Jasangarritasun Departamentuak eta Zumarragako Udalak Eitzagako berdegune birnaturalizatu berria inauguratu dute

Proiektuak 834.000 euroko inbertsioa izan du guztira, eta Aldundiko Jasangarritasun Departamentuak eta Zumarragako Udalak finantzatu dute.

José Ignacio Asensio: “Obra honi esker, abandonatutako espazio bat berreskuratu eta herritarrei itzuli ahal izan diegu, ingurune osasungarri, irisgarri eta pertsonentzat pentsatua izan dadin, eta naturak inoiz galdu behar izan ez zuen lekua berreskura dezan. Hiri-ekosistemak lehengoratzea funtsezkoa da muturreko klima-gertakarien aurreko erresilientzia indartzeko eta kudeaketa hidrauliko efizienteago baterantz aurrera egiteko”.

Jasangarritasuneko diputatu José Ignacio Asensiok eta Zumarragako alkate Mikel Serranok Eitzagako ibarraren leheneratze integrala inauguratu dute gaur. Proiektu horrek espazio degradatu bat birika berde berri bihurtzen du, Zumarragako herritarren bizi-kalitatea hobetzeko diseinatua. Gipuzkoako Foru Aldundiko Jasangarritasun Departamentuak 493.633,98 euroko inbertsioa egin du lehen fasean, eta bigarren fasean, berriz, 340.000 euroko ekarpena egin du Udalak. Obra osoa, bai lehen fasean bai bigarrenean, Lurkide Hondalanak enpresak gauzatu du.

Lehen faseak, Jasangarritasun Departamentuak sustatu eta finantzatutakoak, ibarbidea birnaturalizatzea ahalbidetu du, honako hauen bidez: erreka azaleratzea, lur-mugimenduak, zubiak eraikitzea, saneamendu-sarea berritzea, hasierako zoladura eta argiteria eta lorezaintza instalatzea. Lan horiekin, ibilguak bere funtzionaltasun ekologikoa berreskuratzen du, eta ingurunea drainatzeko gaitasuna indartzen da, klima-aldaketaren ondorioen aurrean ingurumen-oinarri sendo eta erresilientea sortuz.

Bigarren fasea Zumarragako Udalak hartu du bere gain, eta eremuaren urbanizazioa osatu du, haur-parke berria sortuz eta ibilbide ekologikoak eta pasealeku-eremuak gaituz. Gainera, udalak 20.000 euro bideratu ditu auzoaren memoria historikoari balioa ematera zumeari eta saskigintzari lotutako elementuak gehituz. Industria hori aktibo egon zen Eitzagan XIX. mendearen erdialdetik amaierara bitartean. Emaitza jolas naturala, hezkuntza-espazioak eta adin guztietarako pentsatutako egonlekuak uztartzen dituen parkea da.

Inaugurazioan, Jasangarritasuneko diputatu José Ignacio Asensiok azpimarratu du jarduera horrek "erakusten duela jasangarritasuna justizia sozialeko tresna bat dela. Espazio abandonatu bat berreskuratu dugu, eta herritarrei itzuli diegu leku osasungarri, irisgarri eta pertsonentzat pentsatua, non naturak berriz ere okupatu baitu inoiz galdu behar izan ez zuen espazioa”. Asensiok, gainera, hiri-ekosistemak lehengoratzearen garrantzia azpimarratu du, muturreko klima-gertakarien aurreko erresilientzia hobetzeko eta kudeaketa hidrauliko efizienteago baterantz aurrera egiteko.

Bestalde, Zumarragako alkate Mikel Serranok balioan jarri du obra horrek udalerriarentzat dakarren eraldaketa, eta adierazi duenez, “eskari historikoa da, azkenean argia ikusten duena, espazio degradatu bat berreskuratuz eta ingurunea duinduz. Gure sustraietan sakontzen duen eta gure latsarien eta zumearen lana balioesten duen topalekua: emakumeen eguneroko topaketa sozialaren sinbolo gisa, eta zumea, Zumarragako lehen industria izan zenaren garrantzia nabarmenduz”.

Bi faseak amaituta, Eitzagako ibarbide birnaturalizatua hirigintza jasangarriaren erreferente bihurtzen da, natura, memoria historikoa eta kalitatezko espazio publikoak integratuz. Proiektuak Jasangarritasun Departamentuak eta Zumarragako Udalak partekatzen duten konpromisoa sendotzen du, ongizatea bultzatzen duen, gizarte-kohesioa indartzen duen eta jasangarritasuna ekintza publikoaren erdigunean jartzen duen hiri-berroneratzeko eredu batekin.