Berriak

Gipuzkoako Foru Aldundiak, Gazteria Zuzendaritzaren bitartez, haur, nerabe eta gazteen politikak indartuko ditu ZmZ azterlanaren emaitzetatik abiatuta. Azterlan hori entzuteko tresna bat da, eta lurraldeko haur eta nerabeek haien ongizateari, kezkei eta premiei buruz duten pertzepzioa jasotzen du.

Edizio honetan 8 eta 14 urte arteko 13.879 haur eta nerabek hartu dute parte; 75 ikastetxetakoak eta Gipuzkoako 86 udalerritakoak izan dira. Laginak adin-tarte horretako biztanleriaren % 29,1 ordezkatzen du, eta aukera ematen du Gipuzkoako haur eta nerabeek nola bizi diren eta haien ongizatea nola baloratzen duten erakusten duen argazki zabal eta lurraldekatua izateko.

Gipuzkoako Foru Aldundiko Kultura eta Gazteria Departamentuak Gaztematika Sarearen bidez eta EDE Fundazioaren laguntza teknikoarekin bultzatutako azterlanak haurren eta nerabeen bizitzako zortzi dimentsio nagusi aztertzen ditu: familia, ongizate materiala, osasuna, autonomia, eskola-bizitza, lagunak, aisialdia eta ingurunea.

Goizane Álvarez Kultura eta Gazteriako diputatuak adierazi duenez, "ZmZ azterlanak oso informazio baliotsua ematen digu politika publikoak hobetzeko haurren eta nerabeen errealitate zehatzetik". Azaldu duenez, "emaitzek laguntzen digute jakiten arreta gehien non jarri behar dugun: aisialdirako eskubidean, helduen entzutean, nerabezarorako trantsizioan, neska-mutilen arteko berdintasunean eta zaurgarritasun handieneko egoeretan". "Hori da inkesta honen zentzua: entzutea, hobeto jarduteko", gaineratu du.

Emaitzek erakusten dute Gipuzkoako haurrek eta nerabeek, oro har, beren ongizatearen pertzepzio positiboa dutela. Bizitzarekiko gogobetetasun orokorra 10etik 9,1ekoa da batez beste, 2022an erregistratutakoaren berdina, eta haur eta nerabeen % 77,8k oso gogobetetasun-maila handia du. Era berean, norberak hautemandako ongizate-indizea 8,8 puntukoa da, eta mailarik altuenetan daudenen ehunekoa % 69,9tik % 78,8ra igo da.

Hala ere, azterlanaren azterketa xehatuak erakusten du batez besteko positiboek ez dituztela ezkutatu behar ondoezeko eta desberdintasuneko egoera zehatzak. Ongizateak behera egiten du adinarekin, bereziki DBHrako trantsizioan; 12 urtetik gora, neskek mutilek baino adierazle okerragoak dituzte; eta zaurgarritasun sozioekonomikoak sistematikoki biltzen ditu ongizate-, bakardade- eta itxaropen-maila okerragoak.

Alerta-datuen artean, azterlanak jasotzen du haur eta nerabeen % 19,6k adierazten duela gogobetetze-maila txikia edo ertaina duela bere denbora librearen kantitateari dagokionez; % 13,7k adierazten du asebetetze-maila txikia duela pertsona helduen entzuteari dagokionez; eta soilik % 53,3k uste du eragina izan dezakeela bere auzoko edo udalerriko erabakietan. Gainera, % 48,5ek dio noizbait bakarrik sentitu dela, eta % 29,6k dio zailtasunak dituela mugikorra erabiltzeari uzteko. Datu horiek indartu egiten dute aisialdi hezitzailea, benetako parte-hartzea, laguntza emozionala eta ingurune komunitario seguruak bermatuko dituzten politika publikoak bultzatzen jarraitzeko beharra.

Ildo horretan, Gipuzkoako Foru Aldundiak baditu ZmZ azterlanak jasotako orientabide nagusiei erantzuten dieten hainbat programa eta zerbitzu. Horien artean, nabarmentzekoa da Gaztematika Sarea; lurraldeko udalerriek eta Aldundiak osatzen dute eta Gipuzkoako aisialdi hezigarriko azpiegitura publiko nagusia da. Gaur egun, lurraldeko haur eta nerabeen % 36,20k parte hartzen du Gaztematikako zerbitzuetan.

Sareak 152 ekipamendu ditu: 65 Haurtxoko, 67 Gazteleku, udalerri txikietan parte-hartzea sustatzeko 18 zerbitzu eta 20 gazte-ekipamendu. Gainera, 358 profesional ditu. Aldundiko Gazteria Zuzendaritzak sareko udalerriak finantzatzen ditu, horien plangintza koordinatzen du, zerbitzuei baliabide teknikoak ematen dizkie eta etengabeko hobekuntzako eta etengabeko prestakuntzako prozesuak bultzatzen ditu.

Azterlanak identifikatutako beste erronketako bat desberdintasun sozioekonomikoak murriztea da. Ildo horretan, Gaztematikako zerbitzuak unibertsalak eta doakoak dira, eta horrek aisialdi hezigarrirako sarbidean, parte-hartze sozialean, harreman positiboetan eta garapen pertsonalean aukera-berdintasuna bermatzen laguntzen du, batez ere baliabide gutxiago dituztenen artean.

Era berean, Aldundiak hizkuntza-inklusioa eta kulturartekotasuna indartzen ditu. Gaztematikak euskara gizarteratzeko eta gizarte-kohesiorako tresnatzat hartzen dute, eta euskara erabiltzea bultzatzen dute, bazterketa-dinamikarik sortu gabe. Begirada hori ere talde profesionalei zuzendutako prestakuntza-prozesuen parte da.

Gipuzkoako Foru Aldundiak barneko eta lurraldeko lan-prozesuak bultzatzen ditu ZmZ-ren emaitzak aztertzeko eta haur eta nerabeen ahotsa modu eraginkorrean txertatzeko eragiten dieten politika publikoen diseinuan, garapenean eta ebaluazioan.

"Datuek bide argia markatzen digute: gehiago entzutea, hobeto zaintzea eta zehaztasun handiagoz jardutea. ZmZ azterlanak aukera ematen digu non gauden jakiteko, baina batez ere norantz aurrera egin nahi dugun erabakitzera behartzen gaitu. Eta haur eta nerabe guztiek aukerak, loturak, aisialdia, babesa eta ahots propioa izango dituzten Gipuzkoa baterantz aurrera egin nahi dugu. Eta Gipuzkoa berdinzaleagoa, inklusiboagoa eta demokratikoagoa izango bada, haurrak eta nerabeak gure komunitateko parte aktibotzat hartu behar dira", adierazi du diputatuak amaitzeko.

INFORMAZIO GUZTIA

Jarraitu gure sareak