Atzealdea

Erdiak gara. Izan gaitezen erdiak.

 

Erdiak gara. Izan gaitezen erdiak.

Berdintasuna

Lasarteko bizilagunekin esperimentu soziala egin dugu.

Egunerokotasuneko egoera desorekatuaren inguruan hausnarketa sustatu nahi dugu.

Erdiak gara. Izan gaitezen erdiak da aurtengo kanpainaren leloa eta dei honekin bizitzaren eremu guztietan aldarrikatu nahi da sexuen arteko banaketa orekatua. Desberdintasuna ia oharkabean bizi dugu egunero, hain modu ohikoan maiz, konturatu ere ez garela egiten. Arretarako dei honekin, kanpainarekin batera kamera ezkutuan egindako bideo deigarri bat ere zabaldu du Aldundiak, sare sozialetan ikus daitekeena. Lasarte-Orian aurreko astean filmatutako bideoan aktore bat segurtasun agente baten planta egiten ikus daiteke, herriko kale aldapatsu bateko eskailera elektrikoetako sarbidea erregulatzen. Agente faltsu honek gizonei pasatzen utzi eta emakumeei galarazi egiten zien. Esperimentu honetan parte hartu zuten herritarren erreakzioak jaso eta kanpainari hasiera emateko bideo deigarria osatu da. Metafora moduko bat aurkeztea izan da ikus-entzunezko bitxi honen helburua eta aitzakia bezala erabili, anekdotatik harago, hausnarketa sustatzeko.

Kanpainaren muina, ordea, era guztietako datuetan oinarritzen da. Hain zuzen, datuak erabilita diputatu nagusiak berak nahi izan du Gipuzkoako egoera desorekatuaren lehen erretratua ematea eta, bereziki, lan eremuko eta kontziliazioaren esparruko datuetan oinarritu da. Hain zuzen bi arlo horietan eragin nahi da berdintasunari dagokionez, Aldundiak Gipuzkoaren etorkizuneko erronkei aurre egiteko estrategian. Iazko errenta kanpaina prestatzeko batutako datuekin eta 2016ko Euskadi mailako txostenaren datuak eskuan, mahaiaren gainen jarri nahi izan du soldaten arrakalaren gaia. Hala, 2016 urtean emakumeen bataz besteko urteko soldata 21.019 eurokoa zen eta 28.194 eurokoa gizonena. 

Aldaketarako gakoetako bat, kontziliazio erantzunkidea da. Hain zuzen, Etorkizuna Eraikiz dinamikaren ardatzetako bat da hori, bizitza laboral eta familiarraren arteko orekan eragin nahi duena, lanaren antolaketan eta kultura aldaketan eragiteko. Euskadin emakumeen %45ak murriztu ditu lan orduak seme-alabak izan dituenean eta soilik gizonen %5ak egin du. 2016ko datuen arabera, emakumeen %93k eskatu dituzte haurren zaintza burutzeko eszedentziak eta %83,2ak familia-kideak zaintzeko. 

Elkarretaratea ostegunean
Azkenik, martxoaren 8aren harira, kontzentrazioa egingo da Aldundian. Eguerdia izango da elkarretaratzea, Gipuzkoa plazan.