Ondo egon ala ondo sentitu? Ongizatearen eztabaida plazara.
Gure herrietako plazak, elkar eragiteko eta elkarrekin bizitzeko gune garrantzitsuak izan dira betidanik. Komunitatearen topagune eta herritarren ongizatearen adierazle izan dira historikoki.
Azken hamarkadan Gipuzkoak urrats garrantzitsuak eman ditu gure ongizate-sistema bermatu eta indartzeko, desberdinkeriak gutxituz eta adierazle ekonomikoak hobetuz. Ahalegin kolektibo horren ondorio da Gipuzkoa desberdinkeria gutxieneko herrialdea izatea Europan, Eslovakiaren atzetik soilik. Oraindik zereginik baden arren, oro har ondo gaudela esan dezakegu.
Baina, ondo egon arren, herritarrak ondo sentitzen al gara?
Lehen orain bezain bizi somatzen ez genituen errealitate berriak dauzkagu nonahi: nahi ez den bakardadea, arazo mental eta emozionalen gorakada, sumindura, menpekotasun eta desberdinkeria berriak (digitala, kontsumismoa…), balio komunitarioen beherakada, lan-absentismoa eta enpresa proiektuarekiko atxikipen falta…
Oinarri horretatik abiatuta, Gipuzkoako Foru Aldundiak gutako bakoitzaren ongizatean eragiten duten errealitate hauen eztabaida Gipuzkoako plazetara ireki du, ikuspegi oso edo integral batetik esperientziak partekatzeko, hitz egiteko, entzuteko eta elkarrekin guztion ongizate hobea eraikitzeko.
