Atzealdea

Eurochild-ek Europako haur-komisarioa eskatu du

Eurochild-ek Europar Batasuneko buruei zuzenduriko eskaera plazaratu du haur-komisarioa eskatzeko. Horren helburua da gutxienez 5.000 sinadura biltzea

2019·09·06


Eurochild haurren erakundeen Europako sarea da, eta haurren eskubideak eta ongizatea politika publikoetan txertatzearen alde lan egiten du. 170 elkarte baino gehiagok osatzen dute. Sinadura-bilketa bat jarri du martxan, 5.000 sinadura biltzeko asmoz, Europar Batasuneko agenda politikoan haurren eskubideek lehentasuna izan behar dutela agerian jartzeko. Europar Batzorde berriak eskaintzen duen aukera aprobetxatuz, 2019-2024 agintaldian haur-komisarioa sortzea eskatzen ari dira.

Eskariaren arabera, nahiz eta Europar Batasunean 100 milioi haur izan, ez dago haur-komisariorik. Europako gobernuan ez dago inor haurrak babestu eta euren eskubideen alde borrokatzeko, goi-mailako organoetan behinik behin. Baina bada itsas-gai eta arrantzarako goi-komisario bat. “Ez dugu esaten arrainak garrantzitsuak ez direnik. Gure umeak arrainak bezain garrantzitsuak direla pentsatzen dugu, besterik ez”, diote eskarian.

 

Europar Batasunean 4tik haur bat pobrezia-arriskuan dago; izan ere, babes sozialeko sistemak maiz ahulegiak dira beharra duten ume eta familiei babesa emateko. Eta asko kanpoan geratzen dira diskriminazio eta bazterketa sozialagatik.

Sinatu eskaera hemen

Iturria: GSIA elkartea