Gipuzkoako Ganberak eta Foru Aldundiak enpresen nazioartekotzea bultzatzeko misio estrategiko bati ekin diote Marokon

Gipuzkoako Ganberak eta Gipuzkoako Foru Aldundiak misio estrategiko bati ekin diote gaur Marokon, eta bertan izango dira eta apirilaren 30era arte (osteguna). Bidaia Casablanca eta Tánger-Kenitra eskualdeetara egingo da, herrialdeko ekonomia eta industria motor nagusietako bi baitira.

Azken urteotan, Maroko Afrika iparraldeko merkatu estrategiko gisa finkatu da; izan ere, industria asko hazi da eta funtsezko kokapen geografikoa du, Europa eta Afrika arteko zubia baita. Automobilgintzaren, aeronautikaren, energia berriztagarrien, logistikaren edo azpiegituren sektoreek interes eta lankidetza aukera bereziak dituzte Gipuzkoako enpresa sarearentzat, bai inbertsioari dagokionez, bai industria lankidetzari eta negozio garapenari dagokienez.

Misioan parte hartzen duten 20 enpresak honako hauek dira: Talleres Arreche, Silam, Ibarmia, Algeposa, Euskabea, Gurelan, Cauchopren, Likale, Elay, Echemar, Iraupen, Arina, Elmubas, Oilgear, Safeloc, Ulma Handling, Erlo, Jamai, Fagor Arrasate eta Andrés Eizaguirre. Sektore desberdinetako enpresak dira, eta nabarmentzekoa da arlo multisektorialeko eta automobilgintzako enpresen presentzia, baita siderurgiarekin, aeronautikarekin eta industria azpikontratazioarekin lotutako beste batzuk ere.

Ordezkaritza honako hauek osatuko dute: Gipuzkoako Foru Aldundiaren aldetik, Unai Andueza Ekonomia Sustapeneko eta Proiektu Estrategikoetako diputatuak eta Amaia Arregi Ekonomia Sustapeneko zuzendari nagusiak; eta Gipuzkoako Ganberaren aldetik, Mauricio Arregui presidenteak, Javier Zubia zuzendariak, eta nazioartekotze taldeko kideek: Javier Ayala, Iñigo Usandizaga eta Gorka Goikoetxea.

Datozen egunetako lan agendaren helburuak izango dira Gipuzkoako enpresek gure mugetatik kanpo egiten duten lana sustatzea, eta egunetik egunera hazten ari den merkatu estrategiko horretan lankidetza eta negozio aukera berriak identifikatzea:

Apirilaren 27an, astelehenean, Casablancan egongo dira Gipuzkoako ordezkariak, eta bilerak izango dituzte bertako enpresa eta erakunde eragile nagusiekin, hala nola Marokoko Enpresen Konfederazio Orokorrarekin, AMICArekin eta Espainiako Ganberarekin, bai eta Ekonomia eta Merkataritza Bulegoarekin ere.

Apirilaren 28an, asteartean, Tangerrera abiatuko da misioa. Han, STELLANTIS eta RENAULT industria instalazio handiak ikustera joango dira, eta bilerak egingo dituzte Tangerren dagoen Espainiako Ganberarekin eta Inbertsioen Eskualde Zentroarekin, inguru horretako industria sarearekiko zuzeneko harremana indartzeko.

Apirilaren 29an, asteazkena, berriz ere Casablancan, agendak balio erantsi handiko sektore estrategikoak izango ditu ardatz; aeronautika- eta espazio-sektoreko GIMAS Elkartea bisitatuko dute eta baita IRIZAR enpresaren planta ere, nazioartean presentzia handia duen lurraldeko industria erreferentea.

Apirilaren 30ean, ostegunean, Casablancan, ordezkaritzak bilerak egingo ditu erreferentziazko bulego eta enpresekin, hala nola GARRIGUES eta CAMPEZOrekin, eta, horrela, bukatutzat emango da lankidetzara, inbertsiora eta negozio aukera berriak irekitzera bideratutako misioa.

Programatutako bilera eta bisita horiek Gipuzkoako enpresen lehiakortasuna hobetzeko lagungarri izango dira, eta ezagutza eta tresnak emango dizkiete enpresei nazioarteko merkatuetan, besteak beste, Marokon -eta etorkizunean beste herrialde batzuetan- ezartzeko, bertako enpresekin lankidetzan aritzeko edo jarduera garatzeko.