Atzealdea Azaroaren 5ean amaitzen da “Beldur Barik Jarrera” lehiaketan parte hartzeko aukera
2019/10/16
Beldur Barik Emakundek urtero antolatzen duen programa da eta laguntzaileen artean Gipuzkoako Foru Aldundia dago. Beldur Barik Jarrera!, berriz, 12-26 urte bitarteko gazteentzako ikus-entzunezko lehiaketa irekia da. Bere helburua da emakumeen aurkako indarkeria-mota guztiak gainditzea, eta harreman askeak, errespetuzkoak, parekideak, anitzak eta ez-sexistak eraikitzen laguntzea.
Lehiaketara aurkezten diren proiektuek Beldur Barik Jarrera islatu behar dute; alegia, aipatutako harreman-motak eraikitzeko konpromiso pertsonal eta kolektiboa erakutsi behar dute. Kalitate teknikoaren edo artistikoaren gainetik, mezuaren kalitatea baloratuko da.
Aurtengo berrikuntzetako bat da edozein adierazpen artistiko onartuko dela, baldin eta ikus-entzunezko euskarrian aurkezten bada: flashmob, errezitatutako poemak edota kameraren aurrean irakurritako hausnarketazko testuak, bideoklipak, fotografiak, fotomuntaketa, fotonobelak, lipdub-ak, dantzak, film laburrak, animaziozko egitasmoak, proiektuen edota artelanen aurkezpenak, performance-ak, hiriko esku-hartzeak, etab.
Lehiaketan parte har daiteke bakarka edo taldeka (ikastetxe bat, gela bat, elkarte bat) eta 3 proiektu aurkeztu daitezke pertsona edo talde bakoitzeko. Parte hartzeko 3 kategoria ezberdin daude: 12-13, 14-18 eta 19-26 adin-tartekoentzat. Lanak bidaltzeko azken eguna azaroaren 5a da.
Kategoria bakoitzeko 400 euroko 2 sari banatuko dira: ikus-entzunezko lana eta ikus-entzunezkoa ez den lana saritzeko. Horrez gain, 300 euroko partaidetza-saria emango da, herri bozketaren bitartez; eta baita ikus-entzunezko ekoizpen onena baloratzeko saria ere, 300 eurokoa.
Iturria: Beldur Barik