Atzealdea

Gipuzkoako garapena sustatuko duten 35 proiektu aktibatu dira

#
Gobernu irekia

Gipuzkoako garapena sustatuko duten 35 proiektu aktibatu dira

Arrakasta baldintzatuta dago erakunde, entitate eta gizartearen parte hartzera eta horien arteko lankidetzara

Etorkizuna Eraikiz egitasmoko GipuzkoaLab ekimenaren barruan aurten laguntza jasoko duten 35 proiektu berritzaileak aurkeztu dira

Aldundiak bilera egin du, gaur, Etorkizuna Eraikiz egitasmoko GipuzkoaLab ekimenaren barruan aurten laguntza jasoko duten 35 proiektu berritzaileen arduradunekin. Ekimen horiek Etorkizuna Eraikiz proiektu estrategikoaren barruan kokatzen dira, eta Gipuzkoa Taldean-ek,  lurraldeko gizarte antolatuaren ordezkariak,Gipuzkoako garapenerako giltzarri gisa identifikatutako lehentasunezko lan esparruen arabera aukeratu ziren.  Aldundiak beharrezkotzat jotzen du bere eragileek eta proiektuen arduradunek ezagutza partekatzea,  Gipuzkoako garapen ekonomikoa, soziala eta kulturala sustatze aldera.

Etorkizuna Eraikiz – Gipuzkoa Lab 2016: hautatutako proiektuak:

ISEA KOOPERATIBA. – Jakiberri

Jakiberrik proposatzen du gizarte berrikuntzako proiektu bat garatzea lurraldean, Gipuzkoako gastronomiaren eta elikagaien sektorean lankidetzazko eta partaidetzazko berrikuntza dinamikak sustatzeko, Euskal Fast Food Osasungarriaren eredu natural, osasungarri, askotariko eta nutritibo berria eta horri lotutako zerbitzu lerro oso bat sortzeko helburuarekin.

Isea, Basque Culinary Center, Mondragon Health, Jakion, Auzo Lagun eta Debagoienako eskualdeko garapen agentziak sustatutako proposamena da Jakiberri, eta Innobasqueren laguntza jasotzen du.

 

GOIERRIKO EKIMENA, SA – Goierriko Ekosistema Soziala

“Goierriko Ekosistema Soziala” –GES- proiektu integral bat da, xedetzat duena Goierriko eskualdean norbanakoan oinarritutako ekosistema sozial bat sortzea, lurralde honetan jarduten diren eragile guztien giza baliabideak, baliabide fisikoak, ezagutzakoak eta harremanekoak uztartuz.  Proiektu hau Goiekiko gizarte kontseiluak sustatuta artikulatu da. Goiekin biltzen dira Lurraldeko kapital soziala, molde guztietako gizarte elkarteekin, eskualdeko enpresa garrantzitsuenak eta tokiko administrazio publikoak. Goierri lurralde nagusiki industriala denez, esparru sozialak bere kontrapuntua behar du, bi elementuek bat egin behar baitute Goierriren etorkizuna bermatzeko.

Proiektu honek xedetzat du ekosistema sozial egoki bat sortzea, eskualdeak etorkizunean izango dituen erronkei erantzungo diena, hala nola baztertuta geratzeko arriskuan dauden pertsonen integrazioa, zahartzea eta genero desberdintasuna.

 

IMPACT HUB DONOSTIA SAN SEBASTIAN, S.COOP. – Circular Hub

Azken helburua da  ekonomia zirkularra ezagutaraztea gure lurraldean, eta lurraldeko eragileak inplikaraztea, zirkularitatean oinarritutako politikak, estrategiak eta ekintzak aplikatzeko.

Horrela, CIRCULAR HUB proiektuaren bidez, erakutsi nahi da ekonomia zirkularrak ekonomia linealak baino garapen sozial handiagoa eragiten duela. Horretarako, 3 lerro nagusi landuko dira: (1) mikroesperientzia ukigarri eta eskalagarriak lantzea, ekonomia zirkularra Gipuzkoan ikusarazteko, (2) balioetan heztea, ekonomia zirkularraren zergatia ulertarazteko, eta ezagutza eskualdatzea, ekonomia zirkularraren onurak dibulgatzeko, eta (3) Gipuzkoan ekonomia zirkularra ahalbidetzeko funtsezkoak diren eragileak inplikaraztea.

Circular Hub taldea Donostiako Impact Hub komunitateko kide edo gertuko diren eragileen (enpresak, fundazioak, GKE, ikerlariak eta ekintzaileak) arteko lankidetzatik jaio da.

 

FUNDACIÓN DEUSTO – Capacidades de facilitación

Proiektuaren helburua da Lurraldeko unibertsitateen gaitasun bideratzaileak zabaltzea, gobernantza berri baten eraikuntzan izan dezaketen inpaktua areagotzeko. Unibertsitateak eta ikerlariek Lurraldearen erronkekiko duten erantzukizuna areagotzeak ekarriko du eragileen arteko elkarrekintza handitzea, eta ezagutza sortze sozialki sendoa lortzea. Ezagutza sortzeko prozesu horretan eragile gehiagok parte hartzea eta lantzen diren gaiak berrorientatzea, Lurraldearen eskari eta beharrei erantzuteko, funtsezko bi alderdi dira, Gipuzkoako lurraldean gobernantza eredu berri bat finkatzeko.  Zentzu horretan, unibertsitateetan gaitasun bideratzaileak garatuz gero, indartu egingo da lurralde garapenean aldaketa prozesuak dinamizatzeko gaitasuna.

Ikerketa eta ekintza prozesu baten bidez, bideratzailearen inguruko ezagutza ahalik eta hobekien nola konpartitu jakiteko lan egingo dugu. Azken emaitza gisa, online tresna bat sortuko dugu, unibertsitateetako ikerlariei bideratzaile rola hartzen laguntzeko, eta lurralde garapenean aldaketa prozesuak dinamizatzeko gaitasunak indartzeko.

 

ASOCIACIÓN FAMILIARES DE ENFERMOS DE ALZHEIMER – Geroa lantzen

Proiektuaren helburu nagusia da Gipuzkoan belaunaldi arteko kooperaziorako eta adituen boluntariotzarako “sareen sarea” zabaltzea, premiazkoa baita zahartzearen, Alzheimerraren eta bestelako dementzien ondoriozko erronkei aurre egitea, Lurraldearen eraldaketa sozial solidariorako ekarpen gisa.  

Proiektu hau AFAGI elkarteak, AUBIXA fundazioak eta 125 boluntarioz osatutako talde batek proposatu dute.

 

EMUN, KOOP. ELKARTEA – Kontziliazio parekidea

Kontziliazio parekidea helmuga duen proiektua da honakoa, familiaren, lanaren eta maila pertsonalaren bateragarritasuna erraztu eta ahalbidetuko dituena. Erakundeek duten jarduteko moduetan berrikuntzak egiteko bidea aurkeztea dugu xede, eraginkortasunaren bidetik lana, familia eta alderdi pertsonala modu egokian eta orekatuan uztartuz. Enpleguaren arloan kokatzen da eta edozein entitate motatan aplikatzeko modukoa.

Erakundeentzat erabilgarria izango den prozesu mailakatua diseinatuko dugu proiektu honetan. Entitate batean eman beharreko pausoak prozesu baten bidez proposatuko ditugu, kontziliazio parekidea bultzatu eta ahalbidetuko duten irizpide, politika eta erakundeen jarduteko modu berritzaileak barne bilduko dituenak. Kontziliazio parekiderantz jo nahi duten erakundeentzako proposamena izango da modu gradualean aldaketak egin ditzan.

 

USURBILGO UDALA – Impacto social de las subvenciones

Egitasmo honen bidez gobernantza publikoko ereduetan berritu nahi dugu, bi udal desberdinek egiten dituzten diru-laguntza publikoko deialdien inpaktu soziala neurtuz, eta inbertitutako diruak zein eragin eta aldaketa ekarri dituzten. Asmoa bada, aldi berean, ikuspegi hori udal lantalde osora ez ezik, herriko eragileengana zabaltzea.

Egitasmoa Usurbil eta Oñatiko udaletan elkarlanean, indarraz batuz, proposatu dugu, izan ere egunerokoan honelako egoeran egoten baitira sarritan udalak. Udal bakoitzak bere prozesua egingo du, baina elkarrengandik ikasteko aprobetxatuko dugu, eta elkarrekin tresna bat sortuko dugu, etorkizunean beste erakunde publikoentzat baliagarria izango dena. Inpaktua neurtuko duen tresna, udal bakoitzaren beharretara egokitu daitekeena, modulu bidezkoa. Tresna hori sortzeko, berrikuntza sozialaren ikuspegitik inpaktua neurtzeko esparruan lanean ari diren eta izaera desberdina duten bi erakunderen kanpoko laguntza izango dugu: Sinnple eta Elhuyar Aholkularitza.

 

HUHEZI, SCL – Gipuzkoa: territorio de innovación social

Ikerketa-Ekintza prozesu orokor baten baitan txirikordaturik garatzen diren lau ardatz nagusi ditu egitasmoak:

1. Gipuzkoako lurraldeak aurrez aurre dituen desafioen gainean, eta Gizarte Berrikuntzaren ildotik garatzen diren paradigma berrien haritik, metodologia inplikatiboen bidez, herri bisio eta narratiba kolektibo gaurkotu eta partekatu baten oinarriak identifikatu eta garatu nahi ditugu.

2. “XXI mendeko Herrigintza eta Gizarte Berrikuntza” Aditu Programaren bidez bisio horren garapenean trakzio lanak egiteko funtsezkoak diren pertsonak (alderdietako pertsonak, eragile sozial eta sindikalak, udalgintzako ordezkari eta teknikariak, garapen agentzietako teknikariak) paradigma berrien ikuspegietan prestatu eta eragile proaktibo bilakatu nahi ditugu.

3. “Gizarte Berrikuntzaren Sonarra” jarriko dugu martxan: Nazioarteko esperientzia aurreratuenak jaso eta gure prozesuaren metabolismoan esperientzia hauen erreferentziak txertatzeko.

4. Eta egitasmo hau guztia Britania Handiko Young Foundation erakundearekin elkarlanean garatuko dugu.

 

HUHEZI, SCL – Creación de audiovisuales en Gipuzkoa

Ikus-entzunezko sorkuntza Gipuzkoan: egoeraren diagnosia eta ekintza-proposamenak izenburupean aurkezten den proiektu honen xedea da, batetik, herrialdeko ikus-entzunezko sektorearen diagnosia egitea, eta, bestetik, audientziari begirako esku-hartze proposamenak identifikatzea, ikus-entzunezko sorkuntza sustatu ahal izateko Gipuzkoan.

Bereziki garrantzitsu irizten diogu interbentzio proposamenen eragite-eremua gazteen adin-tartean kokatzeari, gazteak etorkizuneko heldu izango diren heinean, eta kontuan hartuta adin-tarte hori dela klabe identitate-sorkuntzan eta sozializazio-prozesuan.

 

EKAI CENTER FUNDAZIOA – Fomento y mejora de la política tecnológica de Gipuzkoa

Alemaniako esperientziarekin alderatzetik abiatuta, proiektu honek politika teknologikoak hobetzeko eta sustatzeko jarduketa proposamenak definituko ditu. Helburu zehatzak:

□ Gure teknologiaren konpetentzia gaitasunaren egoera zehatza zein den ezagutzea.

□ Zehaztea zer ahalegin egin behar dituen Gipuzkoak, lasterketa teknologikoan atzera ez gelditzeko eta aurrean jartzeko.

□ Alemaniako eskualde aurreratuenetako politika teknologikoak alderatzea, eta Gipuzkoan hobetu eta sustatzeko proposamenak egitea.

 

UROLA GARAIKO GARAPENERAKO AGENTZIA, SA – Onbizi

Deialdi honetara aurkeztu den ONBIZI proiektuak gainditu du jada lehenengo fasea. Lehenengo fase horretarako, proiektuak Foru Aldundiaren Ekonomia Sustapeneko Departamentuaren finantzazioa jaso du ("ikasten duen lurraldea" programa). Bertan, unitate didaktiko espezifiko batzuen garapen praktikoa landu da, jarduera fisiko egokituen eta errehabilitazio prozesuen inguruko prestakuntza emateko, bai osasun arloko langileei, bai zaintzaileei, bai senitartekoei eta baita norbanakoei beraiei ere.

Lehenengo fase horren ondoren, proiektu honek osasun arloko langileei, zaintzaileei, senitartekoei eta norbanakoei beraiei lesio fisikoen eta hartutako kalte zerebralen errehabilitazio prozesuen eta jarduera fisiko egokituen inguruko prestakuntza emateko unitate didaktiko espezifikoak kontrastatzeko eta horien esperimentazio praktikoa garatzeko proposamena jasotzen du.

 

EMANHAR GIZARTE ELKARTEA – Oasislab

OASISLAB proiektuak abiapuntutzat du etorkinak euskal lurraldeetan gizarteratzea sustatzen duten ekimen berritzaileak abian jarri eta prototipatu beharra, oinarritzat hartuta eskubide eta aukera berdintasuna aldarrikatzen eta defendatzen duen komunitate baten eraikuntza. Aldi berean, OASISLAB lehenengo urratsa da, komunitateei beren garapenaren inguruan antolatzeko eta garapen horretan parte hartzeko aukera emango dien ikuspegi zabalago batetarantz. Ikuspegi horrek norbanakoen eta erakundeen sare sortzaile, bizi eta aktibo bat ezarri nahi du, komunitate sentimendua sustatuz eta garatuz, garapen jasangarri, sozial eta kolektiboa ahalbidetzeko.

Proiektuak Brasilgo Eloa Institutuaren Oasis jokoak dakarren teknologia sozialean parte hartzera gonbidatzen ditu Herrera auzoa eta Hernani. Horrela, etorkinez eta bertako pertsonez osatutako jokalari talde batek mobilizazio sozialeko prozesu bat sustatuko dute beren auzoetan, proiektu komunitario bat egin eta abiarazteko, amets bat oinarritzat hartuta (amets horrek premia sozial, ekonomiko edo kultural bati erantzun diezaioke).

 

LKS, SCL – Etxean

Proiektu honen xedea da etxeko arreta eredu berri bat diseinatu eta inplementatzea; gaixoa ardatz izango duen arreta eredu horrek integratu egingo ditu osasun arretako maila desberdinak gizarte laguntzakoekin.  Horrela, etorkizuneko erronkei aurre egin nahi zaie, sistema soziosanitario jasangarri bat eraikiz.

Helburu horretaranzko bidea oztopoz eta zailtasunez josita egongo da. Erakundeen arteko oztopo burokratiko horiez gain, barne oztopoak ere badaude, hala nola aldaketen aurrean erakusten den erresistentzia. Horregatik, ezinbestekoa da jarrera proaktiboa hartzea, eta paradigma berritara eramango gaituzten berrikuntza prozesuen aldeko apustua egin beharraz kontzientziatzea, horien gainean eraikiko baita Gipuzkoaren etorkizuna, egungo ongizate maila mantendu eta hobetzeko xedez.

 

ELHUYAR FUNDAZIOA - Bizilabe

BIZILABE sarearekin tokiko gizarteari egin nahi zaio ekarpena gazteen hezkuntza osatzeko eta eskualdeen lehiakortasunean laguntzeko. Hain zuzen ere, Elhuyarrek sustatutako proiektu honek eredu-aldaketa bat proposatzen du, eta gazteen etorkizunean eskualdeko eragile desberdinen arteko lankidetza sustatzea da proiektuaren beraren ardatz nagusietakoa. Honek berebiziko garrantzia du; izan ere, nerabezaroa gazteentzako garai berezia da, eta bereziki neska gazteen kasuan auto-estimua txikitu egiten da kasu askotan. Bizilabek, era positiboan eragin nahi du neska-mutilengan garai horretan gaitasunetan ahalduntzeko aukera eskainiz. Eragile desberdinen arteko lankidetza aipatzen denean, zehazki, eragile hauek bildu nahi ditu Bizilabe martxan jartzeko lankidetza-sareak: tokian tokiko eragile ekonomikoak, eragile sozialak eta gazteria- eta hezkuntza-eragileak (enpresak, tokian tokiko elkarteak eta tokian tokiko hezkuntzaren eta gazteriaren ekosistemak). Eta eskualdeetako garapen-agentzien figura gakoetako bat dela uste dugu.

 

Etorkizuna Eraikiz – Gipuzkoa Lab 2017: hautatutako proiektuak

 

ARIZMENDI KOOPERATIBA. - Bizibide

BIZIBIDE proiektuak era argi eta praktikoan bultzatu nahi du lurralde komunitario berdinzaleagoa, solidarioagoa eta kulturalki askotarikoagoa; eta, aldi berean, tokiko identitate markatua duena. Horretarako, hezkuntza komunitateari eredu pedagogiko eraldatzaile bat proposatuko dio, gizarte gipuzkoarrak jauzi kualitatibo bat eman dezan, maila sozialean, gure haur eta gazteei balioetan oinarritutako hezkuntza emanez, pertsona solidario, parte-hartzaile eta konprometituak garatzea bermatzeko xedez.

BIZIBIDE proiektuak hezkuntza esparrura bideratuko ditu ahalegin guztiak, esparru horrek egun dituen erronkei ere erantzun ahal izateko.

 

APTES - Euskaltrust

EUSKALTRUST da APTESek diseinu sozialaren esparruan sustatzen duen ekimenetako bat, 2017-2020 aldirako dituen ardatz estrategikoetako bat. Proiektuaren abiapuntua izan da pertsonen eta erakundeen arteko konfiantza mekanismoak indartzea –konfiantza da sei kapital sozialetako bat-, esparru guztietan, konfiantza hori aitortutako balio sozial bilakatzeko.  

EUSKALTRUST ekimenari dagokionez, deialdi hau esparru ezin hobea da ernetze etapa garatzeko: proiektuaren jaurtiketa, diseinua, abiaraztea eta iterazioa. Ernetze etapa horretan, Gipuzkoako norbanakoak eta eragileak ekimenari atxikitzea bilatu nahi da, konfiantza mekanismoetan oinarritutako proiektuak eratu, zabaldu eta martxan jartzeko. Azken finean, Gipuzkoa lurralde bereziki sinesgarri eta fidagarria izatea lortu nahi da.

 

THE HUMANS’ MOVEMENT, SL - Gipuzkoateach

GipuzkoaTeach plataforma bat da, non unibertsitateko ikasleek ikasketetan egiten ari diren proiektu bati buruzko saio bat eskaintzen baitute, Gipuzkoako institutu eta ikasle guztiei zuzenduta. Hau da, unibertsitateko ikasleek beren proiektua azaltzen diete beren etorkizun profesionala nondik bideratu erabakitzeko unean dauden ikasleei. Horrela, erabakitzeko une horretan dauden ikasleek lehen eskutik entzungo dute zer esan nahi duen ikasketa jakin bat ikasteak.

Jarduera hau GipuzkoaTeach plataformaren  bidez koordinatzen da, bertan ezartzen baita interesatuen arteko harremana, eta, gainera, puntuazio sistema bat zehazten da. Horrela, gazteei gehien laguntzen dieten eta, hortaz, puntuazio altuena lortzen duten ikasleek, gehiagotan ere errepikatu ditzakete saio horiek.

 

CLUB DEPORTIVO IBAETA – Saber convivir

Proiektu honek aukera ematen du kategoria goreneko emakumezko talde batean dagoen esperientzia eta material guztia material didaktiko bilakatzeko eta hezkuntza zentroetara eramateko. Horrekin bizipen guztiak aprobetxatuko lirateke dibulgazio tresna bihurtzeko, eta balioak transmititzeko palanka bilakatuko litzateke kirola.

Balioak eraikitzeko beharra nabarmena da eskola jazarpena bezain garrantzitsuak diren gizarte ekintzen aurrean, fenomeno horrek sufrimendu handia eragiten baitu pertsona zaurgarrienen artean, neskato eta mutikoen artean, maila fisikoan nahiz intelektualean desberdintasunak izateagatik borroka egin behar izaten dutelako beren gizartean toki bat aurkitzeko eta pertsona gisa garatu ahal izateko.

 

ISEA KOOPERATIBA - Bakuntza

BAKUNTZA proiektuaren helburua da prestakuntza-ikaskuntzarako eta ezagutza belaunaldi batetik bestera transferitzeko prozesu egituratu bat diseinatzea eta sustatzea, ekintzailetasuna langabezian dauden gazteak lan munduan txertatzeko eta profesionalki garatzeko formula gisa bultzatzeko.

Xede diren kolektiboen ikuspegitik, BAKUNTZA proiektuaren bertuteetako bat da prozesu sinergiko eta egituratu batean uztartzen dituela, batetik, langabetu gazteen jarduera ekintzailea eta, bestetik, langile seniorrek zuzentzen dituzten enpresetako barne-ekintzailetasun prozesuak.

 

ZUBIGUNE FUNDAZIOA – Gaitasun industrialak

Proiektuaren xedea da Gipuzkoan Fabrikazio Aurreratuko 4.0 Industria garatzeko sortzen ari diren lanbide berrietarako pertsonak prestatzea. Horrela, 5 profil profesional identifikatu dira, lanbide berri horietara orientatuta. Proiektu honen bidez, profil horietara egokitutako karrera profesionalen ezaugarriak zehaztu dira, eta inplikatutako enpresetako langileak profil horietara sustatzeko ibilbideak definitzeko tresnak garatu dira.

Industriaren sektoreko langileen sustapenerako sistema bat sortuko da, enpresa aurreratuenek une kritiko honetan egin behar dituzten aldaketa eta berrikuntza dinamiketara egokituta: Fabrikazio Aurreratuko 4.0 Industriak aldaketa iraultzaileak ekarriko ditu, eta horrek askotariko jarduketak eskatzen ditu, ekimen pribatukoak nahiz erakunde artekoak.

Ideia bat hartzen da abiapuntutzat: edozein aldaketatan, teknologiaz eta ekipoez gain, pertsonak ere garrantzitsuak dira. Baina Fabrikazio Aurreratuko 4.0 Industriaren kasuan, pertsonak gutxi ikusarazten dira, ia robotak baino gutxiago.

 

ERRENTERIAKO UDALA - Engaiatu

Proiektu honen bidez, enpresa txikiek eta merkataritza jarduerako establezimenduek eraldaketa sozialerako, hobekuntzarako eta eragin soziala areagotzeko duten gaitasuna handitzeko tresnak sortu nahi ditugu. Zehazki, berrikuntza sozialaren markoa oinarri hartuta, enpresak lurraldearen balioekin lerrokatu eta eraldaketa sozial horren parte egin nahi ditugu.

Proiektua, modu esperimentalean, Errenteriako udalerrian landuko dugu, eta horretarako, hiriko 50 langile baino gutxiagoko 15-20 enpresa aukeratuko ditugu, izaera eta jardun desberdinekoak. Lan horretan, ezinbestean, bidelagun izango ditugu herriko merkatarien elkartea zein Oarsoaldeko Garapen Agentzia, duten inguruaren ezagutzagatik, zein urte hauetan zehar egindako ibilbideagatik.

 

IADDI – Basque Lanzadera

Basque Lanzadera Project proiektuaren xedea da 10-18 urte bitarteko haur eta gazteez osatutako taldeak sortzea, enpresen babesean eta irakasle eta begiraleen gidaritzapean STEAM (Science, Techonologies, Engineering, Arts and Mathematics) arloko nazioarteko txapelketetan parte har dezaten.

BLP proiektuak ikuspegi erabat praktikoa du, STEAMek Gipuzkoaren eta Euskadiren etorkizunean benetako garrantzia dutela dioen teoria praktikan jartzeko modua baita.

 

ADEGI – Enpresen eragin soziala

“Enpresen Eragin Soziala” proiektuaren helburua da Gipuzkoako enpresentzat inpaktu soziala "auto" ebaluatzeko metodologia erraz bat garatzea. Metodologia horrek hainbat ezaugarri izango ditu: erabilgarria izango da (erabakiak hartzeko aukera emango du), emaitzetara bideratuko da (materialtasun ikuspegia izango du) eta erabilerraza izango da (edozein enpresak erabili ahal izango du, enpresaren tamaina eta jarduera sektorea edozein direla ere). Proiektu honen bidez metodologia hori diseinatuko da lehendabizi, eta ondoren kontrastatu eta balidatu egingo da, Gipuzkoako enpresa sarea ordezkatzen duten 10 enpresez osatutako talde batekin.

 

FUNDACIÓN FORMACIÓN TÉCNICA MÁQUINA HERRAMIENTA – Pasarelas FP dual – ingeniería dual y las competenicas Industia 4.0.

Laguntza eskatzen du, gure enpresa sareak dituen prestakuntza eta konpetentzia premiei erantzun zuzena emango dieten bi proposamen berritzaile eta berezi diseinatzeko. Lehenengo proposamenak politika europarrekin bat datorren eszenatoki berri batean kokatzen ditu Lanbide Heziketa Duala eta Unibertsitate Heziketa Duala; harreman eta integrazio eszenatoki berri bat da, etorkizunera begira aztertu eta garatu daitezkeen aukera oso erakargarriak eskaintzen dituena. Bigarren proposamenak, berriz, 4.0 gaitasunak garatzea du xede, EHUk eskainiko duen master ofizial berri bati esker, 4.0 industriaren erronkei era integralean heltzeko gai izango diren profesionalak hezteko asmoz.

Bi proposamenak batera aurkeztu dira, IMHren helburu estrategikoa baita 2018/2019 ikasturtean ibilbide integratu eta malgu bat eskaintzea, heziketa zikloetan hasi eta unibertsitateko masterrean amaituta.

 

DEBEGESA – Red de formación para el empleo para adultos en exclusión

Proiektu berritzaile bat abiarazi nahi da, sare honetan parte har dezaketen baliabide, sistema eta eragileen aurretiazko diagnosia diseinatu eta garatzeko, eta bazterketa egoeran dauden helduen beharrak ezagutzeko. Behar horietatik eta egun jada badauden erantzunetatik abiatuta, "Debabarrenan eta Debagoienan bazterketa egoeran dauden helduentzako heziketa eta enplegu sarea" diseinatuko da. Sare horrek heziketa prozesuak hasteko aukera emango die herritar guztiei, gaikuntzan, ahalduntzean eta garapen pertsonalean oinarrituta, norbanakoen baliabideak, tresnak eta gaitasunak indartuz, lan merkatuan txertatu ahal izateko. Sare hori sortzeko, funtsezkoa da eragile desberdinak lankidetzan jardutea ahalbidetuko duten foroak ezartzea.

 

AZPEITIKO UDALA – Nire azoka plaza urbanoa

Gipuzkoako eta bereziki Urola Erdiko landa-eremuetako jendartearen ongizatea bilatu eta landa eremuko ondare komunari ekarpena egiteko konpromisoa gauzatzea. Herritarrek landa eremua berea egin eta ilusioz, partaidetza iraunkorraren aldetik, elikadura gobernantza plan baten baitan, landa eremuaren multifuntzionaltasunaz baliatuz, landa eremu erakargarri eta ekintzailea sustatu eta hauen fruitu osasuntsuez guztiok elikatzea.

EKINTZA LERROAK (REALIZED STRATEGIES)

1.- NIREA Mahaitik, Elikadura Gobernantza eredua diseinatu

2.- NIREA Azoka Plaza Rurbanoaren antolaketa eta eskaintzaren dinamizazio eredu lana

□ NIREA Zerbitzuak: Lehen sektorea bizirik mantentzeak duen garrantziaren inguruko informazio eta formazioa gure gizartean hedatu, 2017-2018 Agenda antolatuz.

□ NIREA Elikagaiak: Gure lehen sektoreak ekoiztutako elikagaiak identifikatu, ezagutu, dastatu eta erosten lagunduko digun bertako “Elikagunea” martxan ipini.

 

AGINTZARI KOOPERATIBA - Landalab

Proiektuaren helburua da Gipuzkoako landa inguruneko errealitate desberdinetara egokitu eta horietan ere ezarri daitekeen esku-hartze komunitarioko eredu berritzaile bat diseinatu, modelizatu, pilotatu eta komunikatzea; eredu horrek uztartu egingo ditu, batetik, aukera teknologiko berriak, eta, bestetik, ezagutza komunitario esangabe eta ukiezinaren aprobetxamendua. Horretarako, esperimentu praktikoa egingo da, ezaugarri soziodemografiko, soziohabitazional eta sozioekonomiko desberdinak dituzten tokiko hiru errealitatetan.

 

IKERTALDE, SA – Ekin adinari!

“EKIN ADINARI!" Gipuzkoako enpresetan adinaren kudeaketa eta ezagutzaren belaunaldi arteko transferentzia sustatzeko gailu bat da, eta helburutzat du Gipuzkoako langileen ezagutza kapitalizatzea.

Proiektuak hainbat erronka ditu, hala nola enpresak adinaren kudeaketak eta ezagutzaren transferentziak duten garrantziaz SENTSIBILIZATZEA, enpresa gipuzkoarretan tresna eta gailuen ezagutza eta aplikazio maila zenbaterainokoa den aztertzea (400 enpresa), gai honen ezagutzan sakontzen lagunduko duten JARDUNBIDE EGOKIAK identifikatzea (arrakastak), eta 6 enpresetan bakoitzaren errealitatera egokitutako aplikazo praktikoa egitea.

Horrela, azken buruan, EREDU TEORIKO-PRAKTIKO ERALDATZAILE eta propioa eraiki nahi da, baterako hausnarketa ahalbidetu eta ikuspegi metodologiko berritzaile eta didaktiko bat emateko, ondoren enpresetan aplikatu ahal izateko.

 

ORQUESTRA – Bases para el compromiso empresarial en Gipuzkoa

Proposamen honetan ikerketa galdera bikoitzari erantzun nahi zaio:

• Nola sortu balio konpartitua enpresa gipuzkoarretan, lurraldearen lehiakortasun sozioekonomikoa hobetzeko?  Galdera hau ikerketa proiektuaren ZER galderari lotzen zaio.

• Nola sortu enpresaren eta lurraldearen helburuak lerrokatzea sustatuko duten ikerketa interaktiboko prozesuak, lurralderako balio konpartitua sortzeko?   Galdera hau ikerketa proiektuaren NOLA galderari lotzen zaio.

Horrela, bi jarduketa ardatz abiaraziko dira, eta horiek gauzatzeko askotariko eragile ekonomikoen laguntza behar da:

•Erabaki zentroak Gipuzkoan finkatzea. Eragin zuzena du jasangarritasun sozioekonomikoaren sustapenean.

•Ekonomia zirkularra, lurralde jasangarria sustatzeko. Eragin zuzena du ingurumen jasangarritasunaren sustapenean.

 

EMANHAR – Gu geu gara

“Gu Geu Gara” proiektuak gure lurraldearen egungo bi beharrei erantzun nahi die:  haur eta nerabeei balioetan oinarritutako hezkuntza ematea, bizitzarako trebetasunak izan ditzaten, era kritikoan elkarreragiteko, inguruneekin konprometituta, eta gobernantza eredu berriei buruz hausnartzeko aukera emango duen tresna bat sortzea, haurrak eta nerabeak presenteago egon daitezen, tokiko politikan erabakiak hartzerakoan.

“Gu Geu Gara” joko kooperatibo bat da. Parte hartzen duten ikastetxeei erronka batzuk planteatzen zaizkie, eta ikastetxe horiek gainditu egin behar dituzte. Guztira hiru erronka dira (erronka bakoitzak hilabete bateko iraupena du gutxi gorabehera). Parte hartzen duten ikastetxeetan, tutore batek eta lidergorako gaitasunak dituzten hamar ikaslek osatutako talde batek koordinatzen du erronka bakoitza. Ikasle horiek jokoa hasi baino lehen identifikatu ditu ikastetxeak berak.


Nola eraikitzen ari gara Gipuzkoarako etorkizun hobe bat?

Etorkizuna Eraikiz da Gipuzkoaren etorkizuneko erronkak identifikatu eta horiei erantzuna ematen dien proiektua, irtenbide zehatz, benetako eta eraldatzaileekin.

Informazio gehiago
  1. Gipuzkoa taldean

    Gipuzkoaren garapenerako giltzarri izango diren proiektuak identifikatu

  2. Gipuzkoa lab

    Gai errealen inguruko esperientzia errealen laborategia

  3. Ikertu

    Gipuzkoako 4 unibertsitateak tartean sartuta daude ezagutza erabilgarria sortzeko

  4. Ikasi

    Nazioarteko truke sare bat sortu

  5. Gizarteratzea

    Ikasitako guztia gure gizartean txertatu