Aldundiak amaitu ditu Berrobiko zeharbidean segurtasuna eta irisgarritasuna hobetzeko lanak

Gipuzkoako Foru Aldundiak amaitu ditu Berrobiko zeharbidean (GI-2130) segurtasuna handitzeko eta irisgarritasuna hobetzeko urtarrilaren erdialdean hasitako lanak. Aurreikusitako hiru hilabeteko epea betez, egindako esku-hartzeak trafikoa baretzeko neurriak jarri ditu, oinezkoen mugikortasuna erraztu du eta errepidea herrigunean modu seguruago eta integratuagoan txertatzea lagundu du.

Felix Urkola, Bide Azpiegituretako eta Lurralde Estrategiako diputatuak azpimarratu du “lanak errepidea herritarren eta herriaren beharretara egokitzeko helburuarekin” egin direla, “segurtasuna indartuz eta elkarbizitza ahalik eta gehien erraztuz”. Esku-hartze hau Foru Aldundiaren tokiko ekintzen planaren barruan kokatzen da, herriguneetatik igarotzen diren errepide eta zeharbideetan segurtasuna eta bizikidetza hobetzea helburu duten jarduketen baitan. Hala, Berrobiko lanek 210.000 euroko inbertsioa izan dute.