Mugikortasuneko, Turismoko eta Lurralde Antolaketako Departamentuak Lurraldebusek Zaldibian duen zerbitzua hobetuko du, Ordizian ikasten ari diren gazteek institututik itzultzeko erraztasun gehiago izan ditzaten

Mugikortasuneko, Turismoko eta Lurralde Antolaketako Departamentuak Lurraldebuseko zerbitzua doituko du Zaldibian, egunero institutura Ordiziara joaten diren gazteek erraztasun handiagoak izan ditzaten eskolak amaitu ondoren etxera itzultzeko.

Azahara Domínguez diputatuak azaldu duenez, datorren astelehenetik, martxoak 2tik aurrera, GO01 (Zegama>Zaldibia) lineak zerbitzu berri bat eskainiko du 15:30ean Ordizian astelehenetik ostiralera. Horri esker, ikasle horiek etxera itzuli ahal izango dira, autobusaren zain hainbeste denbora egon beharrik izan gabe.

Mugikortasuneko, Turismoko eta Lurralde Antolaketako foru arduraduna herriko guraso talde batekin bildu da astearte honetan. Guraso horiek eskaera helarazi zioten Departamentuari, eta, dagokion azterketa teknikoa egin ondoren, datorren martxoaren 2tik aurrera eskatutakoari erantzuna emango zaio. Gipuzkoan, garraio publikoaren erabilera maximo historikoetan dago, zerbitzua herritarren benetako beharretara egokitzeko egiten ari garen ahaleginagatik, batez ere herri txikietan. Zaldibian egingo dugun doitze horri esker, herriko gazteek askoz zerbitzu erosoagoa izango dute, askoz ere denbora gutxiago itxaron beharko dute, eta, beraz, gazteen autonomia eta independentzia sustatzeaz gain, gazte-gaztetatik jasangarriagoak diren mugikortasun-ohiturak finkatzeko aukera izango dugu", adierazi du Azahara Domínguezek, eta azpimarratu du "entzute aktiboa funtsezkoa dela egunero garraio publikoko zerbitzu hobea eskaintzeko".

Ildo horretan, diputatuak alegatu du "jendearen beharrei benetan erantzungo dien zerbitzua" eskaini behar dela, "batez ere udalerri txikienetan". "Zerbitzu erabilgarria bermatzea udalerri horien etorkizunaren alde egitea da, belaunaldi gazteek kanpoan etorkizunik landu behar ez izateko lan egitea da eta, beraz, despopulazioaren aurka borrokatzea eta, beraz, Gipuzkoaren alde egitea da", adierazi du.

Zaldibiako guraso talde honek eskerrak eman dio diputatuari beren egoerari emandako erantzunagatik: “Gure seme alabak eskola orduak bukatu eta etxera garaiz iristeko eskaerari erantzuna eman dio Foru Aldundiko Mugikortasuneko departamentuak eta esker hitzak besterik ez ditugu. Tarte hau baliatuz batez ere herri txikietako biztanleak bultzatu nahi genituzke beraien beharren berri Foru Aldundiari helarazi eta konponbidea aurkitzeko laguntza eskatuz".