Aktualitatea

2025·06·09

Aldundiak bere eraikin eta instalazioen energia-kontsumoa % 25 murriztea lortu du 2015 eta 2024 artean. Aurrerapen horien ondorioz, lurraldea bide egokian dago 2030erako ezarritako kontsumoaren % 35eko murrizketaren helburua lortzeko.

José Ignacio Asensio: "Jauzi kualitatiboa eman dugu foru energia-politikan. Hamarkada bakar batean, bederatzi aldiz biderkatu dugu energia berriztagarriaren sorkuntza, eta % 25 baino gehiago murriztu dugu gure eraikin eta azpiegituretako energia-kontsumoa. Datu horiek bermatzen dute eredu garbiago eta eraginkorrago baten alde egin dugun apustua”.

Gipuzkoako Foru Aldundiko Jasangarritasun Departamentuak Jarduketa Energetikoaren Plan Orokorraren azken jarraipen-txostena aurkeztu du. Bertan, jasangarritasunaren eta trantsizio energetikoaren arloan lurraldeak lortutako aurrerapen garrantzitsua jasotzen da. 2015. urteaz geroztik, bederatzi aldiz handitu da energia berriztagarriaren sorrera foru-instalazioetan, pixkanaka eguzki-sistema fotovoltaikoak, termikoak eta biomasa ezartzeari esker, eta energia-kontsumo osoaren % 10,09ra iritsi da.

Energia garbien hazkunde jasangarri hori 2015ean hasitako estrategia baten barruan kokatzen da, eta estrategia horrek Estatuko erreferenteetako bat bihurtu du Gipuzkoa administrazio publikotik egindako trantsizio energetikoari dagokionez. Aldundiak bere eraikin eta instalazioen energia-kontsumoa % 25,49 murriztea lortu du 2015etik 2024ra, eta zifra hori % 15,26koa da Kabia, ibilgailuen parkea eta BIDEGI bezalako erakundeak kontuan hartuz gero. Aurrerapen horien ondorioz, lurraldea bide egokian dago 2030erako ezarritako kontsumoaren % 35eko murrizketaren helburua lortzeko.

Erakundeen konpromisoa deskarbonizazioarekin

Jasangarritasun Departamentuak energiaren kontsumoari eta ekoizpenari eragiten dien egiturazko eraldaketa bultzatu du. Azken hamarkadan garatutako jarduera-ildo nagusiak honako hauek dira:

• Azpiegiturak modernizatzea luminariak LED teknologiarekin ordezkatuz, batez ere foru errepideen sarean.

• Jarduketa-unitateetan erregai fosilak murriztea, gasolioaren eta gas naturalaren kontsumoa nabarmen jaitsiz, kasu askotan elektrizitatearekin ordezkatuta.

• Foru Aldundietako eraikinetan iturri berriztagarriak sartzea, eguzki-instalazioekin eta biomasa-sistemekin, energia garbiaren berezko sorkuntza nabarmen handitu dutenak.

• Ibilgailuak pixkanaka elektrifikatzea, ibilgailu hibridoak eta elektrikoak ugarituz.

Apustu irmoa eta etengabea

Gipuzkoako Foru Aldundiak bere eraikin eta instalazioen kontsumoak modu sistematikoan jasotzen dituen Energia Informazioko Sistema bat du. Era berean, efizientzia energetikoaren auditoriak eta ziurtagiriak ditu higiezin guztietan, eta, horri esker, erabaki estrategiko oinarrituak eta eraginkorrak hartu ahal izan dira azken urteotan.

2030eko helburuak lortzeko, jarduera-plan espezifikoak diseinatu dira, eraikin publikoen urteko kontsumoaren % 32 estali arte berriztagarrien aprobetxamendua handitzeko, haien kalifikazio energetikoa hobetzeko eta ibilgailu-parkearen kontsumoa optimizatzeko.

José Ignacio Asensio Jasangarritasun diputatuak azpimarratu duen bezala: "Gure helburua argia da: energetikoki buruaskia den Gipuzkoa bat, administrazio publiko eredugarri batekin eta inplikatutako herritarrekin eta ehun ekonomikoarekin. Ez da eraginkortasunaren kontua bakarrik, justizia klimatikoaren, independentzia energetikoaren eta hurrengo belaunaldientzako ongizatearen kontua ere bada”.

Administrazio publiko deskarbonizatu eta energetikoki arduratsu batekiko ikuspegi argiarekin, Gipuzkoak ekintza klimatikoarekin konprometitutako lurralde gisa jarraitzen du. 2015az geroztik izandako aurrerapenak anbizio handiko plangintza baten emaitza dira, denboran zehar jarraitua eta sailen artean koordinatua, lurralde garbiagoa, eraginkorragoa eta erresilienteagoa eraikitzeko funtsezkoa izaten jarraituko duena.