2026·03·13
2026ko deialdiak 1,13 milioi euro jartzen ditu udal, mankomunitate, enpresa eta elkarteentzako dirulaguntzetarako, hondakinen prebentzioan, materialen berrerabilpenean, birziklatze aurreratuan eta gaikako bilketa indartuko duten sentsibilizazio-kanpainetan aurrera egiteko.
Diru-laguntzen lerroak ehun-hondakinak etxez etxez biltzeko sistema berrietarako eta hiri-hondakinetatik datozen bateriak segurtasunez kudeatzeko ekipoetarako laguntzak biltzen ditu lehen aldiz.
José Ignacio: “Hamarkada bat daramagu ekonomia zirkularra bultzatzen eta lurraldean ekonomiaren, industriaren eta gizartearen eragile gisa duen eginkizuna sendotzen. Ekonomia Zirkularrak gaur egun 10.000 enplegu inguru sortzen ditu, eta Gipuzkoako BPGaren % 10 inguru suposatzen du”.
Gipuzkoako Foru Aldundiko Jasangarritasun Departamentuak Gipuzkoan ekonomia zirkularra sustatzeko dirulaguntzen deialdi berria aurkeztu du, eta azken hamarkadan egindako bidearen balantzea egin du. Prentsaurrekoan José Ignacio Asensio Jasangarritasuneko diputatuak eta Mónica Pedreira Trantsizio Ekologikoko zuzendariak parte hartu dute.
Urte horietan, Gipuzkoan 10 milioi euro baino gehiago mobilizatu dira laguntza publikoetan, ekonomia zirkularrarekin lotutako 700 proiektu baino gehiago bultzatuz; horietatik 450 baino gehiago administrazio publikoek sustatu dituzte, eta 300 inguru enpresek eta eragile pribatuek. Ekintza partekatu horrek erakusten du trantsizio ekologikoak modu kolektiboan eraikitzen denean bakarrik funtzionatzen duela.
José Ignacio Asensio Jasangarritasuneko diputatuak Departamentuaren ibilbide jarraituari buruz esan duenez, “hamarkada bat daramagu ekonomia zirkularra bultzatzen eta lurraldean eragile ekonomiko, industrial eta sozial gisa duen zeregina sendotzen, gaur egun 10.000 enplegu inguru sortzen dituela eta Gipuzkoako BPGaren % 10 inguru dela”.
Hamarkada bat eredu ekonomikoa eraldatzen
Duela hamar urte, ekonomia zirkularra oraindik ere kontzeptu lausoa zen, ia ez zegoen presente eztabaida ekonomikoan, eta ezezaguna zen gizartearen zati handi batentzat eta industria-sarearentzat. Gaur, Jasangarritasun Departamentuaren bultzadari esker, politika hori sendotu egin da, eta enpleguaren eta berrikuntzaren benetako eragile bihurtu da.
2026ko deialdia: jarraipena eta anbizioa
2026rako laguntzen deialdi berriak 1.130.000 euroko zuzkidurarekin finkatzen du estrategia hori, udalentzat, hondakinak kudeatzeko mankomunitateentzat, elkarteentzat, merkataritza-sozietateentzat eta autonomoentzat, eta 20 egun balioduneko epea du aurkezteko, Aldizkari Ofizialean argitaratzen denetik aurrera.
Hondakinen prebentzioa, materialen berrerabilera, birziklatze aurreratua, baliabideen kudeaketaren berrikuntza eta gaikako bilketa areagotzeko sentsibilizazio-kanpainak sustatzen dituzten proiektuek jasoko dute laguntza.
Halaber, deialdiaren barruan 485.000 euro gordeko dira mankomunitateek, gaikako bilketan eskumena duten erakundeek eta zerbitzu hori banaka kudeatzen duten udalek bultzatutako proiektuetarako, eta sarrera-ordenaren arabera emango dira. Diru-laguntzek diruz lagun daitekeen aurrekontuaren % 75 estaliko dute, gehienez 50.000 euro eskabide bakoitzeko, eta udal-hondakinen kudeaketa hobetzeko hainbat jarduera finantzatzeko aukera emango dute. Deialdi honen berrikuntzen artean, ehun-hondakinak biltzeko gune berriak edo ehunak etxez etxe biltzeko sistemak ezartzea eta hiri-hondakinetatik datozen bateriak modu seguruan kudeatzeko ekipoak erostea nabarmentzen dira. Gainera, hainbat jarduera bultzatuko dira, hala nola materia organikoaren bilketa eremu edo establezimendu berrietara zabaltzea, amiantoarekin zuntz-zementua duten etxeko hondakinak biltzea eta amiantoaren erroldak egitea, hondakinen bilketan sentsorika eta digitalizazioa sartzea eta sortzeagatiko ordainketa-sistemak ezartzea edo hobetzea, bai eta tamaina handiko hondakinak edo TEEHak etxean biltzeko zerbitzuak eta minigbiguneak instalatzea ere.
Etorkizunarekiko konpromiso irmoa
“Duela hamar urte, ekonomia zirkularra etorkizuneko kontzeptua zen. Gaur egun, politika erreala, eraldatzailea eta estrategikoa da. Klima-larritasunak, lehengaien eskasiak eta ziurgabetasun geopolitikoak ekodiseinuan, birziklapenean eta materialen berrerabileran erabakitasunez aurrera egitea eskatzen digute. Hamar urte daramatzagu ekonomia zirkularra bultzatzen. Eta jarraitzen dugu”, amaitu du Asensio diputatuak, Jasangarritasun Departamentuak eredu ekonomiko jasangarriago, berritzaileago eta bidezkoago batekin duen konpromisoa azpimarratuz.
Donostia, 2026ko martxoaren 13a