Mugikortasuneko, Turismoko eta Lurralde Antolaketako diputatu Azahara Domínguezek turismoa Gipuzkoako enpleguaren motor gisa sendotzea ospatu du

Mugikortasuneko, Turismoko eta Lurralde Antolaketako diputatu Azahara Domínguezek ospatu egin du turismoa Gipuzkoako motor ekonomiko gisa finkatu izana. Hala adierazi du foru-arduradunak Euskal Estatistika Erakundeak (Eustat) egindako Turismoaren Kontu Satelitearen berri izan ondoren. Kontu horrek jakinarazi du turismo-industria BPGren %8,7 dela jada gure lurraldean.

"Turismo-industria gure lurraldeko enplegu- eta aberastasun-iturri nagusietako bat da, eta, beraz, zaindu egin behar dugu, familia askoren sostengua baita", baieztatu du Azahara Domínguezek, eta azpimarratu du bere departamentuak aurten onartutako Turismoko Plan Estrategikoaren zutabeetako bat dela, hain zuzen ere, turismoak kalitatezko enplegu egonkorrak sor ditzan zaintzea. "Gipuzkoan urte asko daramatzagu turismo eredu jasangarri baten alde lanean; baina hori bakarrik posible izango da sortzen den lana ere halakoa bada", esan du, eta gogorarazi du gure lurraldea aitzindaria dela industria horretan lan egiten dutenen ongizatea zaintzen, Estatuan aitzindariak diren eta "jarraitu beharreko bidea markatzen duten” bi hitzarmenekin (ostalaritzakoa eta ostatuena).

Ildo horretan, diputatuak gogorarazi du bere departamentuak sektorea profesionalizatzen lagunduko duela, profesionalen prestakuntza sustatuz, "lurraldean zehar banatutako ikastaro eta prestakuntza katalogo bat bultzatuz, sektoreko elkarteekin lankidetzan", departamentuak berak gidatuta, turismoko HUBren bidez.

"Identifikatzea nahi dugun balioekin bat datorren eredu turistiko iraunkorra eraikitzeko modua da, gure lurraldea zaintzeaz gain, turismoa posible egiten duten pertsona guztiak ere zaintzea, eta, horretarako, industria honetan lan egiten duten pertsonen lan-baldintzak zaindu behar dira. Horregatik, lanean jarraituko dugu turismoak gure lurraldeko eskualde guztietan kalitatezko enplegua sortzen jarrai dezan", amaitu du.

Funtzionatzen duen estrategia
Diputatuak gogorarazi duenez, aurten turisten etorrera % 2,2 hazi da. Hazkunde hori "apirilean, maiatzean eta ekainean kontzentratu da bereziki", eta horrek "udako denboraldia luzatzea ahalbidetzen du".

Gainera, "Donostian zifrak egonkor mantentzen diren bitartean, Gipuzkoan gora egiten ari dira, gero eta bisitari gehiago iristen dira gure herrietara esperientzia berrien bila", eta horrek "agerian uzten du egiten ari garen desestazionalizazio eta deslokalizazio estrategiak funtzionatzen duela", baloratu du.
Halaber, merkatu tradizionalak "finkatuta dauden bitartean, Gipuzkoa publiko berri oso interesgarriei irekitzen ari zaie, adibidez, iparramerikarrari, 2025ean % 17 hazi baita", esan du diputatuak, eta turista horiek batez beste 7,7 gaueko egonaldia dutela eta eguneko batez besteko gastua 300 eurotik gorakoa dela gogorarazi du.