Aldundiak Komukide aurkeztu du, ikasleak beren tokiko komunitatearen hobekuntzan inplikatzeko ekimena

Gipuzkoako Foru Aldundiak Komukide ekimena aurkeztu du gaur goizean, ikasleek beren tokiko komunitatearen barruan eragile aktibo gisa parte hartzea sustatzeko proiektu pilotua.

Programa hasiera batean Zarautzen, Oiartzunen eta Legazpin garatuko da, Zarauzko Antoniano Ikastetxeko, Oiartzungo Haurtzaro eta Elizaldeko, eta Legazpiko Olamendi eta Haztegiko DBHko 3. mailako ikasleen parte-hartzearekin. Ikasleek erakundeetako ordezkariekin eta dagozkien udalerrietako eragileekin batera lan egingo dute ekimen komunitario bat diseinatu eta ondoren abian jartzeko.

Gobernantzako foru diputatu Irune Berasaluzek parte hartu du gaur Foru Jauregiko Gunea aretoan egin den aurkezpenean, eta bertan izan dira ikastetxe horietako ordezkariak eta hiru udalerri horietako udaleko eragileak eta ordezkariak.

Ekimen hau Aldundiaren Estrategiaren II. zutabean kokatzen da, Gipuzkoa demokratiko, arduratsu, jasangarri eta bizi baten eraikuntzan aurrera egitera bideratuta. Zutabe horrek gobernantza kolaboratiboa indartzearen, herritarren parte-hartzea sustatzearen eta lurraldearen izaera komunitarioa indartzearen aldeko apustua egiten du, herritarren inplikazio aktiboa eta erakundeen eta gizarte eragileen arteko lankidetza bultzatuz.

“Helburu horrekin sortu zen Elkartegintza proiektua, gizarte sare sendo baten jarraitutasunean eta indartzean laguntzea helburu duen ekimen bultzatzailea, elkarte biziek eta pertsona konprometituek osatua, horrela komunitate demokratiko baten eraikuntza bultzatuz eta lankidetza publiko-pribatua sustatuz”, azaldu du Berasaluzek, eta gaineratu du “proiektu honen esparruan kokatzen dela Komukide, gazteak komunitate honen eraikuntzan eta etorkizunean inplikatzera bideratutako ekimena”.

Foru diputatuak adierazi du 2026-2027 ikasturtean 250 ikasle inguruk parte hartzea eta izaera komunitarioko 11 proiektu abian jartzea aurreikusten dela. Era berean, programa behar bezala garatzen dela bermatzeko, gida didaktiko espezifiko bat egin da.

“Gazteak ez dira etorkizuneko herritarrak, gure komunitatearen parte aktiboak baizik. Lan honen bidez, gazteok bere udalerriari, bere errealitateari begiratzea eta testuinguru honetan aurkezten diren beharrak aztertzea nahi da, bertako bizilagunekin hitz egin eta galdetuz. Praktikaren bidez, komunitatean gazte kolektibo hauek duten eginkizunaz eta paperaz jabetzea nahi dugu, komunitatea eraikitzen lagundu eta jarrai dezaten. Halaber, komunitateari egingo dioten ekarpen honez gain, komunitate baten parte izateak dakartzan kontzientzia eta balio inplizituak integratu eta hauek bere eguneroko bizitzara zabaltzea nahi dugu”, ondorioztatu du Berasaluzek.