Aldundiak Sorabillako bide-txirikordatzea berrantolatzeko proiektua idazketa lizitatuz, pausu berria eman du Andoaingo Hobekuntza Plan Integralaren garapenean

Bide Azpiegituretako eta Lurralde Estrategiako departamentuak lizitaziora atera du Sorabillako bide-txirikordatzea berrantolatzeko proiektuaren idazketa, N-I eta A-15 errepideak Andoainen integratzeko Hobekuntza Plan Integralaren hedapenean aurrera egitea ahalbidetuko duen urratsa, hain zuzen.

Proiektua idazteko aurrekontua 139.213,92 eurokoa da, BEZa barne, eta gauzatzeko epea zazpi hilabetekoa. Proiektuak N-I eta A-15 errepideen arteko txirikordatzea berrantolatzea planteatzen du, Sorabilla parean, maniobra konplexuak saihesteko eta trafikoa modu ordenatuagoan bideratzeko, zirkulazioaren segurtasuna eta arintasuna hobetuz zirkulazio-intentsitate handia duen tarte horretan (23.511 ibilgailu egunero N-I errepidean eta 6.747 A-15 errepidean).

Gaur egun, N-I eta A-15 errepideen arteko konexioa Iruñarako norabidean 194 metro eskaseko elkartze-tarte baten bidez egiten da. Tarte horretan bat egiten dute N-I errepidetik zirkulatzen duten eta A-15 errepidera sartu nahi duten ibilgailuek, hala nola, Sorabillatik irten eta N-I errepidera Gasteizerako noranzkoan doazenek. Errei-aldaketak egiteko erabilgarri dagoen tarte txikiak eta trafiko-intentsitate handiak arrisku-egoerak sortzen dituzte eta zirkulazioa zailtzen dute.

Proiektuaren helburua egungo txirikordatzea kentzea da, eta, horretarako, N-I errepidetik Tolosarako noranzkoan jarraitu nahi duten trafikoak eta A-15 errepidetik Iruñerako norabidean jarraitzen dutenak egungo puntua baino lehen bereiztea aurreikusten da. Horrela, A-15 errepidetik jarraitzen duten ibilbideak eta Sorabillatik N-I errepidera sartzen direnak elkartzea saihesten da.

Sorabillatik N-I errepidera eta A-15 errepidera sartzeko, Sorabillako biribilgune berriaren (gaur egun tramitazio prozesuan) adarretako batetik abiatuko da, eta N-I errepidera eta N-I eta A-15 errepideen arteko bide berrira sartzea ahalbidetuko du, behin biribilgune hori gainetik gaindituta..

Jarduketa horri esker, mugimenduak antolatu eta konexioa hobetu ahal izango da.

Andoaingo Hobekuntza Plan Integrala aurrera

Sorabillako proiektua idazteko lizitazioarekin, Aldundiak Andoaingo Hobekuntza Plan Integralaren garapena osatzen duten jarduketa guztiak jarri ditu abian, garapen teknikoaren eta izapidetzearen fasean jada, obren lizitaziorako eta ondorengo exekuziorako hurrengo urratsak planifikatzeko.