Atzealdea Gaztematika: 4 urteko laburpena
2019/07/18
Uztailaren hasieran Gipuzkoako haur, nerabe eta gazteen sustapen-arloko profesionalak bildu ginen datozen lau urteotako erronkak zehazteko eta etorkizuneko helburu komun batzuk lortzen lagunduko digun plangintza osatzeko.
Oraingoan ere sareak haur, nerabe eta gazteentzako zerbitzuak indartu nahi ditu, haurren eta gazteen sustapeneko eragileen artean eta beste arloekin ere elkarlanean aritzeko guneak sortzeaz gain.
Laburpen honetan azken lau urteetako lorpen garrantzitsuenak bildu ditugu:
Gaztematikak araudi bat izatea lortu da, Foru Dekretu baten bitartez. Honek aitorpen juridikoa eman dio sareari eta, bide batez, zer den, nork osatzen duen, zein helburu dituen eta nola funtzionatzen duen xedatzen du.
Bestalde, Gaztematikaren helburuetako bat da haur, nerabe eta gazteen herritartasun aktiboa sustatzea eta horretarako haien parte-hartzea bideratzea. Horren harira, azpimarratzekoa da haurrekin partaidetzazko prozesuak garatzeko asmoa zuten udalerriei laguntzeko egindako lana.
Azken lau urteotan ahalegin berezia egin dugu haur, nerabe eta gazteen sustapen-arloan egiten dugun lana zabaldu eta gure hartzaile zuzenengana iristeko. Horretarako bide desberdinak martxan jarri dira.
Udalei komunikazio-arloko aholkularitza, prestakuntza-saioak eta baliabide bereziak eskaini zaizkie.
Era horretan, Gaztematika sarean udalekin batera lantzen ditugun programa, ekintza edo kanpaina bereziak beren herrietan zabaltzen lagundu zaie.
Horrez gain, haur, nerabe eta gazteen alorreko ezagutzaren iturri eta bilgune bilakatzeko erronka genuen. Horren haritik, plataforma berri bat diseinatu eta martxan jarri dugu legegintzaldi honetan barruko eragileen komunikazioa eta sare-lana hobetzeko.
Kanpoko komunikazioari dagokionez, legegintzaldi hau funtsezkoa izan da gure lan-eremuan komunikazioan indarrak jartzeak duen garrantziaz jabetzeko.
Lau urte hauetan Gaztematika zabaltzeko egin den ahalegina baliagarria izan da gure lana erakusteko, gure eragina handitzeko, harremanak gehitzeko eta gizartearengana iristeko.
Era berean, Gaztematika sarearen ikusgaitasuna hobetzeko programa eta ekintza guztien komunikazioa landu da.
Ildo horretan, nabarmentzekoa izan da haurtxoko eta gaztelekuetako protagonista nagusiekin (haur, nerabe, gazte, profesional eta gurasoekin) egindako kanpaina.
Haur, nerabe eta gazteentzako zerbitzuak sustapenaren arloan esku hartzeko tresna nagusia izanik, indar berezia jarri dugu hauek indartzen.
Haur, nerabe eta gazteen arloko teknikari eta hezitzaileen prestakuntza-premiei erantzuteko prestakuntza-planak diseinatu dira.
Plan hauek garatzeko, kontuan hartu dira profesionalen funtzioak eta Gaztematikaren printzipioak eta balioak.
Prestakuntza-plana ezinbesteko tresna da profesionalen ezagutza eta kualifikazioa bultzatzeko. Hori dela-eta, lan egingo da arloko profesionalen beharrei eta legegintzaldi berrirako zehaztu diren erronkei erantzuteko.
HNGen sustapeneko praktika onen katalogo bat ere osatu da, profesionalen ezagutza eta kualifikazioa bultzatzeko eta profesionalen artean ideia berriak sortu eta gogoetak partekatzeko asmoz.
Oinarrizkoa da haurrak, nerabeak eta gazteak ebaluazioetako prozesuetan sartzea, zuzenean eta eraginkortasunez. Horregatik, legegintzaldi honetan ebaluazioetan haurren eta nerabeen iritziak jasotzeko modua sistematizatzeko lan egin da, azken helburua lortzeko urratsak emanez.
Nahiago baduzu informazioa pdf-n jaitsi dezakezu:
Ikasturtea amaitzearekin batera, eskerrak eman nahi dizkizuegu sare honen parte zareten guztioi eta, jakina, bidean lagundu diguzuen beste eragile guztiei ere.