Nekazaritza ustiategietarako eta gazteak lehen sektorean sartzen laguntzeko dirulaguntzen deialdiak argitaratu ditu Gipuzkoak

Gipuzkoako Foru Aldundiak nekazaritzako ustiategietan inbertsioak egiteko laguntzen eta nekazari gazteei sektorean sartzen laguntzeko laguntzen deialdiak argitaratu ditu gaur bere aldizkari ofizialean.

Nekazaritza ustiategietan inbertsioak egiteko laguntzen deialdiaren kasuan, Aldundiak 3,6 milioi euro bideratzea aurreikusten du. Zenbateko hori zuzenean Aldundiaren funts propioekin finantzatuko da, Lurralde Oreka Berdeko Departamentuaren bidez. Deialdia Nekazaritza Politika Bateratuaren eta landa garapeneko politiken logikan sartzen da, eta nekazaritza ustiategien bideragarritasuna hobetzea du helburu, eraginkorragoak eta errentagarriagoak izan daitezen eta bertan bizi eta jarduten dutenen bizi-baldintzak hobetu daitezen. Laguntza horien lehentasunen artean daude teknologia berriak sartzea, ekoizpenen osasuna eta kalitatea hobetzea eta belaunaldi-erreleboa bultzatzea. 2025ean, Gipuzkoan 180 ustiategik jaso dituzte laguntza hauek, eta honako hauetara bideratu dira: makinak erostea (% 46), nekazaritza-eraikingintza (% 42), ustiategietako hobekuntzak –adibidez, itxiturak– (% 5), baratzezaintza (% 3), fruta-hazkuntza (% 3) eta beste hobekuntza batzuk, adibidez, ustiategien energia efizientziarekin lotutakoak (% 1).

Gaztenek programaren bidez nekazari gazteei lurraldeko nekazaritza ustiategietan sartzen laguntzeko laguntzei dagokienez, 2026ko deialdiak 1,1 milioi euroko aurrekontua izango du. Laguntza lerro honen helburua da lurraldeko nekazaritza sarea indartzea, belaunaldi erreleboa sustatzea eta landa eremuen jasangarritasun ekonomiko eta sozialean laguntzea. Laguntza programa nekazaritza jasangarriago, berritzaileago eta emaitzetara bideratuago baten aldeko apustuan kokatzen da, belaunaldi-erreleboa eta sektorearen modernizazioa sustatzen ditu, eta NPBren Plan Estrategikoaren parte da eta Landa Garapenerako Europako Nekazaritza Funtsak (LGENF) eta Aldundiak berak finantzatzen dute. 2025ean, lurraldeko hainbat lekutatik (Aizarnazabal, Antzuola, Azpeitia, Beasain, Getaria, Hernani, Hondarribia, Ikaztegieta, Itsasondo, Zaldibia, Zestoa eta Zumaia) datozen 21 eta 38 urte arteko 19 gaztek baliatu zuten programa hau. 2005ean programa abian jarri zenetik, 362 gipuzkoar baino gehiago trebatu dira ekimen honetan, familiako ustiategiaren kudeaketa bere gain hartzeko edo nekazaritzako eta abeltzaintzako bere proiektua abian jartzeko.

Bi programen oinarri arautzaileak gaur sartuko dira indarrean, Gipuzkoako Aldizkari Ofizialean argitaratu ondoren, interesa duen pertsona orok izapidea egiteko aukera izan dezan. Bi deialdiei buruzko informazio gehiago nahi izanez gero, esteka hau kontsulta daiteke: Gipuzkoako Aldizkari Ofiziala Zenbakia 244 Data 2025-12-22