15.500 zergadun baino gehiagok onartu dute autolikidazio proposamena 2025eko Errentaren kanpainaren lehen orduetan

Gipuzkoako 15.735 zergadunek onartu dute gaur goizean Gipuzkoan hasi den 2025eko Errenta kanpainaren autolikidazio proposamena. Foru Ogasunak eguerdiko 12:00etan zenbatu duen kopurua da hori. Horrela, bidalitako 275.000 autolikidazio proposamenetatik % 5,3 ordu horretarako onartuak izan dira. Horietatik 11.662 Internet bidez onartu dira eta 1.485 telefonoz. Gainerakoan, 1.127 aitorpenek zergadunaren adostasuna jaso dute Foru Erakundearen beraren lantaldearen laguntzarekin, dela bulegoetan, dela telefonoz; eta 1.461 Errenta+ app-aren bidez..

            Gipuzkoako Foru Aldundiak gogorarazten du gaurtik aurrera onartu daitezkeela autolikidazio proposamenak. Ados egonez gero, Internet zein telefono bidez eman daiteke adostasuna (943113000). Aurten, Ogasun eta Finantza departamentuak sistema egokitu du, Internet bidezko autolikidazio proposamena onartzeko aukera guztiak zergadunaren eskura jarriz. Horrela, Internet bidezko proposamen bat onartu nahi denean, honako hauek egin ahal izango dira: 1) Aldaketarik gabe onartu; 2) Aldaketekin onartu. Bertan, aldaketak arin sartu ahal izango dira, hala nola etxebizitzak edo lokalak alokatzeagatiko diru-sarrerak, dohaintzengatiko kenkariak, kuota sindikalagatiko kenkariak eta etxebizitza alokatzeagatiko kenkariak. Gainera, aurten, berrikuntza gisa, bi kontzeptu aldagarri berri sartu dira: errentatzailearen birgaitze babestuagatiko kenkaria eta gizarte-aurreikuspeneko sistemetara (BGAE, etab.) egindako ekarpenengatiko kenkaria; (3) Azkenik, edozein kontzeptu aldatuz onartu ahal izango da, proposamena ZergaBidea programa deskargatuta.. Azken aldaketa hori IFZrekin eta proposamenaren kodearekin bakarrik egin ahal izango da, egiaztapen gehigarririk behar izan gabe.

            Halaber, gaurtik aurrera Ondarearen eta Fortuna Handien gaineko Zergaren kanpaina hasiko da.

            2025eko Errenta kanpainarekin lotutako gainerako funtsezko datei dagokienez, apirilaren 13tik ekainaren 8ra arte eskatu ahal izango da errenta mekanizatua egin ahal izateko hitzordua, eta apirilaren 14tik aurrera modalitate horren bidez egin ahal izango da aitorpena. Bestalde, uztailaren 2an amaituko da kanpaina.

            Aurten ere, adierazpena euskaraz aurkezteko deia egin du foru erakundeak. Horrela, 2023ko Errentaren izapideak euskaraz egin ahal izateko behar diren arreta zerbitzua eta tresnak ematen ditu.