Ibawa kolektiboak Gaua proiektua landuko du Dantzagunean egoitza artistiko baten bidez

Martxoaren 9tik 13ra, Ibawa kolektiboak Gaua sorkuntza-prozesuaren egonaldia egingo du Dantzagunean, Karrikanekin lankidetzan.

Gipuzkoako Dantzaguneak Ibawa kolektiboa hartuko du martxoan, bere sorkuntza berrian sakontzeko helburuarekin. Gaua izeneko pieza hau memoria, erresistentzia eta askatasuna bezalako kontzeptuen inguruko ikerketa koreografikoa da, lau dantzariren bidez energia kolektibo eta dardarkari batetik abiatzen dena.

Egoitza hau Karrikanekin (Euskal Herriko kale-arteen sorkuntzarako plataformarekin) lankidetzan garatzen da. Horrez gain, proiektuak ezinbesteko bidelagunak ditu bere bidean, hala nola, CCN Malandain Biarritz, Euskal Kultur Erakundea (EKE) eta Hirigune elkargoa. Elkarlan horri esker, konpainiak bere lengoaia fisikoa eta sorkuntzaren nondik norakoak findu ahal izango ditu gurean.