Aldundiak argi berdea eman dio Lasarte-Oria eta Urnieta lotuko dituen bidegorriari
Gipuzkoako Foru Aldundiaren Gobernu Kontseiluak mugikortasun jasangarriko azpiegitura estrategiko honen proiektua onartu du, eta laster 1,6 milioi euroko aurrekontuarekin lizitatuko da.
Bidegorri berri honek Urnieta Donostiako erdigunearekin lotuko du, mugikortasun jasangarriagoa eta egunerokoa bultzatuz.
Gipuzkoako Foru Aldundiko Gobernu Kontseiluak gaur onartu du Lasarte-Oria eta Urnieta lotuko dituen bidegorria eraikitzeko proiektua, Jasangarritasun Departamentuak bultzatutako azpiegitura estrategikoa. Proiektuak 1.598.402,43 euroko oinarrizko lizitazio-aurrekontua eta 8 hilabeteko gauzatze-epea ditu, eta laster lizitatuko da.
Proiektuaren helburua mugikortasun aktiboa sustatzea eta garraio motordunari lotutako emisioak murriztea da, herritarrei modu eroso, seguru eta jasangarrian mugitzeko modu berriak erraztuz.
Jose Ignacio Asensio diputatu nagusiorde eta Jasangarritasun diputatuak nabarmendu duenez, “proiektu hau onartzeak aukera ematen digu beste urrats bat emateko mugikortasun eredu garbiago, osasungarriago eta konektatuago baterantz. Bidegorri honek bi udalerri lotzen ditu eta oinezkoentzako eta bizikletentzako mugikortasun aukera berriak irekitzen ditu Buruntzaldea eskualde osoan”.
Bidegorriaren trazatua 1,2 kilometroko luzeera izango du, eta Azkorteko bidearen (Lasarte-Oria) eta Urnietako bide-sarearen artean egingo da, Plazaolako trenbide zaharraren zati bat aprobetxatuz. Azpiegitura paisaia-integrazioko, eraginkortasuneko eta segurtasuneko irizpideekin diseinatuta dago.
Ibilbidea hiru sektoretan banatzen da:
• 1. sektorea: Azkorteko bidetik tunelaren iparraldeko ahoraino (224,9 metro), trenbide-plataformaren gainean.
• 2. sektorea: Plazaola tuneletik igarotzea (542 metro). Tunela drainaduraz eta argiztapenaz indartu eta egokituko da.
• 3. sektorea: tunelaren hegoaldeko ahoa Urnietako udal-sareraino (502 metro).
Tunela berregokitzeaz gain (gaur egun txanpiñoiak hazteko erabiltzen da), proiektuak zoladura irisgarria, drainatze eraginkorra, argiztapen modernoa eta txirrindularientzako eta oinezkoentzako berariazko seinaleak aurreikusten ditu.
Bidegorriari esker, gainera, Plazaolaren ibilbidea berreskuratzen jarraituko dugu, udalerriarteko bizikleta-korridore gisa, Donostia eta Iruñea lotzen lagunduz eta Gipuzkoako bizikleta-bideen sarea handituz.
Hurrengo urratsak
Proiektua onartzearekin batera, lizitazioa hurrengo hilabeteetan abiarazteko behar den izapidetze tekniko eta administratiboko prozesua irekiko da orain. Lanak aurten bertan has daitezke.
Proiektu honek indartu egiten du Gipuzkoako Foru Aldundiak mugikortasun jasangarri, seguru eta osasungarriarekin duen konpromisoa, lurraldeko ingurumen eta klima erronkekin bat datorrena.