Diputatu Nagusiaren Alorra
Departamentua
Elkarlanean eta etorkizunera begira aurrera egiten duen Gipuzkoa sustatu asmoz, lankidetzazko gobernantza lurralde osora eta eremu guztietara hedatzeko ari gara lanean. Pertsona erdigunean jarrita, herritar orori ongizate osoa eskainiko dien lurralde kohesionatua eraikitzeko, desberdintasun gutxikoa, ekonomia lehiakorra duena, integratzailea eta jasangarria.
Horretarako, diputatu nagusiaren alorreko lana bost zuzendaritzatan banatzen da: Hizkuntza Berdintasuna, Emakumeen eta Gizonen Berdintasuna, Giza Eskubideak eta Kultura Demokratikoa, Estrategia eta Komunikazioa.
Gipuzkoa Europa mailan erreferente izatea nahi dugu, desberdintasunen aurkako herri politiketan, dela generoaren ikuspegitik, dela hizkuntzaren ikuspegitik. Lurralde anitza eta inklusiboa, Giza Eskubideetan oinarritutako memoria eta elkarbizitza indartuko duena.
Halaber, gobernantza moduak eraldatzea dugu erronka, epe ertainera eta luzera begirako politika publikoen garapenean herritarren partaidetza indartuz eta zuzeneko komunikazioa sustatuz.
Aurrekontu partida
Diputatu Nagusiaren Alorra, 2025an , bere jardun estrategiko zein operatiborako, urteko aurrekontu hau izango du:
Aurrekontua
27.522.343 €
Exekutatua
% 43,96
Eider Mendoza Larrañaga
Gipuzkoako Diputatu Nagusia
Azpeitian (1974) jaiotako hondarribiarra. Hiru eleduna (euskara, gaztelera eta frantsesa) nahiz eta ingeleraz ere moldatzen naizen. Enpresa Zientziak ikasi nituen, Nazioarteko Merkataritzan espezializatuz, Bordeleko École de Commerce Européenne unibertsitatean. Lan ibilbidea enpresa pribatuan hasi nuen, baina laster (26 urterekin) politikara jo nuen, erakunde eremuan. Parlamentuan dut esperientzia luzea. Lehenengo Eusko Legebiltzarrean, taldeko koordinatzaile eta gizarteko politikako bozeramaile gisa arituz, eta Gipuzkoako Batzar Nagusietan gero, talde politikoa koordinatuz eta erakundeko presidentzia nire gain hartuz. Aurreko legealdian Gobernantza diputatua eta bozeramailea izan ondoren, gaur egun Gipuzkoako Diputatu Nagusia izateko ohorea dut.
Zuzendaritzak
Iosu Arraiz
Estrategia zuzendaria
Arlo hau Aldundiaren Kudeaketa Plan Estrategikoa definitzera dago bideratuta, baita bere jarraipena antolatu eta bermatzera ere.
Zuzendaritzaren webguneak
Elene Arrazola
Komunikazio zuzendaria
Gure helburua da Aldundiaren eta gizartearen arteko komunikazioa etengabekoa eta eraginkorra izatea.
Ion Gambra
Giza Eskubideetako eta Kultura Demokratikoko zuzendaria
Zuzendaritza honen xedea elkarbizitza eta Giza Eskubideak sustatzea da.
Zuzendaritzaren webguneak
Miren Garbiñe Mendizabal
Hizkuntza Berdintasuneko zuzendaria
Gure konpromisoa da euskararen normalizazioa eta erabilera bultzatzeko politikak aurrera eramatea, gizartean zein Aldundiko administrazioan.
Zuzendaritzaren webguneak
Nerea Isasi
Emakumeen eta Gizonen Berdintasunerako Organoko zuzendaria
Organo honen eginkizuna da bai gipuzkoar gizartean eta baita foru administrazioan ere gizon eta emakumeen arteko berdintasuna sustatzea.
Zuzendaritzaren webguneak
Departamentuko aktualitatea
2025/11/07
Gipuzkoak eta Kanadak harremanak estutu dituzte, etorkizuneko lankidetza bide berriak jorratuz
Eider Mendoza diputatu nagusiak lan bilera egin du gaur Kanadako ordezkaritza batekin; Kanadako lehen ministroaren Europarako ordezkari berezia, Stephane Dion, izan da kanadiar delegazioaren buru
2025/10/30
1.296 milioi euro zainketak eta etorkizuneko ekonomia bultzatzeko Gipuzkoan
Foru gobernuak 2026ko aurrekontu proiektua aurkeztu du, “Gipuzkoa indartzeko, gaurko eta biharko ongizate integrala bermatzeko”, adierazi du Eider Mendoza diputatu nagusiak. Aldundiak gizarte politikako aurrekontua 600 milioi eurora arte indartzea aurreikusten du, gizarte azpiegitura berriak sortzeko, zainketen eraldaketan aurrera egiteko eta gizarteratzea, osasun mentala eta nahi ez den bakardadea bezalako errealitate sozialei erantzuteko. Sustapen Ekonomikoak 76 milioi izango ditu berrikuntza eta industria sektore emergenteak sustatzeko, eta ETEen lehiakortasuna ziurgabetasunetik babesteko.
2025/10/28
Foru Aldundiak ‘Gipuzkoa Zainduz’ abiatu du, Gipuzkoako gizarte-azpiegiturak hedatzeko tresna berria
Foru-sozietate berriak aukera emango du zainketen eta gizarte-babesaren arloan inbertsio estrategikoak egiteko, lankidetza publiko-sozialerako formulak bultzatuz, betiere lidergo publikoa bermatuz. Mendekotasuna duten adinekoen kopuruak %26 gora egitea aurreikusten da 2030era bitartean, eta ‘Gipuzkoa Zainduz’en helburua da errealitate horri erantzuna ematea. Egungo estaldura bermatzeko, lurraldeak gutxienez 757 egoitza-plaza berri sortzea aurreikusten du data hori baino lehen. Aldundiaren hasierako ekarpena 51 milioi eurokoa izango da, eta horri esker, eta sei sozietate misto eratzearekin batera, 100 milioi euro inguruko inbertsio osoa izango da 2025 eta 2029 bitartean. Epe motzean sozietate mistoak eratzeko lehen deialdiak egingo dira bizitegi-estaldura txikiena duten sei eskualdetan: Buruntzaldean, Debabarrenan, Oarsoaldean, Tolosaldean, Urola Garaian eta Urola Kostan.