Elkar EKIN Lanean ekimenak lanbideratze- gizarteratzeko eta lurralde lehiakortasunerako 2022-2024 programaren emaitzak aurkeztuko ditu ekainaren 6an

Datorren ekainaren 6an, 09:30ean, Oronako areto nagusian Elkar EKIN Lanean 2022-2024 Gipuzkoako Foru Aldundiak bultzatutako gizarteratzeko eta lanera bideratzeko estrategiaren programaren emaitzak eta ondorioak aurkezteko ekitaldia egingo da.

Programa eskualdeetako garapen agentziekin, gizarteratze sareekin eta hainbat gizarte erakunderekin lankidetzan garatu da, eta enplegu inklusiboa eta kalitatezkoa sortzea helburua du zaurgarritasun egoeran edo bazterketa arriskuan dauden pertsonentzat. Horrela, Gipuzkoa lurralde inklusibo bihurtzea helburu duen garapen ekonomiko eta sozialeko eredu aurreratu baten alde egiten du.

Elkar EKIN Lanean programak 6 milioi euroko aurrekontua du eta kolektibo zaurgarrientzako enplegu duin eta jasangarrietarako sarbidea bermatzera bideratutako politika publikoen garapena bultzatu du. Departamentu anitzeko ikuspegiari esker, bazterketari hainbat ikuspegitatik heldu ahal izan zaio, ekonomia, lan eta gizarte arloko neurriak integratuz, betiere bi helburu dituela: gizarteratzea sustatzea eta gure lurraldearen lehiakortasuna indartzea.

Programak, enplegua eta, bereziki, kalitatezko enplegua lortzeko ahaleginak egin ditu, egoera zaurgarrian edo bazterketa arriskuan dauden pertsonei lehentasuna emanez. Horretarako, gizarteratzeko eta laneratzeko ibilbide integral eta pertsonalizatuak prestatu dira, pertsonen eta enpresen beharretara egokitutako programazio baten bidez. Era berean, lankidetzazko gobernantzako egitura eraginkor bat sustatu da enplegu ekosistemaren barruan, Gipuzkoako eskualde guztietan. Egitura horrek aukera ematen du erantzun hobea emateko eta enplegu proiektuak sortzeko, pertsonen premiekin eta lan merkatuaren eta testuinguru ekonomikoaren egungo erronkekin bat etorriz.

Ekitaldia hasteko, Eider Mendoza diputatu nagusiak hitz egingo du, eta, jarraian, Alfonso Gurpegui Eusko Jaurlaritzako Enplegu eta Gizarteratze sailburuordeak enplegurako eta gizarteratzeko euskal estrategia aurkeztuko du. Ondoren, Gipuzkoako Foru Aldundiko Proiektu Estrategikoetako zuzendari nagusi den Koldo Peciñak Elkar EKIN Lanean proiektuaren emaitza nagusiak azalduko ditu. Jarraian, enpleguaren eta gizarteratzearen arloko lankidetzazko gobernantzari buruzko mahai ingurua egingo da, Debagoieneko Mankomunitatea, Debegesa, Tolosaldea Garatzen, Bidasoa Bizirik eta Oarsoaldea agentzietako ordezkariak bertan direla. Horrez gain, zeharkako proiektuen emaitzak aurkeztuko dira, besteak beste, Batzen, zeharkako ikuspegia duten ekimenen koordinazioa sustatzen duena; Sutargi, sektore biosanitarioetan enplegagarritasuna hobetzean zentratua; eta Katea Legaia, emakumeak laneratzera bideratutako Emaklanean ekimenaren bidez. Ekitaldia amaitzeko, Unai Andueza Ekonomia Sustapeneko eta Proiektu Estrategikoetako diputatuak hitz egingo du.

Horrela, Elkar EKIN Lanean, Gipuzkoa kohesionatuago, ekitatiboago eta pertsona guztien ongizatearekin konprometituago baten aldeko apustua egiten duen estrategia eraldatzaile gisa sendotzen da.