Mugikortasuneko, Turismoko eta Lurralde Antolaketako Departamentuak udalerri txikiekin duen konpromisoa indartzen du, beren hirigintza-plangintzan aurrera egin dezaten laguntzen lerroa zabalduz

Mugikortasuneko, Turismoko eta Lurralde Antolaketako Departamentuak indartu egin du udalerri txikiekiko konpromisoa, eta % 10 handitu du 7.000 biztanle baino gutxiago dituzten udalerriek beren hirigintza-plangintzan aurrera egin dezaten bideratutako laguntza-lerroa, iraunkortasuna, hiri-berroneratzea edo klima-aldaketa bezalako erronka garrantzitsuak kontuan har ditzaten, besteak beste, udal-plangintzan.

Azahara Domínguez diputatuak prentsaurrekoa eskaini du asteazken honetan, Martin Aramendi eta Haritz Alberdi Ataungo eta Getariako alkateekin batera, hurrenez hurren.

Azaldu duenez, laguntza horiek udalerri horiek beren gain hartu behar duten hirigintza-dokumentua idazteko gastuen zati bat estaltzen dute. Udalerriek ekitaldian eragindako gastuen % 50 lor dezakete gehienez. Ehuneko hori % 75era igotzen da 2.500 biztanletik beherako udalerrien kasuan, eta % 90era 500 biztanletik beherako udalerrien kasuan. Nolanahi ere, ezarritako gehieneko muga 30.000 eurokoa izango da.

Azahara Domínguezek nabarmendu du laguntza horiek garrantzi handia dutela udalerri txikientzat, eta nabarmendu du "helburua dela herri guztiek, dimentsioa kontuan hartu gabe, etorkizuneko ikuspegidun hiri-garapena planifikatzeko beharrezko baliabideak izatea". Ildo horretan, azpimarratu du beharrezkoa dela "hirigintza-eredu inklusiboak, iraunkorrak eta ingurunea errespetatzen dutenak sustatzea, herritarren bizi-kalitatea modu ukigarrian hobetzeko gai direnak". Era berean, gogorarazi duenez, "udalerri horietako askok ez dute plangintza-prozesu konplexuei beren kabuz ekiteko baliabide tekniko edo ekonomiko nahikorik, eta horrek ekimen estrategikoak bultzatzeko gaitasuna mugatu dezake".

Horregatik, laguntza horiek "funtsezkoak" dira "desberdintasunak saihesteko eta udalerri bakar bat ere atzean gera ez dadin bermatzeko". "Administrazio-egitura murritzak dituzten udalez ari gara, giza eta finantza-baliabideak mugatuak dituzten udalez, proiektu jakin batzuk abian jartzea zailduz. Horregatik, horrelako laguntzek aukera ematen dute plangintza-tresnak idazteko, berrikusteko eta egungo erronketara egokitzeko, hala nola ingurumen-jasangarritasunera, klima-aldaketaren aurkako borrokara edo degradatutako hiri-espazioen berroneratzera", zehaztu du diputatuak.

Gainera, Azahara Domínguezek azpimarratu duenez, "hirigintza-plangintza eguneratua izatea funtsezkoa da, lurraldea antolatzeko ez ezik, eskura dauden baliabideen erabilera optimizatzeko, gizarte-kohesioa indartzeko eta tokiko ekonomia dinamizatzeko ere. Herritarren eguneroko bizitzan eragin zuzena duen tresna estrategikoa da, ingurune bizigarriagoak, orekatuagoak eta erresilienteagoak sortzen laguntzen baitu. Horregatik, hirigintza udalerri txikienetara hurbiltzeko politikak bultzatzen jarraitzen dugu, Gipuzkoaren egungo eta etorkizuneko garapenean duten funtsezko eginkizuna aitortuz ".

Hamar onuradun 2025ean
Diputatuak azaldu duenez, laguntza horrek babes handia jaso du legegintzaldi honetan, eta laguntza horren zenbatekoa ia % 40 handitu da. Horri esker, 2024an zazpi udalerrik jaso ahal izan zuten dirulaguntza hori, baina iaz hamar izan ziren onuradunak, eta aurkeztutako eskaera guztiei erantzun zitzaien. Zehazki, Alkiza, Altzaga, Ataun, Baliarrain, Getaria, Larraul, Lizartza, Mutiloa, Orio eta Orexak jaso zuten laguntza hori.

Martin Aramendi eta Haritz Alberdi Ataungo eta Getariako alkateek, hurrenez hurren, laguntza hauek euren herrietan duten garrantzia azaldu dute:

Aramendik azaldu du "Ataunek 2005ean onartutako plangintza zeukan indarrean, eta aurreko legealdian ohartu ginen zaharkituta zegoela eta ezinbestekoa genuela arau horiek berritzea. Herri txikia gara biztanlez, baina handia hedaduraz, eta HAPOa berritzea inbertsio oso handia da guretzat, guztira 300.000 inguru kostatuko baitzaigu”. “Hori dela eta, behar-beharrezkoa dugu Foru Aldundiaren laguntza. Bestela, ezingo genuke pare bat urtetan bestelako inbertsiorik egin", gehitu du. 

Bestalde, Alberdik honako hau esan du: “Getariako Udalak Hiri Antolamenduko Plan Orokorra (HAPO) eguneratzeko prozesua 2025an hasi zuen eta lanketa honekin 2008ko araudia gaur egungo beharretara eta etorkizuneko erronketara egokitze da nahia. Eguneratuta egon behar duen tresna bat, ezinbestekoa dena, eta Getariako Udalaren apustu bat izan da hau aurrera eramatea, baita ekonomikoa ere”. “HAPOak herriaren etorkizuna marraztuko du eta beraz, belaunaldi desberdinen egunerokoa. Lanketa hau egitea, eta ondo egitea, ekarpen ekonomiko garrantzitsua egitea suposatzen du eta diru-laguntzek arintzen dute herri txikiok dugun aurrekontu mugatua. Diputatuarekin konpartitu dugun ideia izan da ere, diru-mugei buelta bat ematea; HAPOen lanketak azken urteetan asko igo baitira”, amaitu du.

Interesa duten udalek hilabeteko epea izango dute gaurtik aurrera eskabideak aurkezteko, eta Gipuzkoako Foru Aldundiaren egoitza elektronikoan aurkeztu ahal izango dituzte (https://egoitza.gipuzkoa.eus).