Atzealdea

Agenda feministaren erronkak

 

Agenda feministaren erronkak

Berdintasuna eta Kontziliazioa

Marusia Lopezen hitzaldia Berdintasuna, gizartea eta etorkizuna kongresuan.

Marusia López Cruz feminista mexikarra da. Etnologian lizentziatua da Antropologiako eta Historiako Eskola Nazionalean eta Genero eta Garapen Masterra egin zuen Bartzelonako Unibertsitatean. Gaur egun JASS-eko (Just Associates) Botere eta Babes arloan egiten du lan, giza eskubideen defendatzaileei eman beharreko babesaren inguruko esperientzien trukea sistematizatzen eta errazten. Giza Eskubideen Defendatzaileen Ekimen Mesoamerikarraren nazioarteko eraginaren batzordeko kide da. Ekimen horren sortzailea eta koordinatzaileetako bat izan zen Marusia, 2015era arte. Calala Emakumeen Fondoaren Patronatuko kide eta Protection International erakundearen zuzendaritza batzordeko kide da.

2018an, Nazio Batuen Erakundeak Giza Eskubideen Defendatzaileei buruz egindako adierazpenaren hogeigarren urteurrena bete zen, eta Nazio Batuen Erakundeak egindako Emakume Defendatzaileen Babeserako ebazpenaren bosgarren urteurrena. Giza eskubideak defendatzen dituzten pertsonek eta haien erakunde eta komunitateek justiziaren eta berdintasunaren alde egiten duten lana aitortzen eta babesten duen nazioarteko esparru bat izan arren, azken hamarkadetan, hazi egin dira haien aurkako mehatxu, eraso eta hilketak. Egoera horrek bereziki eragiten die emakume ekintzaileei eta identitate ez-bitarrak dituzten ekintzaileei, batez ere, emakumeen eskubideak, LGBTI komunitatearen eskubideak, lurraldea eta ondasun naturalak defendatzen dituztenean. Munduaren iparraldeko nahiz hegoaldeko estatuak espazioa ixten ari dira parte-hartze sozialari, disidentziari, adierazpen askatasunari, eta gobernu askok erantzukizun zuzena dute defendatzaileen aurkako erasoetan. Interes korporatiboek, krimen antolatuak, talde fundamentalistek eta interes pribatuko beste talde batzuek gero eta eragin handiagoa dute erakundeetan eta baliabide publikoetan, eta eragin hori erabiltzen dute haien interesak lortzeko eta oposizioa erreprimitzeko, askotan, errepresioa erabiliz. Beldurtzeko, ahots disidenteak isilarazteko, komunitateen sare soziala suntsitzeko eta gizarte-mugimenduak ahultzeko erabili ohi dira genero-indarkeria eta giza eskubideen defendatzaileen diskriminazioa. Genero-diskriminazioaren eta -indarkeriaren izaera sistemikoa eta beste zapalketa-forma batzuekin duen intersekzioa (arrazan, klasean, etnian edo sexu-orientazioan oinarrituak), eguneroko errealitatea dira emakumeen bizitzan eta historian. Horrek areagotu egiten ditu defendatzaileen arriskuak, eta kalte egiten dio haien lidergoari, baita beren familia, komunitate eta antolakundeen barruan ere.

Ponentzia honetan, giza eskubideen defendatzaileek borrokatu behar duten indarkeriaren arrazoi eta adierazpide nagusiak azalduko dira, eta Mesoamerikan landutako babes eta zainketa kolektiboko esperientzia batzuk aipatuko dira. Halaber, giza eskubideen defendatzaileen eta haien erakunde eta komunitateen babesa areagotuko duen nazioarteko elkartasuna indartzeko gomendio batzuk emango dira.