Mugikortasuneko, Turismoko eta Lurralde Antolaketako Departamentuak genero-ikuspegia duten hirigintza-jarduketak finantzatuko ditu Abaltzisketan, Soraluzen, Pasaian, Larraulen, Iruran eta Arrasaten

Azahara Domínguez, Mugikortasuneko, Turismoko eta Lurralde Antolaketako diputatua: “Kaleak, plazak, parkeak edo ekipamenduak diseinatzeko moduak berdintasunean nola mugitzen garen, nola bizi garen elkarrekin eta nola gozatzen dugun espazio publikoaz baldintzatzen du. Horregatik, ezinbestekoa da herritarren esperientzia eta premien aniztasuna kontuan hartuko duen ikuspegia txertatzea. Horregatik, anbizio handiz jokatu nahi izan dugu, genero-ikuspegidun hirigintza udal-plangintzako dokumentuetan soilik gera ez dadin, baizik eta herritar guztien egunerokoa hobetzeko gai diren proiektuetan isla izan dezan. Espazio inklusiboagoak eta pertsona guztiak aintzat hartuta diseinatutako guneak sustatzen dituen esku-hartze bakoitza urrats bat gehiago da Gipuzkoa bidezkoago eta berdinzaleago baten alde”.

Mugikortasuneko, Turismoko eta Lurralde Antolaketako Departamentuak genero-ikuspegidun hirigintza-jarduketak finantzatuko ditu Abaltzisketan, Soraluzen, Pasaian, Larraulen, Iruran eta Arrasaten. Hala jakinarazi du alorreko diputatu Azahara Domínguezek. Gogorarazi duenez, udal gehiago ekimen honetan inplikatzeko helburuarekin, departamentuak aurten berritu egin ditu genero-ikuspegia hirigintzan txertatzera bideratutako laguntzak, udalek genero-desberdintasunak murrizten lagunduko duten jarduketa zehatzak gauzatu ahal izan ditzaten.

Foru arduradunak azaldu duenez, laguntza horiei esker hainbat jarduketa egingo dira. Besteak beste, Abaltzisketako zenbait gunetan argiteria hobetuko da, emakumeen segurtasuna bereziki indartzeko; Soraluzeko egungo komun publikoak irisgarriagoak eta seguruagoak izango diren berriekin ordezkatuko dira; Pasaian puntu moreen mapa egingo da, iluntasun-guneak identifikatu eta genero-ikuspegidun hiri-diagnostikoa egiteko; Larraul eta Asteasu arteko oinezkoen bidean argiteria instalatuko da, emakumeentzat bereziki ibilbide segurua bermatzeko; Irurako San Migel plaza oinezkoentzat egokitu eta genero-ikuspegitik eraldatuko da, irisgarritasuna, segurtasuna eta espazio publikoaren erabilera hobetzeko; eta Arrasaten genero-ikuspegidun hiri-diagnostikoa egingo da, udalerriaren hirigintza-plangintza berriaren oinarri izan dadin. Azken udalerri horri dagokionez, aipatzekoa da 2025eko deialdian laguntza jaso bazuen ere, azkenean uko egin ziola, dagokion epean aurreikusitako lanak gauzatu ez zituelako.

Guztira, 115.000 euro baino gehiago bideratuko dira udal horietara, eta zenbateko horren %84 obrak gauzatzera bideratuko da.

Azahara Domínguez diputatuak oso positibotzat jo du Gipuzkoako udalek laguntza-deialdian egindako aldaketen aurrean emandako erantzuna. Izan ere, iaz bi udalek baino ez zuten eskaera aurkeztu; aurten, aldiz, sei udal izan dira deialdira aurkeztu direnak. Ildo horretan, nabarmendu duenez, “Gipuzkoa berdinzaleago bat eraikitzea partekatutako erronka da, eta erakunde guztien konpromisoa eta lankidetza eskatzen ditu”. “Elkarrekin egin behar dugu aurrera, emakumeek eta gizonek aukera-berdintasunean bizi ahal izango duten udalerriak eraikitzeko; izan ere, elkarlanaren eta lankidetzaren bidez bakarrik izango gara herritarren benetako beharrei erantzuteko gai”, gaineratu du.

Ildo beretik, Azahara Domínguezek balioa eman dio egindako entzute aktiboko ariketari; izan ere, hari esker, laguntza-lerro hau toki-administrazioek gaur egun dituzten erronkei hobeto egokitu ahal izan zaie. “Gure helburua da udalei tresnak ematea, pertsona guztientzat bizigarriagoak, irisgarriagoak, seguruagoak eta inklusiboagoak izango diren herri eta hiriak eraikitzen aurrera egin dezaten”.

“Kaleak, plazak, parkeak edo ekipamenduak diseinatzeko moduak berdintasunean nola mugitzen garen, nola bizi garen elkarrekin eta nola gozatzen dugun espazio publikoaz baldintzatzen du. Horregatik, ezinbestekoa da herritarren esperientzia eta premien aniztasuna kontuan hartuko duen ikuspegia txertatzea. Horregatik, anbizio handiz jokatu nahi izan dugu, genero-ikuspegidun hirigintza udal-plangintzako dokumentuetan soilik gera ez dadin, baizik eta herritar guztien egunerokoa hobetzeko gai diren proiektuetan isla izan dezan. Espazio inklusiboagoak eta pertsona guztiak aintzat hartuta diseinatutako guneak sustatzen dituen esku-hartze bakoitza urrats bat gehiago da Gipuzkoa bidezkoago eta berdinzaleago baten alde”, adierazi du.