“Gipuzkoako ekonomia sendotasunez erantzuten ari zaio ezegonkortasun globalari”

Gipuzkoak 6.075 milioi euro bildu zituen iaz, aurreko urtean baino 654,9 milioi euro gehiago (+%10,8). Zifra horrek gainditu egin ditu urriko azken Finantzen Euskal Kontseiluan itxitako aurreikuspen aurreratuak, 75 milioi euro gehiago bildu baitira. Gipuzkoako diputatu nagusiak 2025eko diru-bilketaren emaitzen berri eman du Gipuzkoako Batzar Nagusietan, Itziar Agirre Ogasun eta Finantzetako foru diputatuarekin batera.

Mendozak Gipuzkoako ehun ekonomikoaren sendotasuna nabarmendu du, urtea zifra oso positiboekin ixtea ahalbidetu baitu, eta hori, zalantzarik gabe, berri ona da guztiontzat. Ildo horretan, Mendozak nabarmendu du adierazle ekonomikoak positiboak direla “enpresek sendotasunari eusten diote, jarduerari eta enpleguari eusten diote”, eta gaineratu du “horrek guztiak aukera emango digula markatutako norabideari erabakitasunez eusteko”, “pertsona guztien ongizate integrala” babesteko. Era berean, diputatu nagusiak “zuhurtzia” eskatu du ziurgabetasun geopolitiko globalaren eta harreman komertzialetan duen eraginaren aurrean, horrek “edozein unetan alda baitezake egungo egoera”.

Ildo horretan, Mendozak azpimarratu du diru bilketari buruzko datu onei esker Gipuzkoak 2026an politika eta proiektu berriak garatzen jarraitu ahal izango duela, “enpresen lehiakortasuna babesteko eta etorkizuneko industria sektoreak garatzea ahalbidetuko duten apustu berriak egiteko”, bai eta “gizarte politikak eta etorkizuneko zaintza bermatuko dituzten inbertsio berriak” bultzatzeko ere.

Itziar Agirrek, bere aldetik, zergen eta urteko martxaren inguruko xehetasunak eman ditu. Puntu horretan, PFEZaren eta kudeaketa propioko BEZaren bilakaera positiboa nabarmendu da, urte arteko bilakaera 287,5 milioi eta 141,6 milioi igo baita, hurrenez hurren. Era berean, Pertsona Fisikoen Errentaren gaineko Zergari dagokionez, Agirrek azpimarratu du lan-etekinengatiko atxikipenen igoera, urte arteko bilakaera % 6,1 handitu baita, hau da, 141,6 milioi euro gehiago bildu dira. Agirreren hitzetan, datu horiek “lurraldearen dinamismo ekonomikoaren isla dira”.

Ogasun eta Finantzetako foru diputatuak sozietateen gaineko zergaren bilakaera negatiboaren atzean dagoen arrazoia ere azaldu dio batzarkide taldeari. Hala, adierazi duenez, “batez ere Gipuzkoako ogasunak aurreko ekitaldian BGAEen inbertsioen errentagarritasunagatiko atxikipenen ondorioz egin behar izan dituen itzulketei zor zaie, zero tasan ordaintzen dutenez, itzuli egin behar baitira”. Ondorioz, 2025ean 100 milioi euro itzuli dira, “ohikoa ez den kopuru bat, eta horrek zuzenean eragin du zergaren bilketaren azken emaitzan”.

Puntu honetan, Agirrek azaldu du, itzulketa horiek Sozietateen gaineko Zergaren bilketa datuen arabera alde batera utzita, ikus daitekeela enpresen kontabilitate emaitzak % 15 igo zirela 2024an, 2023arekin alderatuta.

Gipuzkoako udalerriek 702 milioi euro jasoko dituzte UFFFren bidez

Ogasun eta Finantzetako foru diputatua lurraldeko udal ordezkariekin bildu da gaur goizean Gipuzkoako Finantzen Lurralde Kontseiluan, Foru Jauregian. Gipuzkoako Foru Aldundiaren aldetik, gainera, honako hauek hartu dute parte: Jose Ignacio Asensio lehen diputatuorde eta Iraunkortasuneko diputatuak, Azahara Domínguez Turismo Mugikortasuneko eta Lurralde Antolaketako diputatuak, Bittori Zabala Zerga eta Finantza Politikako zuzendari nagusiak eta Jose Antonio Lapeira Konpromiso Instituzionalen zerbitzuburuak. Eudelen aldetik, Eibarko alkate Jon Iraola, Zumaiako alkate Iñaki Ostolaza, Donostiako Udaleko Ogasun eta Finantza zinegotzi ordezkari Kerman Orbegozo eta Eudeleko Joseba Intxausti izan dira, aholkulari gisa.

Ogasun eta Finantzetako foru diputatuak jakinarazi du Gipuzkoako udalerriek Udal Finantzaketarako Foru Funtsetik (FOFIM) 2025erako jasoko duten zenbatekoa 702 milioi eurokoa dela. “Lehen aldiz gainditu da 700 milioi euroko langa”, adierazi du Agirrek, “eta hori oso berri ona da, zalantzarik gabe, lurraldeko udalerrientzat”. Zifra horrek aurrekontuarekiko 29 milioi euroko desbiderapen positiboa dakar, hau da, % 4,32ko igoera aurrekontuan jasotakoarekin alderatuta, eta % 11,58 handitu da 2024ko likidazioarekin alderatuta.