Arrasateko Iturbide egoitzako lehen solairua zaintza eredu berrira egokitu du Gipuzkoako Foru Aldundiak
Arrasateko Iturbide egoitzako lehen solairua zaintza eredu berrira egokitu du Gipuzkoako Foru Aldundiak
Arrasateko Iturbide egoitzako lehen solairua zaintza eredu berrira egokitu du Gipuzkoako Foru Aldundiak
Arrasateko Iturbide egoitzako berritzen lanek Gipuzkoak pertsonalizazioan oinarritutako zaintza ereduarekiko duen konpromisoa berresten du; eredu honek lehentasuna ematen dio egoiliarraren bizi-kalitateari, autonomiari eta komunitateari. 1,2 milioi euroko inbertsioari esker, lehen solairua osorik egokitu da, 20 plazako espazioa eratuz 19 logelatan —18 banakakoak eta 1 bikoitza, guztiak bainugela propioarekin— eta espazio komun berriak gehituz
Gipuzkoako Foru Aldundiak eraberritze lanak egin ditu Arrasateko Iturbide egoitzan, Kabia erakunde autonomoan integratua dagoen eraikinean. Lehen solairua berritu du, lurraldean bultzatzen ari den zaintza ereduaren eraldaketa-prozesuaren baitan.
Gipuzkoako diputatu nagusi Eider Mendozak, Zainketa eta Gizarte Politiketako diputatu Maite Peñak eta Arrasateko alkate Maider Morrasek gaur bisitatu dute egoitza, esku-hartzearen emaitza bertatik bertara ezagutzeko.
Mendozak azaldu duenez, egoitza-instalazioen eraldaketaren azken helburua da “etxe giroko espazio bat sortzea”, egoiliarrak “etxean bezala” senti daitezen, “intimitate handiagoarekin” eta “berotasunetik eta komunitatearekiko loturatik abiatuta harremanak sustatuko dituen testuinguru batean”. “Udalerriz udalerri, zerbitzuz zerbitzu, Gipuzkoa osoan zabaltzen ari gara zaintza eredu berria. Horrek eragin zuzena du adinekoen ongizate integralean. Gizarte gero eta zaharrago batean, non laguntza-eskaera etengabe hazten ari den, Gipuzkoaren lehentasuna da bizitzan zehar zaintza behar duen pertsona orok —gaur edo bihar— zaintza horiek jasotzea, eta gainera kalitatezkoak izatea”, adierazi du.
Inbertsioa eta espazioaren egokitzapena
Esku-hartzeak 1.204.907,74 euroko inbertsioa izan du, eta honek ahalbidetu du zentroko lehen solairua erabat egokitzea, 126/2019 Dekretuan ezarritako irizpideen arabera. Espazio berriak 20 plaza ditu gaur egun, pertsonalizazioan oinarritutako arretaren printzipioen arabera antolatuta; 2025eko urritik dago martxan.
Berritze-lanek 19 logelatan antolatutako espazio berria ekarri dute: horietatik 18 banakakoak dira eta 1 bikoitza, guztiak bainugela propioarekin; horri esker, guztira 20 plaza eskaintzen dira eredu berrira egokituta. Solairuak, gainera, office-a duen jangela bat, terrazara irteera duten bi egongela eta jangelaren ondoan kokatutako bi komun orokor ditu. Era berean, biltegiratze-eremu bereiziak sortu dira: bata garabiak eta tamaina handiko elementuak gordetzeko, eta bestea arropa zuria eta tamaina txikiagoko materiala gordetzeko. Eremuak lehendik zeuden bi igogailuak mantentzen ditu, baita terraza ere, espazioaren antolaketa berrian integratuta.
Zaintza ereduaren eraldaketa
Esku-hartze hau Gipuzkoako Foru Aldundia lurralde osoan garatzen ari den zaintza ereduaren eraldaketa-prozesuaren baitan kokatzen da; gaur egun, 43 egoitza-zentrotan ari da jarduketak sustatzen. Kasu batzuetan, Arrasateko Iturbide egoitzaren kasuan bezala, jarduketak espazioen egokitzapen arkitektonikora bideratzen dira; beste batzuetan, eraldaketek zaintzen antolaketan, arreta-dinamiketan edo pertsonen laguntza-ereduetan eragiten dute.
Prozesu honek ez du soilik ekipamendu berriak eraikitzea edo plazak handitzea helburu, baizik eta zaintza eredu gizatiarrago, pertsonalizatuago eta komunitatearekin lotuago baterantz aurrera egitea. Pertsonan oinarritutako eredua da, egoiliar bakoitzaren bizi-ibilbidea eta behar indibidualak kontuan hartzen dituena, bizitza duinagoa, autonomoagoa eta bizi-kalitate handiagokoa sustatzeko helburuarekin.
735