Amasa-Villabona eta Irura lotzen dituen bidegorri berria inauguratu da, Tolosaldean mugikortasun jasangarri eta segurua sustatuz
Amasa-Villabona eta Irura lotzen dituen bidegorri berria inauguratu da, Tolosaldean mugikortasun jasangarri eta segurua sustatuz
Jarduketak, Gipuzkoako Foru Aldundiko Jasangarritasun Departamentuak bultzatuta, 3,17 milioi euroko azken aurrekontua du, eta azpiegituraren
segurtasuna, funtzionaltasuna eta jasangarritasuna hobetzeko aldaketa tekniko garrantzitsuak sartu ditu.
Bidegorri berriak Amasa-Villabonaren eta Iruraren arteko lotura indartzen du, eta mugikortasun seguruagoa, irisgarriagoa eta jasangarriagoa
errazten du eguneroko joan-etorrietarako, industria-eremuetarako sarbiderako eta herritarren aisialdirako.
José Ignacio Asensio: “Bidegorri honen inaugurazioarekin, Amasa-Villabona eta Irura arteko lotura indartu dugu, eta Tolosalde osoan mugikortasun berdeago, seguruago eta konektatuago baterantz goaz, eguneroko joan-etorriak eta aisialdikoak erraztuz, eta CO2 emisioak murrizten lagunduz”.
José Ignacio Asensio Jasangarritasuneko diputatuak, Beatriz Unzue Amasa-Villabonako alkate eta Gorka Murua Irurako alkatearekin batera, bi udalerriak lotzen dituen bidegorri berria inauguratu du gaur. Azpiegitura hori funtsezkoa da mugikortasun aktiboa, jasangarria eta segurua sustatzeko, bai eguneroko joan-etorrietarako, bai aisialdirako.
Jarduketak 3.177.000 euroko azken aurrekontua izan du, hau da, % 32ko hazkundea hasierako aurrekontuarekin alderatuta, azpiegituraren segurtasuna, funtzionaltasuna eta jasangaritasuna bermatzeko beharrezkoak diren aldaketa tekniko garrantzitsuen ondorioz.
Jasangarritasuneko diputatu José Ignacio Asensiok azpimarratu duenez, “bidegorri hau azpiegitura estrategikoa da mugikortasun-eredu garbiago, seguruago eta irisgarriago baterantz aurrera egiteko. Bizikletaren eta oinezko joan-etorrien aldeko apustua egitea osasunaren, lurralde-kohesioaren eta klima-aldaketaren aurkako borrokaren aldeko apustua egitea da”.
Ibilbide berriak 1,83 kilometro inguruko luzera du, eta Amasa-Villabona eta Irura lotzen ditu ibilbide seguru eta irisgarri baten bidez. Ibilbide hori lurraldeko bizikleta-sarean integratzen da, eta hiriguneen, industrialdeen eta hezkuntza-ekipamenduen arteko lotura errazten du.
Azpiegituraren segurtasuna eta integrazioa hobetzeko aldaketa teknikoak
Obrak egin bitartean, egiturazko aldaketak egin behar izan dira, lehendik zeuden
zerbitzuei eragitearen ondorioz, eta horrek proiektuaren zenbait elementu sakon berrikustea ekarri du.
Zehazki, pasabidea aldatu eta berriz kalkulatu da, eta, ondorioz, kostua handitu egin da; gurutzatze-pasabideko pilareak birkokatu dira, eta bi arrapalen abio-hormak aldatu dira; azkenik, lauza irtenak egin dira. Jarduketa horiei esker, azpiegitura ingurunera hobeto egokitu da, eta segurtasun-estandar handienak bermatu dira.
Mugikortasun jasangarriaren zerbitzura dagoen azpiegitura
Bidegorria gasolindegitik eta Amasa-Villabonako beilatokitik igarotzen da, 34. industrialdea eta Ibaiondo zeharkatzen ditu, eta Irurako eskolara eta udalerriko herrigunera iristen da. Trazadurak bizikleta eta oinezkoen arteko tarte partekatuak eta tarte bereiziak konbinatzen ditu, eta arrapalak eta N-1 errepidea segurtasunez gurutzatzeko pasabide bat barne hartzen ditu.Bestalde, Amasa-Villabonako alkate Beatriz Unzue andreak azpimarratu duenez, Amasa-Villabona eta Irura lotzen dituen bidegorri berriak “bi herrien arteko mugikortasun aktibo eta jasangarria errazten duela, eta lanera bizikletaz joateko aukera erreala eskaintzen duela”. Halaber, azpiegiturak osasunean eta N-1eko trafikoa murriztean duen eragin positiboa azpimarratu du, eta Udalak Jasangarritasaun Departamentuarekin lankidetzan jarraitzeko borondatea berretsi du, bidegorri sare jarraitu eta ondo konektatu baten alde aurrera egiteko.
Irurako alkate Gorka Muruak adierazi duenez, “gaurko egunean, Tolosaldeko eskualdeak aspaldi eginiko eskaerarentzat egun garrantzitsua da. Irurarrek eta
eskualdeko gainontzeko herritarrek, bizikletaren bidez mugitu ahal izateko azoiegitura berri bat martxan jartzen baita. Amaiera baten aurrean ez gaudela ulertzen dugu, eskualdeko mugikortasun jasangarriaren aldeko beste pauso garrantzitsu baten aurrean baizik. Erakunde desberdinen arteko lankidetza ona izan da eta hori, ere, zoriontzekoa dela azpimarratuko nuke. Gaurko eguna aprobetxatuz, bizikletaren erabilera sustatzen jarraitzeko eta tokiko sarea indartzeko konpromisoa berresten dugu”.
Europako finantzaketa eta deskarbonizazioarekiko konpromisoa
Obra Jasangarritasun Departamentuak finantzatu du, eta Europar Batasuneko EGEF funtsen bidez kofinantzatu da, mugikortasun jasangarriagoarekiko eta garraioaren deskarbonizazioarekiko konpromisoa indartuz.
Jarduketa hori Bizikleta Bideen Lurralde Plan Sektorialean eta Donostia eta Beasain lotzen dituen I-3 ibilbidean sartzen da, eta bizikleta-sare jarraitua, segurua eta konektatua lortzen laguntzen du.
Bidegorri honen inaugurazioarekin, beste urrats bat eman da mugikortasun-eredu osasungarriago, irisgarriago eta ingurumenarekiko errespetutsuago baterantz, jasangarritasunaren eta lurralde-kohesioaren helburuekin lerrokatuta.
Entzun José Ignacio Asensio Jasangarritasuneko Diputatuaren hitzak:
Villabona-Irura, 2026ko urtarrilaren 23a