Aktualitatea

2025·05·30

Hondakinen materiategi bat da, lurraldeko enpresetatik berreskuratutako materialak biltzen, katalogatzen eta erakusten dituena, eta balio erantsi handiko baliabide bihurtzen dituena, beste sektore batzuetan berrerabiltzeko, hala nola diseinuan, arkitekturan, hezkuntzan edo industrian.

José Ignacio Asensio:  "Materiategi Lab hondakinak aukera bihurtzen diren lekua da. Enpresa, diseinatzaile, zentro teknologiko edo unibertsitateentzako espazio erabilgarria izatea nahi dugu. Tokitik bertatik konponbide jasangarriagoak imajinatzeko eta eraikitzeko topagunea».

Naturkliman gaur ofizialki zabalduko dira lurraldean berrikuntzarako eta jasangarritasunerako estrategikoak diren bi gune: Materiategi Lab, material berreskuratuen lurraldeko lehen liburutegia, eta Ekintegi, Naturklimak bultzatutako Enpresa Erronken esparruan sortutako proiektu nabarmenen erakusketa.

Jasangarritasuneko diputatu eta Naturklimako presidente José Ignacio Asensio arduratu da espazioak inauguratzeaz Gipuzkoako enpresa-sareko ordezkarien, ekosistema berritzaileko eragileen eta proiektuko kolaboratzaileen aurrean. Diputatuak nabarmendu duenez, "Materiategi Labekin urrats sendo eta irmoa egin dugu ekonomia zirkularraren aldeko apustuan. Materialen Gipuzkoako lehen liburutegia da. Proiektu aitzindaria da, eta sortu da frogatzeko beste batzuek baztertzen dutenetik abiatuta berritu daitekeela. Nahi dugu erreferentzia izatea, ez bakarrik lurraldean, baita estatuan ere, eta hondakinak balio bihurtzeko benetako tresna izatea."

Materiategi Lab: bigarren bizitza duten materialak

Materiategi Lab azpiegitura aitzindaria da lurralde eta estatu mailan eta Naturklima eraikinean dago, Eskuzaitzeta industrialdean. Hondakinen materiategi bat da, lurraldeko enpresetatik berreskuratutako materialak biltzen, katalogatzen eta erakusten dituena, eta balio erantsi handiko baliabide bihurtzen dituena, beste sektore batzuetan berrerabiltzeko, hala nola diseinuan, arkitekturan, hezkuntzan edo industrian.

Laborategia Naturklimak sustatzen du, Mazedonia Diseinu Elkartearen laguntzarekin. Fitxa teknikoen, materialen eta aholkularitza espezializatuaren sistema baten bidez, materiotekak aukera ematen du askotariko laginak kontsultatzeko: industria hondakinak, prozesuen azpiproduktuak, ehun-bazterketak, plastikoak eta birbalorizatuta berrikuntza-palanka bihurtzen diren beste material batzuk.

Materiategi Lab beste Lab Zirkular batekin osatzen da. Azken hori eraldaketa-makineriaz hornitutako espazio bat da, eta aukera ematen du bildutako materialetatik abiatuta prototipoak egiteko, esperimentatzeko eta aplikazio berriak diseinatzeko. Ikuspegi praktiko horrek enpresei eta ekintzaileei laguntzeko benetako tresna bihurtzen du.

Ekintegi: benetako erronketarako benetako irtenbideak

Inauguratu den bigarren espazioa, Ekintegi, Naturklimaren Enpresa Erronken bost edizioetan erdietsitako lorpenen erakusleihoa da. Ekimen horrek Gipuzkoako 80 enpresa baino gehiago mobilizatu ditu, eta ekonomia zirkularreko berrikuntza aplikatuko 60 proiektu baino gehiago garatzea ahalbidetu du. Proiektu horietatik 15 erakusketa iraunkor honetan parte hartzeko hautatu dira.

Ekintegik ingurumen-erronka zehatzetarako benetako konponbideak biltzen ditu, jasangarritasuna, lehiakortasuna eta sormena uztartzen dituzten proiektuetan gauzatuta. Hondakin organikoak material berriak ekoizteko berrerabiltzetik hasi eta ekodiseinura arte, industria-sektore estrategikoetan, arrakasta-kasu horiek ekonomia zirkularrak ekonomia-, gizarte- eta ingurumen-motor gisa duen potentziala erakusten dute.

Naturklima, konexio- eta bultzada-espazioa

Materiategi Lab eta Ekintegi abian jarrita, Naturklimak enpresen, administrazioaren, ezagutzaren eta gizartearen arteko lotura-espazio gisa duen funtzioa sendotu du. Baliabide berri horiek berrikuntza zirkularra dinamizatzeko, materialak eta ezagutza teknikoa eskuratzeko eta lankidetza-aukera berriak bultzatzeko sortu dira.

Donostia, 2025eko maiatzaren 29a