Donostia kuantikaren eta adimen artifizialaren epizentro global bihurtuko da, CDL mentorizazio eta azelerazio programan parte hartzen duten nazioarteko 26 startupekin

Abenduaren 15ean eta 16an, Miramar Jauregian, eremu kuantikoko eta adimen artifizialeko startupetarako mentorizazioko eta azelerazioko programa globalaren bigarren saioa egingo da, Creative Destruction Lab (CDL) deep tech arloko nazioarteko erreferente handienetako batek bultzatuta.

Jardunaldi horietan, teknologia kuantikoen 11 startupek –Estatu Batuetatik, Kanadatik eta Europatik etorriak– eta adimen artifizialeko 15 startupek –guztiak Europakoak, horien artean lau EAEkoak– beren proiektuak azaldu eta defendatuko dituzte enpresa-eskalagarritasunean adituak diren mentore zientifikoen nazioarteko batzorde baten aurrean. Panelak proposamen bakoitzaren inpaktu-, berrikuntza- eta eskalagarritasun-potentziala ebaluatuko du, CDLren bereizgarri den prozesu gutiz selektiboari jarraituz.

CDL Donostiak funtsezko bi programa bultzatzen ditu: bata teknologia kuantikoei buruzkoa eta bestea adimen artifizialari buruzkoa. Quantumeko programa CDL Quantum nazioarteko sarean sartzen da, eta Calgary, Toronto eta Montrealgo nodoekin batera jarduten du; AAko programa, berriz, Donostia eta Bartzelona artean koordinatuta garatzen da. Apustu bikoitz horri esker, Donostiak indartu egiten du bere zeregin estrategikoa, eta lagundu egiten du Gipuzkoa Europako erreferente bihurtzen deep tech arloan.

Donostiako berrikuntza ekosistemak ateak irekiko dizkie lider zientifikoek lagunduta "milia kuantikoa" bisitatuko duten startupei.

Abenduaren 16an, asteartean, kuantikako programan parte hartzen duten startupek Donostiako "milia kuantikoa" delakoa bisitatuko dute, eta DIPC, Ikerbasque eta CIC Nanoguneren instalazioak ikusiko dituzte, ordezkaritza instituzional batekin batera. Honako hauek osatuko dute ordezkaritza hori: Unai Andueza, Gipuzkoako Foru Aldundiko Ekonomia Sustapeneko eta Proiektu Estrategikoetako diputatua; Adolfo Morais, Eusko Jaurlaritzako Zientzia eta Berrikuntzako sailburuordea; Javier Aizpurua, BasQ-ko zuzendaria; Ricardo Díez, DIPCko zuzendaria; eta José María Pitarke, CIC Nanoguneko zuzendaria.

Unai Andueza diputatuak azpimarratu du programak garrantzi estrategikoa duela eta Gipuzkoak lidergoa duela oinarri kuantikoko eta adimen artifizialeko enpresak sortzeko. Azaldu duenez, ordenagailu kuantikoa instalatzea eta mundu mailan erreferentziazkoak diren CDL bezalako mentorizazio eta azelerazio programak iristea "ez dira kasualitateak", aldiz, islatzen dute "gure erakundeek aurrea hartzeko duten estrategia bat, lehen mailako azpiegitura zientifiko batean oinarritua". Adierazi duenez, "punta-puntako ikerketa zentroak, unibertsitate-sare sendoa eta BIC Gipuzkoa bezalako erakundeak ditugu, eta funtsezkoak dira enpresa berriak garatzeko eta finkatzeko". Gainera, inplikatutako eragile guztien elkarlanari balioa eman dio, eta honako hau nabarmendu du: "benetan garrantzitsua da abangoardian kokatzea, etorkizuneko sektoreen zumeak sortzea eta, nola ez, balio handiko sektoreak eta lanpostuak sortzea, talentua erakartzera eta atxikitzera eramango gaituztenak". Horrek guztiak, amaitzeko, aukera ematen dio Gipuzkoari “gaur egun Europako abangoardian kokatzeko teknologia kuantikoetan eta adimen artifizialean”.

Finkatutako ekosistema zientifiko eta teknologikoak Gipuzkoa Europako erreferente bihurtzen du kuantikan, adimen artifizialean eta balio erantsi handiko etorkizuneko sektoreetan.

Mentorizazioko eta azelerazioko programa horrek indartu egiten du Euskadik teknologia aurreratuetan duen nazioarteko posizionamendua, eta Gipuzkoa balio erantsi handiko industria sortu berri baten nodo estrategiko gisa kokatzen du, ezagutzari, zientziari eta berrikuntzari estuki lotuta dagoena.

2025eko uztailetik, CDLk Gipuzkoaren lidergoa sustatzen du teknologia kuantikoetan, BIC Gipuzkoarekin eta IESE Business Schoolekin lankidetzan. CDL Donostia 2025eko irailean hasi zen lanean, Tandem eraikinean, Miramongo Euskadiko Teknologia Parkean. Funtsezko azpiegitura horrek lurraldearen estrategia indartzen du kuantikaren eta adimen artifizialaren Europako nodo nagusi bihurtzeko, teknologia aurreratuetan nazioarteko erreferentzia gisa duen posizioa sendotuz.