GK Green Fashion eta Garbera merkataritza guneak moda jasangarriko espazio bat bultzatzen dute Eguberri hauetan

Ekimena Gipuzkoako Foru Aldundiko Jasangarritasun Departamentuak sustatu du, eta aukera emango du moda arduratsuko proposamenak herritarrei hurbiltzeko, Gabonetako kanpainaren kontsumo-une garrantzitsu batean.

José Ignacio Asensio: “Nahi dugu herritarrek deskubritzea moda kontsumitzeko beste modu bat posible dela: kontzienteagoa, hurbilagoa eta planetarekiko errespetutsuagoa. Gabonak funtsezko unea dira aldaketa hori sustatzeko”.

Abenduaren 18tik 27ra, Garbera Merkataritza Guneak moda jasangarriko gune bat izango du, eta bertan GK Green Fashion klusterraren lau diseinatzailek hartuko dute parte. Ekimena Gipuzkoako Foru Aldundiko Jasangarritasun Departamentuak sustatzen du, merkataritza-gunearekin batera, eta aukera emango du moda arduratsuko proposamenak herritarrei hurbiltzeko, Gabonetako kanpainaren kontsumo-une garrantzitsu batean.

Egun horietan, herritarrek Limones y Flores, Maider Alzaga, CEO & CO-FUNDER eta AM Biko Studioren sorkuntzak ezagutu eta eskuratu ahal izango dituzte. Lau marka horiek jasangarritasunaren, tokiko ekoizpenaren eta ingurumenarekiko errespetuaren irizpideen arabera lan egiten dute. Espazioa publikoaren eta moda ekoizteko eta kontsumitzeko beste modu baten aldeko apustua egiten duten proiektu sortzaileen arteko topagune gisa ulertzen da.

Ekintzaren helburua moda jasangarriaren balioei buruz sentsibilizatzea da, hala nola kontsumo arduratsuari, zirkulartasunari, hurbileko ekoizpenari eta ingurumenarekiko errespetuari buruz, eta, aldi berean, Gipuzkoako talentu sortzaileari ikusgarritasuna ematea. Helburua da ohiko ehun-kontsumoaren alternatiba errealak eskaintzea eta moda arduratsuaren presentzia indartzea jende asko biltzen den merkataritza-espazioetan.

GK Green Fashionek, 2016az geroztik, bere jarduera ikuspegi etiko eta jasangarri batetik garatzen duten diseinatzaileak eta markak biltzen ditu, material arduratsuak eta ingurunea errespetatzen duten ekoizpen-prozesuak txertatuz. Klusterrak modu koordinatuan lan egiten du modaren sektorea sustatzeko, ekonomia zirkularraren printzipioekin bat etorriz eta eredu bidezkoago eta jasangarriago batekin.

“Nahi dugu herritarrek deskubritzea moda kontsumitzeko beste modu bat posible dela: kontzienteagoa, hurbilagoa eta planetarekiko errespetutsuagoa. Gabonak funtsezko unea dira aldaketa hori sustatzeko”, adierazi du José Ignacio Asensio Jasangarritasuneko diputatuak.

Ekimen horrekin, Jasangarritasun Departamentuak konpromisoa indartzen du kontsumo-ohitura arduratsuak sustatzeko eta jasangarritasunarekin lotutako tokiko ekimen ekonomikoak babesteko.

Bestalde, Garberak Jasangarritasun Departamentuarekin duen lankidetza indartzen du proiektu berri honen bidez; ekimen hori URW taldearen jasangarritasun-orrialdearekin lerrokatuta dago, Better Place 2030 izenekoarekin, zeinari Gipuzkoako merkataritza-gunea atxikita dagoen. Dokumentu horrek hainbat ekintza sustatzen ditu, besteak beste, emisioen murrizketa, eraikinen eraginkortasunaren hobekuntza, mugikortasun jasangarriaren sustapena eta komunitateen ongizatea indartzea, tokiko hazkunde ekonomikoa babestuz eta kontsumo jasangarria bultzatuz, Jasangarritasun Departamentuarekin egindako aliantza honetan bezala.