Aldundiak hobekuntzak bultzatu ditu Tolosaldeko errepide sarean, udalerri txikien mugikortasuna indartzeko

Eider Mendoza diputatu nagusiak, Felix Urkola Bide Azpiegituretako eta Lurralde Estrategiako diputatuarekin eta Xabier Arruti Lurralde Oreka Berdeko diputatuarekin batera, lan bilera bat egin du gaur goizean  Albizturren; Albizturko alkate Alazne Urkizurekin, Beizamako alkate Pedro Mari Otaegirekin, Errezilgo alkate Koldo Arzalluzekin eta Bidania-Goiatzeko alkate Iñaki Errazkinekin, foru arduradunek lurraldeko udalerrietara egiten dituzten ohiko topaketen barruan.

Topaketan, udalerri horien behar eta lehentasun nagusiak partekatu dituzte, eta Aldundia horiei erantzuten ari zaie hainbat ekimenen bidez, besteak beste, tokiko sareko errepideetako segurtasuna eta mugikortasuna hobetzera bideratutako jarduketen bidez. Zehazki, 1,2 milioi euro inguruko inbertsioarekin, laster jarduketak egingo dira Tolosa eta Albiztur arteko errepidean, eta bihurguneak handitzeko eta hobetzeko lanak egingo dira Goiatz inguruan. Diputatu nagusiaren hitzetan, “eragin handiko jarduketak dira, tokiko errepide sarearen etengabeko hobekuntzaren barruan kokatzen direnak. Errepide horiek funtsezkoak dira eguneroko mugikortasunerako eta herri txikien eta eskualdeen garapen sozial eta ekonomikorako”. Horrela, Mendozak balioan jarri du udalerri txikiek Gipuzkoaren egituraketan duten eginkizun estrategikoa, haien garapen sozial eta ekonomikoa eta biztanleen bizi kalitatea bermatuko duten inbertsioak eta zerbitzuak indartzeko beharra azpimarratuz.

Alde batetik, nabarmentzekoa da GI-2634 errepidean, Tolosa eta Albiztur artean, egindako esku-hartzea. Bertan, galtzada kilometro bat inguruko tarte batean handituko da, eta gaur egun ibilgailuak gurutzatzeko zailtasunak dituzten hiru bihurgune hobetuko dira. Era berean, GI-3740 errepidean, Goiatz inguruan, biraketa bat hobetzeko jarduketa bat egingo da, galtzada bihurgunearen barrualderantz zabalduz eta hura egokituz, puntu horretan segurtasuna indartzeko. Jarduketek 997.860 euroko aurrekontua dute, eta obrak hilaren amaieran edo uztailaren hasieran hastea aurreikusten da, bost hilabeteko exekuzio-epearekin.

Bestalde, Beizama eta Nuarbe (Azpeitia) arteko errepidean hainbat puntutan zabaltze-lanak egin dira dagoeneko, 190.412 euroko aurrekontuarekin. Esku hartzeari esker, nabarmen hobetu da gidarien ikuspena, eta ibilgailu astunak eta autobusak gurutzatzea ere erraztu da. Gainera, hormigoizko petril zahar baten ordez metalezko babes-hesi berriak jarri dira, eta zorua hobetu da, azpiegituraren segurtasuna eta iraunkortasuna areagotzeko. Gaur egun, obrak ia amaituta daude, ezpondetan erremate puntual batzuk kenduta.

Saio informatiboa Bidania-Goiatzen

Gaur egindako topaketaren baitan, foru arduradunek adostu dute Bidania-Goiatzeko herritarrei zuzendutako informazio bilera bat ere egitea, aurreikusitako lanen xehetasunak bertatik bertara emateko. Horrela, Felix Urkola Bide Azpiegituretako eta Lurralde Estrategiako diputatuak eta Xabier Arruti Lurralde Oreka Berdeko diputatuak bilera irekia egingo dute ekainaren 30ean, asteartea, 18:00etan, Bidania-Goiatzen.