Aldundiak urtean administratiboetara bideratutako urteko 8.000 ordu baino gehiago liberatzea lortu du adimen artifiziala aplikatuz

Gipuzkoako Foru Aldundiak ERREKA izeneko sistema jarri du martxan, adimen artifizialean oinarritua, Erregistroan jasotzen den dokumentazio guztiaren sarrera optimizatzen duena. Sistema 2025eko urrian jarri zen lanean, eta automatikoki sailkatzen du sartzen den dokumentazioa % 93tik gorako zehaztasunarekin. Zeregin hori urtean 8.300 lan orduren baliokidea da. Irune Berasaluze Gobernantzako diputatuaren arabera, "inpaktu ekonomikoaz haratago, egoera horrek giza baliabide kualifikatuak zeregin errepikakorretara bideratzea eskatzen zuen. Balio handiagoko funtzioetara bidera daitezkeen orduak dira, hala nola herritarrei arreta ematera, espedienteak ebaztera edo barne prozesuak hobetzera”.

Erregistroak sailkatu egin behar dira izapidetzen hasi baino lehen, eta urteetan zehar lan horren zati garrantzitsu bat eskuz egin izan da. Egunero, Foru Erregistroak ehunka dokumentu jasotzen ditu hainbat kanaletatik: aurrez aurreko bulegoetatik, barne aplikazioetatik, online erregistro elektronikotik eta administrazioen arteko elkarreragingarritasun sistematik. Horiek guztiak sailkatu eta dagokion administrazio-unitatera bideratu behar dira izapidetzen hasi aurretik. Ohar gehienak behar bezala identifikatuta iristen badira ere, bolumen esanguratsu batek eskuzko berrikuspena eskatzen du, zeregin errepikakorra eta balio erantsi gutxikoa.

2022an soilik, adibidez, Aldundiaren Erregistroak 1.640.583 apunte kudeatu zituen guztira, eta horietatik 100.000 baino gehiago eskuz sailkatu behar izan ziren. Zeregin hori urtean 8.300 lanordu da gutxi gorabehera, hau da, urtebetean bost pertsona inguruk lanaldi osoan egiten duten lanaren baliokidea.

Berasaluzek azpimarratu nahi izan du “ERREKAk ez dituela pertsonak ordezkatzen. Sistemak sailkapen bat proposatzen du, baina azken erabakia beti administrazio-unitateei dagokie ”. ERREKA 2025eko urrian hasi zen ekoizpenean. Gobernantza departamenduko Langileen Kudeaketa izan zen sartu zen lehen unitatea, hil horren amaieran. Azaroan Mugikortasuneko eta Turismoko, Bide Azpiegituretako eta Lurralde Oreka Berdeko departamentuak batu ziren, eta 2026ko otsailean Zainketak eta Gizarte Politikak sartu dira, baita Ogasuna eta Finantzak ere.

Era berean, Berasaluzek nabarmendu du sistemaren garapena gardentasun eta partaidetza irizpideetan oinarritu dela, unitateen inplikazio zuzenarekin proba faseetan. “Epe luzerako ikuspegia argia da: ERREKA Aldundi osora zabaltzea eta automatizazio ekosistema zabalago baterantz aurrera egitea, bai barne lana, bai herritarren esperientzia hobetzeko. Adimen artifiziala kudeaketa publikoan modu seguru, kontrolatu eta erabilgarrian nola integratu daitekeen erakusten duen adibide bat da ERREKA, benetan garrantzitsua denerako denbora eta baliabideak askatzen lagunduz: herritarrei zerbitzu hobea eskaintzea".