jaiotzarekin hasten da, Alamaren alaba, minusbaliotasun batekin diagnostikatua. Bere komunitatera itzultzean, Alima baztertu eta seinalatu egin zuten "neskato maldita bat" izateagatik, oraindik zenbait lekutan hedatuta dauden usteen arabera.  Errealitate horren aurrean, eskola inklusibo bat sortzea erabaki zuen, haur eta emakume zaintzaileei arreta medikoa, prestakuntza, elikadura eta ahalduntzea eskaintzeko.

Azken kalkuluen arabera, Kamerunen 800.000 pertsonak baino gehiagok dute desgaitasun intelektualen bat. Gipuzkoan, lankidetza hori lankidetzaren ikuspegi baten barruan kokatzen da, eta giza eskubideak, justizia soziala eta ekonomia zirkularra jartzen ditu erdigunean, eraldaketarako eragile gisa.