"Kostaldea eta Zu" ekimenak Boluntariotzaren Eguna ospatu du, Gipuzkoan ozeanoaren zaintzak duen botere eraldatzailea nabarmenduz

Recicla - Birziklatuk, Easo Politeknikoak eta Goyeneche Fundazioak jaso dute Boluntarioen Eguneko saria, ozeanoaren eta komunitatearen babesean egindako lan eraldatzaileagatik.

2025ean, Surfrider Espainak eta Gipuzkoako Foru Aldundiko Jasangarritasun Departamentuak Boluntariotzaren Nazioarteko Eguna ospatu dute, eta arreta funtsezko zerbaitetan jarri dute: ozeanoa zaintzeak ingurumena babesteaz gain, komunitatea, inklusioa eta gizarte-ongizatea ere eraikitzen ditu.

Naturkliman, Gipuzkoako Klima Aldaketaren Fundazioan, berrogeita hamar boluntario eta erakunde parte-hartzaileetako ordezkari inguru bildu dira urtean zehar bizitako ikaskuntzak, emaitzak eta, batez ere, esperientzia eraldatzaileak partekatzeko.

Gizarte aliantzetan oinarritutako urtea

Lurraldean eskolekin egiten den lana sendotuta dagoenez, 2025ean "Kostaldea eta Zu" proiektuak beste urrats bat eman du: ozeanoaren babesa gizarte-erakundeei, kolektibo ahulei eta gizarteratzearen alde lan egiten duten erakundeei hurbiltzea. Horrela, ingurunea zaintzea integratzeko eta loturak sortzeko tresna bihurtzen den espazioak sortzen dira.

Ikuspegi hori posible izan da, besteak beste, ATECE Gipuzkoa, Goyeneche, Loiola Etxea, Mater Museoa, Begi Bistan, Haurralde eta Plus 55 erakundeekin izandako lankidetzari esker. Lankidetza horiei esker, gazteek, bazterketa-arriskuan dauden familiek, kolektibo migratzaileek eta dibertsitate funtzionala duten taldeek kostaldea bizi ahal izan dute, kide izateko eta ekintza positiborako leku gisa.

Boluntario-jardueren, itsas zaborren bilketen, hezkuntza-tailerren eta herritar-zientziari buruzko prestakuntzaren bitartez, 750 pertsonak baino gehiagok parte hartu dute aurten kanpainan Gipuzkoan, ingurune naturalarekin eta komunitatearekin duten lotura sendotuz.

Urteko emaitzak: parte-hartzea, datuak eta baterako ekintza

Jardunaldian zehar, erakundeen eta boluntarioen ahaleginari esker lortutako datuak partekatu dira. Egindako jardueren artean, hauek nabarmendu dira:

• Hondartzen eta naturguneen hondakinak eta zigarrokinak biltzea, hainbat gizarte-erakunderekin eta herritar-talderekin batera.

• Laginketa zientifikoak Alkolea (Mutriku), Orrua (Getaria) eta Murgita (Donostia) kokaguneetan. Horien emaitzak Trantsizio Ekologikorako eta Erronka Demografikorako Ministerioaren Estatuko datu-basean sartu dira.

• Itsasoko ingurumen-hezkuntza eta herritarren inplikazio aktiboa indartu duten prestakuntza eta tailer parte-hartzaileak.

Ekintza horiek ingurumen-inpaktua ez ezik, komunitate-inpaktua ere izan dute: jarduerek lagundu egin dute boluntariotzan espazio segurua eta eraikitzailea aurkitzen duten pertsonen integrazioa, loturak sortzea eta ahalduntzea.

Ozeanoa elkargune gisa

Herritarrek itsas kontserbazioan eta gizarte jasangarriago baten eraikuntzan hartutako konpromisoaren garrantzia azpimarratu dute erakundeetako ordezkariek. José Ignacio Asensio Jasangarritasuneko diputatuaren hitzetan, “aurtengo lanak erakusten du ozeanoa babestea pertsonak zaintzeko modu bat ere badela. Jasangarritasun Departamentutik proiektu hau gizarte-erakundeei irekitzearen aldeko apustua egiten dugu, itsas ingurunearen defentsak inklusiboa, parte-hartzailea eta guztiontzat eskuragarria izan behar duelako. Boluntariotzaren indarra batzeko, komunitatea sortzeko eta gure ingurunearen zaintza kohesio eta justizia sozialaren eragile bihurtzeko duen gaitasunean dago”.

Bestalde, María Ballesteros Surfrider Espainiako Hezkuntza eta Boluntariotzako arduradunak ekitaldian adierazi duenez, “aurten oso argi ikusi dugu ingurumen-boluntariotzak ez duela soilik kostaldea aldatzen: pertsonak aldatzen ditu. Gizarte-erakundeekin lankidetzan aritzeak erakutsi digu ozeanoa babestea integraziorako, autoestimurako eta lurraldearekin konektatzeko tresna ere badela”.

Proiektu finkatua eta hazten ari dena

Gipuzkoako Foru Aldundiko Jasangarritasun Departamentuak finantzatuta, "Kostaldea eta Zu" programak lurralde-erreferentzia izaten jarraitzen du itsasoko zaborren aurkako borrokan eta itsasoko ingurumen-hezkuntzan. 2025 honek, gainera, ozeanoa babestea bere komunitatea osatzen duten pertsonak zaintzea ere badela berresten du.