Arantzazulab

Gobernantzaren berrikuntzan gure herriko gune garrantzitsuena bilakatzea da laborategiaren misioa, erakunde sistemaren eta gizarte eragileen zerbitzura egongo dena.

Batetik, hausnarketarako, ikerketarako, deliberaziorako, baterako sorkuntzarako eta esperimentaziorako espazio berritzailea, eraldatzailea eta ausarta izatea da lortu nahi dena, askotariko eragileekin lana egingo duena, lankidetza eraginkorrak eta kontsentsu sozial zabalak bilatuz. Bestetik, herritarren topagune bezala aitortza lortzea, erakunde sareak zein gizarte zibilak errekonozitu dezan Arantzazulab-en ekarpena gobernantzaren berrikuntzan eta agenda publikoaren eraikuntzan gizartea inplikatzeko: Arantzazulab-en egingo den ikerketa eta egitasmoak herritarrena kezkekin eta erronkekin lotzeaz gainera, erakunde publikoentzat zein gizarteko eragileentzat interesgarriak izatea; alegia, laborategiak garatuko dugun ezagutza, metodoak, tresnak edo egiteko moduak herrigintza prozesuekin lotzea, edota erakundeetan garatuko diren herri politikentzat interesgarriak izatea. Hori da laborategiak egin nahiko lukeen ekarpena. Eta hori guztia, Arantzazuko balioei lotuta eta tradizioari eutsiz egin nahiko genuke gainera.

Amaitzeko, Arantzazulab berrikuntza nodo eta herritarren topagune izatea da azken helburua, gizarte justuagoa, kohesionatuagoa, oparoagoa eta gizatiarragoa lortzeko.

Programa garatzeko 3 dira laborategiaren lan-ildo nagusiak: Ikerketa, Esperimentazioa eta Dibulgazioa.

Hainbat egitasmo eta proiektu abiatu ditu laborategiak, esanguratsuak diren batzuk aipatzearren. 4 elkargune/ topagune nagusi abiatu dira:

• Ikerketa Elkargunea, lurraldeko 3 unibertsitateekin.
• Euskal Herriko ko-sorkuntza ekosistema, 25 eragilerekin.
• Gobernantzaren berrikuntzan ekosistema, bertako eta nazioarteko ezagutza eragileekin.
• Nazioarteko ikerlariekin Fellowship programa, +40 nazioarteko eragileekin.

• Lehen bi urteetan + 15 esperimentazioko proiektu aktibatu dira gure lurraldeko askotariko eragilerekin, erakundeekin eta herritarrekin, lankidetzazko gobernantza sustatzeko, eta deliberazioan herritarrak eta gizartea txertatzeko. Nabarmentzekoak: Demokrazia deliberatiboa sustatzeko bi “Herritarren Batzarrak”, Nazio Batuen 2030 Tokiko Koalizioaren markoan 2030 Agenda eta Garapen Jasangarriko helburuak euskal gizartean sustatzeko egitasmoa; Lankidetzazko Gobernantzaren Mapa; Ko-sorkuntza ekosistemako esperimentuak eta berrikuntza ekosistemen finantzazio-ereduen inguruko esperimentazioko egitasmo berritzailea; Gobernantza eta teknologiaren esparrua lantzea.
• Nazioartekotzean – +10 lankidetza gauzatu dira nazioarteko eragilerekin, + 80 eragilerekin harremana egin da, eta hainbat saretako kide egin gara. “Nazio txikien aliantza” aktibatu da, herrialde aurreratu eta berritzaileekin lankidetzako proiektua.
• Mintegi eta sormen saioen antolaketa askotariko eragileekin.
• Arantzazulaben “Ezagutza Ataria” estreinatzea ezagutza dibulgatzeko.
• Arantzazuko Ondare inmaterialaren dokumentala.

Ikusi Egitasmo esanguratsuak Arantzazulab-en web orrian eta jarraitu sareetan.

Egungo kontestuak, ezagutza eta berrikuntza eskatzen du ezinbestean: ezagutza, gizarte erronken eta faktore eraldatzaile horien ulermenean sakontzeko eta nola eragingo diguten ondo interpretatzeko, eta berrikuntza, erantzunak planteatzeko eta tresna berriak artikulatzeko. Tresna berriekin esperimentatzeko ausardia eta lidergoa eskaintzen ditu Arantzazulabek. Eta finean topagune, esperimentazio berritzailerako eta hausnarketa askerako elkargunea da , erakunde publikoekin, eragile sozialekin eta herritarrekin lankidetza estuan adimen kolektibo hori garatu ahal izateko.

Arantzazulab-en ekarpen nagusiak: Gobernuen eta gizarte zibilaren arteko harreman eta lankidetza modu berrien inguruan ikertu eta esperimentatzea, tresna eta mekanismo berriak geureganatuz; Berrikuntza ekosistemen inguruko ezagutza, eta horiek eraginkorrak izateko egiturak, sareak, gaitasunak, beharrezko lidergoak eta finantzazio-ereduen inguruko proposamenak; Eragileen arteko harremanak eta gobernantza eraldatzeko teknologiaren rolaren inguruan ikastea; Nazioarteko sareekin konektatzea, gobernantzaren berrikuntzan aurreratuak diren herrialde, esperientzia, gobernu eta laborategiekin lankidetzako proiektuak; Gizarte erronken inguruko ikerketa aurreratuak.