Aldundiak Gipuzkoa Quantum programari esker garatutako ULMAren GLACIAR proiektu kuantikoaren aurrerapenak aztertu ditu

Eider Mendoza Gipuzkoako diputatu nagusiak eta Unai Andueza Ekonomia Sustapeneko eta Proiektu Estrategikoetako diputatuak lan topaketa bat izan dute gaur goizean ULMA eta ULMA Medical Technologies taldeetako arduradunekin; kooperatiba taldearen zuzendaritza berriarekin elkartu dira eta GLACIAR proiektuaren aurrerapenak aztertu dituzte.

Erakunde ordezkaritzak bilera bat egin du ULMA taldeko zuzendaritzarekin, haren garapen estrategia eta erakundeak egungo testuinguru globalean dituen erronka eta aukera nagusiak sakon aztertzeko. Bisitan ULMA taldeko presidente Ibon Calvok eta zuzendari nagusi Iñaki Gabilondok parte hartu dute. Era berean, bertan izan da Aitor Ayastuy, ULMA Constructioneko egungo CEOa. Laster, kooperatiba taldearen zuzendaritza nagusia hartuko du bere gain, eta enpresak etapa berri honetan izango duen bilakaeraren buru izango da.

Bisitaren ardatz nagusietako bat ULMA Medical Technologies enpresak Gipuzkoa Quantum laguntza programaren esparruan garatutako GLACIAR proiektu kuantikoaren jarraipena izan da. Proiektu honen helburua da teknologia kuantikoa lurraldeko enpresa ehunera hurbiltzea eta aplikatzea, balio erantsi handiko sektoreetan lehiakortasuna eta posizionamendua hobetzen laguntzeko.

Kuantika, Gipuzkoako enpresa sarea berritzeko palanka

Testuinguru horretan, ULMA Medical Technologies begi-hondoko irudietan mikroaneurismak automatikoki detektatzeko proiektu bat garatzen ari da, erretinopatia diabetikoaren diagnostiko goiztiarra hobetzeko. Ekimenak inspirazio kuantikoko tekniken erabilera aztertzen du ereduen arkitektura indartzeko, bereziki patroi sotilak identifikatzeko sentsibilitate handia eskatzen duten zereginetan, eta horrek aurrerapen garrantzitsua ekar lezake osasun digitalaren eremuan. Halako ekimenak teknologia aurreratuek ekoizpen sarean duten aplikazio praktikoaren adibide dira eta Aldundiak bereziki nabarmendu nahi du ikuspegi hori. Kasu honetan, gainera, teknologia kuantikoen esperimentazioa sektore estrategiko batean gertatzen da, hala nola biozientzietan eta terapia aurreratuetan, eta eremu hori oso hazkunde oparoa izaten ari da lurraldean.

Eider Mendoza diputatu nagusiak azpimarratu du horrelako ekimenak oso garrantzitsuak direla gaur egungo testuinguruan, eta adierazi du "bizi dugun ziurgabetasun une honetan, are garrantzitsuagoa dela gure enpresa sarearen lehiakortasuna babesten jarraitzea, espezializazio handiko proiektuen bidez". Halaber, ULMAren "eredu kooperatiboa"

nabarmendu du, "ingurune global konplexu batean, "errotzearen, lehiakortasunaren, berrikuntzaren eta pertsonekiko konpromisoaren" adibide gisa.

Mendozak Gipuzkoako estrategia ere azpimarratu du, funtsezko eremuetan aurrea hartzera eta posizionatzera bideratua: "Urteak daramatzagu lanean sektore estrategikoetan kokatzeko, horrela, merkatuaren buru izateko eta lehia globaletik bereizteko. Funtsezkoa da bultzatzen ari garen azpiegitura eta teknologia aurreratuek benetako eragina izatea gure industria sarean, GLACIAR proiektuak erakusten duen bezala”.

Ildo horretan, ohartarazi du Aldundiaren helburu nagusietako bat proiektu estrategikoak enpresak eraldatzeko palanka gisa jardutea dela: "Gure enpresek aurrera egin dezaten, lehiakorragoak izan daitezen eta beren sektoreetan abantaila izan dezaten lagunduko duten teknologiak nahi ditugu, hala nola kuantika".

Bestalde, ULMAko zuzendari nagusi Iñaki Gabilondok nabarmendu duenez, "ULMArentzat, Gipuzkoa Quantum programa bezalako ekimenak gure lehiakortasuna indartzeko aukera bat dira. GLACIAR proiektua, gure gizarte eta enpresa eredutik, erakundeekin lankidetza estuan sektore estrategikoetan (adibidez, osasunean) benetako eragina duten berrikuntzak nola bultzatzen ditugun erakusten duen adibide bat da”.

Aipatzekoa da Gipuzkoa Quantum programak 31 proiektu bultzatu dituela guztira 2025ean, aurreko urteko kopurua halako bi, eta teknologia kuantikoa lurraldeko enpresa ekosistemara eramateko funtsezko tresna gisa duen zeregina sendotu du horrela. ULMAk eta halako enpresek horrelako ekimenetan parte hartzeak enpresa sareak estrategia horrekin bat egiteko eta lurraldean garatutako teknologia aurreratuak txertatzeko duen interesa islatzen du, eta agerian uzten du lankidetza publiko-pribatuaren garrantzia eta gure ekosistema ekonomikoaren lehiakortasuna indartzeko egin duen ekarpena, hori baita Gipuzkoako ongizatearen oinarria.