Jasangarritasun Departamentuak eguzki-energiaz argiztatuko du Ikaztegieta eta Legorreta arteko bidegorria, Gipuzkoa seguruago eta deskarbonizatuago baterantz aurrera egiteko

Eguzki-argiztapenak energia aurreztea eta energia berriztagarrien aldeko apustua bermatzen du, eta, gainera, genero-ikuspegia txertatzen du espazio seguruagoak eta inklusiboagoak sortzeko.

José Ignacio Asensio: “Ikaztegieta eta Legorreta lotzen dituen bidegorrian eguzki-farolak instalatzeak Gipuzkoak trantsizio energetikoarekin duen konpromisoan aurrera egiten laguntzen digu, emisioak murriztu eta segurtasuna hobetzen duten energia berriztagarrien aldeko apustua eginez. Proiektuak herritarren eskari bati erantzuten dio, eta genero-ikuspegia txertatzen du, ibilbide seguruagoak eta inklusiboagoak sortuz”.

Jasangarritasun Departamentuak Ikaztegieta eta Legorreta udalerriak lotzen dituen bidegorriaren tartean 54 eguzki-farola jartzeko lanak amaitu ditu. Esku-hartze horrek 133.428,29 euroko inbertsioa ekarri du, eta 1.570 metroko ibilbideari segurtasun eta irisgarritasun handiagoa ematea ahalbidetzen du, eguneko ordu gehiagotan erabiltzea erraztuz eta mugikortasun aktibo eta jasangarria sustatuz.

José Ignacio Asensiok, Jasangarritasuneko diputatuak, argiztapen berria inauguratu du, Alba Garmendia Ikaztegietako alkatearekin, Iñaki Agirre Legorretako alkatearekin batera eta Pablo García, Gu Light Ingeniaritzako obra-zuzendariarekin.

Asensiok nabarmendu duenez, “bidegorri honetan eguzki-argiztapena instalatuz, aurrera egiten jarraitzen dugu Gipuzkoak trantsizio energetikoarekin duen konpromisoan, eta irtenbide berriztagarrien aldeko apustua egiten dugu, lurralde seguruago, deskarbonizatuago eta herritarren beharretara egokituago batera hurbiltzeko. Gainera, proiektu honek herritarren eskaera bati erantzuten dio, eta genero-ikuspegia aintzat hartzen du; izan ere, ibilbideak argiztatzeak emakumeentzat espazio seguruagoak bermatzea ere esan nahi du”.

Era berean, diputatuak azpimarratu duenez, “Jasangarritasun Departamentuan lanean ari gara klima-aldaketaren aurkako borrokak pertsonen, herrien eta hirien bizitzan hobekuntza zehatzak ekar ditzan. Horrelako proiektuek erakusten dute nola eraiki ingurune bidezkoagoak, inklusiboagoak eta ingurumenarekiko errespetuzkoagoak”.

Esku-hartze jasangarria eta efizientea

Ikaztegieta eta Legorreta artean argiztatutako tarteak 10 W-ko 54 LED eguzki-argi eta 1.750 lumen ditu, energia-eraginkortasuneko programazioarekin eta kolore beroko tenperaturarekin (3.000k). Horrek argi-kutsadura murrizten eta biodibertsitatea errespetatzen laguntzen du. Lanaren zuzendaritza Gu Light Ingeniaritzaren esku egon da, eta lanen enpresa esleipenduna Tecuni (Omexom) izan da.

Farolek modu autonomoan funtzionatzen dute, energia fotovoltaikoaren bidez, konexio elektrikoa eta zangak edo lurpeko eroanbideak egitea saihestuz, eta horrek obraren ingurumen-inpaktua murrizten du.

Proiektu estrategiko baten jarraipena

Esku-hartzeak jarraipena ematen dio Alegia – Ikaztegieta tartean aurretik egindako obrari, eta, horrela, bidegorri-sare gero eta seguruagoa eta irisgarriagoa osatzen da eskualdean.

Alba Garmendia Ikaztegietako alkateak adierazi duenez, “aspaldian herritarrek egindako eskaerei erantzuten die bidegorriaren argiztapenak, eta pozez hartu dugu proiektuaren gauzatzea. Herriko emakumeen korrika taldeak eta industrialdeetako langileek egin dizkiguten eskaerei erantzuten dio argiztapen honek, eta lanerako joan-etorrietarako eta aisialdirako bide seguruak izaten laguntzen du neurriak.”

Iñaki Agirre Legorretako alkatearen hitzetan, “lehenik eta behin eskerrak eman nahi dizkiogu Aldundiari lan hau aurrera eramateagatik eta eskaera bezala, segi dezala proiektu honekin Legorreta eta Itsasondo herriak lotzen dituen bidegorria argiztatuz. Legorretaren kasuan, Ola auzoan bizi diren edota bertako enpresetan lan egiten duten herritarrei modu seguruago batean ibiltzeko aukera eskainiko zaie. Herritarrez gain, kanpotik lanera garraio publikoan etortzen direnek ere, hobekuntza nabarmena izango dute. Horrelako hobekuntzak txertatzea beharrezkoa ikusten dugu mugikortasun jasangarria bultzatzeko garaian. Hauez gain, bidegorria aisialdirako erabiltzen dutenek ere, aurrerantzean aukera zabalagoa izango dute, iluntzen duenean ere, bidegorritik seguruago ibiltzeko aukera izango dute eta”.

Beste urrats bat Gipuzkoa deskarbonizatu baterantz

Proiektu hau Gipuzkoako Foru Aldundiko Jasangarritasun Departamentuak sustatutako deskarbonizaziorako eta klima-aldaketara egokitzeko estrategiaren barruan kokatzen da. Eguzki-argiztapena instalatzeak emisioak murriztea eta energia-eredu berriztagarri, garbi eta ingurunearekiko errespetutsuago baterantz aurrera egitea ahalbidetzen du.

Jarduera horrekin, Departamentuak indartu egiten du Gipuzkoan mugikortasuna eraldatzeko konpromisoa, azpiegitura publikoek pertsona guztien segurtasuna, berdintasuna eta ongizatea errazten dutela bermatuz.