Jasangarritasunak eta Lankidetzak ahaleginak batu dituzte Bekoz Bekoz Bekorekin batera, Indian proiektu ekofeminista bat bultzatzeko

Jasangarritasun Departamentuak 4.000 euro erabiliko ditu eguzki-panelak instalatzeko Lucknowko (India) Sheroes Hangout kafean.

Kultura eta Nazioarteko Lankidetza Departamentuak 20.000 euro jarriko ditu azidoarekin erasoak jasan dituzten emakumeen prestakuntza eta autonomia indartzeko.

Mónica Pedreira Trantsizio Ekologikoko zuzendariak eta Ana Priede Lankidetzako zuzendariak Gipuzkoako Foru Aldundian jaso dituzte gaur Indian duela urte batzuetatik Sheroes Hangout proiektua babesten lan egiten duen Bekoz Beko elkarte gipuzkoarraren ordezkariak. Ekimen honek azidodun erasoetatik bizirik atera diren emakumeen ahalduntzea sustatzen du, indarkeria matxistaren aurkako borroka eta ingurumenaren defentsa konbinatuz.

Jasangarritasun Departamentuak 4.000 euroko laguntza eman du Lucknow hiriko Sheroes Hangout kafean eguzki-panelak instalatzeko, energia-kontsumoa murrizteko, kostuak merkatzeko eta lokalaren karbono-aztarna murrizteko.

“Jasangarritasuna ez da soilik ingurumen-kontua. Justizia sozialeko eta berdintasuneko tresna ere bada. Proiektu honen bidez, muturreko indarkeria jasan duten emakumeek etorkizunari duintasunetik, autonomiatik eta planetarekiko errespetutik begiratzen laguntzen dugu”, adierazi du Mónica Pedreira Trantsizio Ekologikoko zuzendariak.

Eguzki-sistemak aukera emango du urtean hiru eta zortzi tona CO₂ artean murrizteko, energia-hornidura garbia, egonkorra eta merkeagoa bermatuz. Jarduera hau Jasangarritasun Departamentuak jasangarritasuna, ekitatea eta justizia soziala barne hartzen dituzten eta 7. GJHarekin (Energia eskuragarria eta ez-kutsagarria) lerrokatuta dauden nazioarteko proiektuen aldeko apustuan kokatzen da.

Proiektuak ekoeraginkortasuna eta emakumeen ahalduntzea uztartzen ditu, ekofeminismoaren printzipioetan oinarrituta, zeinak ingurumenaren defentsa berdintasunaren eta giza eskubideen aldeko borrokarekin lotzen baitu.

Lankidetzarekiko eta berdintasunarekiko konpromisoa

Era berean, Gipuzkoako Foru Aldundiko Kultura eta Lankidetza Departamentuak elkarteak Indiako Chhanv Foundation erakundearekin batera egiten duen lana babesten jarraituko du. Enpresa hori Sheroes Hangout proiektuaren arduraduna da, eta Indian azidoarekin erasoak jasan dituzten emakumeei enplegua, prestakuntza eta gizarte-laguntza eskaintzen dizkie.

Dirulaguntza 20.000 eurokoa da 2025eko lankidetzarako laguntzen deialdian, eta emakumeen ahalduntzerako, jasangarritasunerako eta giza eskubideetarako ekintza zehatzak egiten laguntzen du, hala nola sormenezko prestakuntza- eta birziklatze-tailerrak, sexu-osasuneko eta hilekoaren hezkuntzako programak, emakumeentzako espazio seguruak sortzea eta, Lucknowren kasuan, eguzki-panelak instalatzea energia-mendekotasuna murrizteko eta ingurumen-jasangarritasuna sustatzeko.

Lankidetza Departamentuan “emakumeen eskubideen defentsari, genero-ekitateari eta ekofeminismoari balioa ematen diegu foru-politikaren funtsezko ardatz gisa”, adierazi du Ana Priede Nazioarteko Lankidetzako zuzendariak. “Bekoz-Beko babestea emakumeen autonomia bultzatzen duen, bidezko garapen jasangarria sustatzen duen eta, azken batean, mundu berdinzaleagoa eraikitzen laguntzen duen lankidetza-eredu bat indartzea da”.

Horregatik, Lankidetza Sailak GKE horren lana babesten jarraituko du, Gipuzkoako elkartasuna benetako bizi-aukera eta duintasun aukera bihurtzen baitu emakume ahulenentzat.

Sheroes Hangout: erresilientziaren eta jasangarritasunaren adibidea

Sheroes Hangout proiektua 2014an sortu zen, Indiako Chhanv Foundation erakundearen eskutik, azidoarekin erasoak jasan dituzten eta Indian indarkeria matxistaren arazo larria diren emakumeei bizitza- eta lan-aukera bat eskaintzeko. Gaur egun, kafetegiak kudeatzen ditu Agra eta Lucknow-en, bi otordu-kiosko Noidan eta prestakuntza-zentro bat Bengalan.

Jasangarritasun Departamentuaren eta Lankidetza Zuzendaritzaren laguntzarekin, proiektuak aurrera egiten du energia-eredu jasangarri, autonomo eta ingurunearekiko errespetuzko baterantz. Eredu horrek birziklatze-tailerrak, ahalduntze pertsonaleko programak eta ingurumen- eta berdintasun-hezkuntzako kanpainak konbinatzen ditu.

“Ez dago justizia klimatikorik genero-berdintasunik gabe”, gogorarazi du Pedreirak. “Horregatik, Jasangarritasun Departamentuaren eta Lankidetza Zuzendaritzaren arteko batasunak indartu egiten du garapena ulertzeko dugun modua: berdeagoa, bidezkoagoa eta gizatiarragoa”.