Mugikortasuneko, Turismoko eta Lurralde Antolaketako Departamentuak Oñatiko Turismo bulego berriaren obrak lizitatu ditu

Mugikortasuneko, Turismoko eta Lurralde Antolaketako Departamentuak Oñatiko turismo-bulego berriaren obren lizitazioa abiatu du. Bulego hori Sancti Spiritus unibertsitatean kokatuko da. Azahara Domínguez diputatuak astearte honetan azaldu duenez, lizitaziorako oinarrizko aurrekontua milioi bat eurokoa da (1.008.060,57 €), eta obrak egiteko epea sei hilabetekoa izango da, behin obrak esleituta.

Foru Aldundiko arduradunak gogorarazi duenez, jarduera horiek Oñatiko unibertsitatearen birgaitze-proiektuaren bigarren fasean sartzen dira. Fase horren lehen etapa, kanpoko fatxadak, klaustroa eta eraikinaren estalkia zaharberritzea, urtarrilean bertan hasi zen, eta lanak udazkenera arte luzatzea aurreikusten da.

Bigarren fase honetan (lehen aipatutako lanekin gainjarriko da), herriko turismo-bulego berria egokitzeko obrak egingo dira. Udalak kudeatuko du bulego hori, eta, horrez gain, irisgarritasun-jarduketa batzuk egingo dira, hala nola eskailera berri bat prestatzea eraikinaren segurtasuna hobetzeko, eta igogailu berrirako espazioa prestatzea, irisgarritasuna bermatzeko eta, beraz, eraikinaren erabilera demokratizatzeko, gaur egun dauden oztopo arkitektonikoak gaindituz. Era berean, larrialdi-irteera berriak egokituko dira, eta espazio horrek izango dituen aireztapen- eta klimatizazio-beharrei erantzuteko instalazioetarako espazioak ere jarriko dira. Azahara Domínguezek zehaztu duenez, proiektu horrek Espainiako Gobernuaren finantzaketa jaso zuen 2024ko azaroan, Berreskurapen, Eraldaketa eta Erresilientzia Planaren bidez. Laguntza horiek erabilera publikoko espazioak sortzea behartzen zuen, hala nola turismo-bulegoa.

"Oñatin egiten ari garen jarduera integralari esker, Gipuzkoako balio historiko eta artistiko handienetako bat berreskuratzeaz gain, bisitarien fluxuetan oreka handiagoa bilatzen duen gure apustu turistikoan sakondu ahal izango dugu. Turismo bulego berri honekin, Debagoienak gordetzen dituen baliabide turistikoak sustatuko ditugu eta, ondorioz, eskualdean aberastasuna sortuko dugu", adierazi du Azahara Domínguezek, eta gogorarazi du Sancti Spiritus Unibertsitatea, gaur egun Administrazio Publikoaren Euskal Institutua eta Soziologia Juridikoaren Nazioarteko Institutuaren egoitza dena, Euskadiko errenazimenduaren harribitxietako bat dela. Rodrigo Mercado de Zuazola gotzainak bidali zuen eraikitzera XVI. mendean, eta bere elementurik aipagarrienetako bat plateresko estiloko fatxada dotorea da. Nabarmentzekoa da, halaber, kasetoi mudejarra, Euskadin oso ohikoa ez dena, Gijabak Avilan haritz-egurrez egina; Errenazimentuko klaustro tipikoa, bi solairukoa, zirkuluerdiko arkuekin eta 32 medailoiekin; edo kaperako erretaula platereskoa, Pierres Picart eskultore frantziarrak egina