Gipuzkoako industriak 100 milioi euro eskura dezake energia berriztagarrien sektorean aurrera egiten jarraitzeko, Ekonomia Zirkularraren PERTEari esker

José Ignacio Asensio: “RENOCICLA programa aurrekaririk gabeko aukera da Gipuzkoarentzat, urteak baitaramatza ekonomia zirkularraren eta deskarbonizazio industrialaren aldeko apustua egiten. Horrek abantaila estrategikoa ekarriko du lehiakortasunerako, eta Gipuzkoak merkatuan duen posizionamendua indartzea ahalbidetuko du”.

“Mugikortasun elektrikoaren eta baterien birziklapenaren aldeko apustu irmoa egin dugu, Zirkular Bat bezalako ekimenen bidez, eta orain bultzada eta babes erabakigarria lortu dugu deialdi honi esker”.

Gaur goizean, Naturklima Gipuzkoako Klima Aldaketa Fundazioaren egoitzan, RENOCICLA laguntza-lerro berria aurkeztu da esklusiboki, Espainiako Gobernuko Trantsizio Ekologikorako eta Erronka Demografikorako Ministerioak bultzatutako Ekonomia Zirkularra Suspertzeko eta Eraldatzeko Proiektu Estrategikoaren (PERTE) barruan.

Alejandro Dorado Ekonomia Zirkularreko ordezkariak, José Ignacio Asensio Jasangarritasuneko diputatuarekin eta Juan Ramón Ayuso IDAEko Eolikoen eta Itsasoko Energien Departamentuko buruarekin batera, jardunaldi honen buru izan dira. Jardunaldi horretan, Gipuzkoako industria-sektoreko eta jasangarritasunaren arloko eragile giltzarriak bildu dira, 100 milioi euroko zuzkidura duen ekimen honek energia berriztagarrien ekipamendu-ondasunen kudeaketa nola eraldatuko duen zehazteko, eguzki-panelen, aerosorgailuen eta baterien birziklatzea, berrerabilera eta ekodiseinua sustatuz.

Energia Dibertsifikatzeko eta Aurrezteko Institutuak (IDAE) kudeatzen du laguntza-lerroa, eta energia berriztagarrien sektorean hondakinak ekoizteko eta kudeatzeko eredua eraldatzeko diseinatuta dago, balio-kate industrial bat sortzea ahalbidetuz, baliabideen mendekotasuna murrizteko eta osagaien bizitza baliagarria luzatzeko.

Estrategia hori martxan dago jada: Zirkular Bat

Funtsezko urratsa da Gipuzkoarentzat, mugikortasun elektrikoan eta energia garbietan sendotutako industria-ekosistema duen lurraldea, duela urte batzuetatik hona autonomia estrategikoaren eta trantsizio energetikoaren aldeko apustu irmoa egiten duena. Deialdi hau abian jartzea bat dator Gipuzkoako Foru Aldundiko Jasangarritasun Departamentuak, CIDETEC Energy Storagek eta Naturklimak 2023an abian jarritako Zirkular Bat ekimenaren helburuekin. Ekimen hori aitzindaria da baterien kudeaketa zirkularrean.

Abian jarri zenetik, Zirkular Batek industria-ekipoak birziklatzearekin eta, bereziki, bateriak birziklatzearekin lotutako proiektuak sustatu ditu, PERTEaren deialdi berrian jasotako eremuetako bat.

Mugikortasun elektrikoarekin konprometitutako automobilgintza-sektore sendoa duen lurralde batean, linea hori funtsezko palanka da material kritikoak berreskuratzeari eta baterien bizitza baliagarria luzatzeari helduko dioten proiektuak aktibatzeko, industria-jarduera, berrikuntza eta kalitatezko enplegu berdea sortuz.

Horri dagokionez, Jasangarritasuneko diputatu José Ignacio Asensiok nabarmendu duenez, “Departamentuan industria-autonomiako estrategia bat lantzen ari gara, baliabideen eta energiaren kanpo-mendekotasuna murriztuz. Jardunaldi honek erakusten du bide egokian gaudela, eta Gipuzkoa prest dagoela Europak behar duen industria berde berriaren buru izateko”, gaineratu du diputatuak.

Lankidetza publiko-pribatua eta etorkizuneko ikuspegia

Jardunaldi hori egiteak – lurraldeko enpresa txiki eta ertainen, klusterren, eskualdeko eragileen eta zentro teknologikoen ordezkaritza zabalarekin – agerian uzten du Jasangarritasun Departamentuak trantsizio-eredu zuzen, ordenatu eta partekatu batekin duen konpromisoa. Eredu horrek industriari laguntzen dio, eta baldintzak sortzen ditu Gipuzkoak BPG industrial indartsua, garbia eta jasangarria izaten jarrai dezan.

“Horrelako topaketek orain arte egiten ari garen lana indartzen dute: enpresen ondoan egotea, aurrea hartzea, laguntzea, eta erronka berriei aurre egin eta aukera bihurtu ahal izateko tresnak ematea. Eta RENOCICLA programa, zalantzarik gabe, aukera paregabea da Gipuzkoarentzat”, amaitu du.

Jardunaldi horrekin, Gipuzkoak industria deskarbonizatu, zirkular eta kalitatezko enplegu berdea sortzen duen industria batekin duen konpromisoa zigilatu du, eta beste urrats bat eman du energia berriztagarrien hondakinen kudeaketa aurreratuan Estatuko erreferente gisa kokatzeko.

Gipuzkoako Foru Aldundiko Jasangarritasun Departamentuak azpimarratu du laguntza-lerro hori oso garrantzitsua dela deskarbonizazio industriala bizkortzeko, ekonomia zirkularra sustatzeko eta sektorearen lehiakortasuna indartzeko, baliabideen mendekotasuna erronka estrategiko nagusietako bat den testuinguru global batean.

Jasangarritasuneko diputatu José Ignacio Asensiok adierazi duenez, “ekonomia zirkularra funtsezko palanka da Gipuzkoak industria-jasangarritasunean erreferente izaten jarrai dezan, kalitatezko enplegu berdea sortuz eta gure sektore ekonomikoen autonomia estrategikoa indartuz. PERTE honek aukera paregabea ematen du tokiko enpresa txiki eta ertainak material kritikoak birziklatzeari eta berrerabiltzeari lotutako industria berri batean sar daitezen, hala nola bateriak, funtsezkoak baitira mugikortasun elektrikorako eta energia berriztagarrietarako”.

Jardunaldiak balioa eman die osagaiak berrerabiltzeko eta materialak berreskuratzeko proiektu berritzaileei. Proiektu horiek IDAEk kudeatutako laguntzen onuradun izango dira, eta industria-balio jasangarriko kate bat finkatuko dute, karbono gutxiko ekonomia baterantz aurrera egiteko Gipuzkoak hartutako konpromisoekin lerrokatuta.

Gipuzkoako industriarekin estu lan egiten duen Jasangarritasun Departamenturarentzat, jardunaldi hau Gipuzkoan egitea mugarri estrategikoa da. Industriari ekoizpen-eredu zirkular, lehiakor, garbi eta kalitate handiko enplegu berdea sortzeko gai bihurtzeko prozesuan lagunduko dioten politika publikoak bultzatzeko konpromisoa berresten du, lurraldearentzat eta herrialde osoarentzat etorkizun jasangarria lortzen laguntzeko.