Abadia Saria jaso du Gure Zirkuak, komunitate oso bati “elkarrekin euskaraz bizi eta sentitzeko plaza berritzailea” eskaintzeagatik

Gure Zirkuak aurtengo Abadia Saria jaso du gaur arratsaldean, Arrateko gainean (Eibar) egindako ekitaldian, komunitate oso bati “elkarrekin euskaraz bizi eta sentitzeko plaza berritzailea” eskaintzeagatik. Hala adierazi du Eider Mendoza Larrañagak, Gipuzkoako diputatu nagusiak, zeinak nabarmendu dituen aitortza jaso duten artisten “ausardia, balioak, mugak gainditzeko eta berritzeko gogoa”, euskararen biziberritzean eman beharreko jauzian “erreferentzia” direnak.

“Jauzi horretan kultur sorkuntzari eta aisialdiari arreta berezia eskaini behar diogu. Euskaratik elikatzen asmatu behar dugu belaunaldi berrien sormena eta jakinmina, dela aisialdian, edukietan, pantailetan eta kaleko bizitzan. Komunitate gisa, hizkuntzaren txinparta eta magia bizirik mantendu nahi dugulako. Euskaldunok hizkuntzaren bueltan batzen eta komunitate gisa sendotzen jarraitu behar dugulako”, gogoeta egin du diputatu nagusiak, Abadia Saria 25. aldiz banatu den honetan.

Mendozak zoriondu ditu Gure Zirkuaren familia osatzen duten kide guztiak, egindako lan guztiagatik eta, aurrera begira ere, “emozioak pizten” jarraitzea opa die, euskararen herriak segi dezan “irri eta amets egiten, eta euskaraz egin dezan”. “Gauzak bihotzetik egiten direnean, pertsona guztiei merezi duten aukera eskaini eta aniztasunari bidea ematen zaionean, artista guztien gaitasunak agerian gelditzen dira, guztiak txundituta uzteraino. Eta horrekin, komunitate oso baten balioak indartu eta aberastu egiten dira”, azaldu du. Aurrera begira, hain zuzen ere, “talde lana, berritzeko ausardia eta bizi-poza” jorratzen jarraitzera dei egin du, “euskararen etorkizuna bermatzeko eta euskararen komunitatea gero eta sendoagoa eta anitzagoa” bilakatu dadin.

‘Zazpi petaloak’

Diputatu nagusiaren eskutik jaso dute Abadia Sariaren oroigarria –Iñigo Aristegui Telloren Zazpi Petaloak eskultura– Gure Zirkuko kideek. Ekitaldian Gozategi anaien musikaz eta Juantxo Zeberioren pianoaz gozatzeko aukera izan dute eta, amaieran, Elene Arandiaren ahotsari jarraituz, guztiek batera Beti zure ondoan kantatzen amaitu dute ekitaldia, zirkuko emanaldietan egin ohi duten moduan.

Iker Galartzak sariagatik eskerrak eman eta astero-astero Gure Zirkuko karpa betetzen duten ikusleak izan ditu gogoan, baita etengabe laguntza ematen dieten kolaboratzaileak ere. Adierazi duenez, beren funtzioetara etortzen den publikoak, “kalitatezko emanaldiekin” gozatzeaz gain, “sentitzen dute hemen badela komunitate bat, herri bat” eta aldarrikatu du, Etxepare gogoan, euskaraz “eskriba daitekeela, hitz egin daitekeela, zirkua egin daitekeela”. “Gure umeen erreferentziak ez dira kanpoko izarrak bakarrik izango. Talde honetako artista guztiak erreferenteak zarete. Haur eta gazteak, zuek ikusten zaituztenean, jabetzen dira gauza ederrak egin ditzakegula eta zuen pausoak jarraitu ditzaketela”, aipatu du.

Iker Galartzaren beraren ekimenez, 2017an sortu zuten Gure Zirkua, Euskal Herrian sorturiko zirku ibiltaria, bertako langile eta artistek egiten dutena eta euskalduna. Geroztik, pixkanaka pixkanaka eta herriz herri, ibilbide esanguratsua ari dira pilatzen euskararen herri osoan zehar, zirkuan parte hartzen duten artisten sormen lan ederrari esker. Egunotan Eibarren dago, Arrateko gainean, datozen egunetan bertan eskainiko baitituzte beren emanaldiak.

Gure Zirkuari Abadia Saria emateko garaian, Foru Aldundiak kontuan izan du “modu eredugarrian elkartasuna, sormena eta inklusioa” landu izana. Euskarazko zirku bakarra izanik, haurren garapena, komunitatearen kohesioa eta euskal kulturaren aniztasuna bultzatu ohi ditu. Gainera, sentipen, umore eta emozioz betetako ikuskizunen bitartez, herritarrak elkartu eta ondo pasatzeko plaza berria eskaini dio euskarari eta euskaldunon komunitateari.

Aurtengo edizioarekin 25.a izan du Gipuzkoako Foru Aldundiak bultzatutako Abadia Sariak, zeinak 1996an martxan jarri zenetik aitortu duen euskararen normalkuntzaren aldeko lanetan nabarmendutako pertsona edo elkarteen jarduna. Mugarri horrekin bat, foru erakundeak errekonozimendu horren garrantzia instituzionala areagotzeko erabakia hartu du, saria bera eguneratzeko oinarriak jarriz eta aitortzari oihartzun handiagoa eskainiz. 25. edizioa ospatzeko, gainera, programazio eta ekintza bereziak antolatu ditu aurten Aldundiak, euskaltzale eta, oro har, herritar guztiok euskararen inguruan topo egin eta euskararen aldeko elkarlanean aurrera egin asmoz.

Anton Abadia Urrustoik euskararen sustatzaile gisa egindako ekarpen nabarmena kontuan hartuta, haren izena aukeratu zuen 1996an Gipuzkoako Foru Aldundiak, euskararen normalizazioaren aldeko lanetan nabarmendutako pertsona edo elkarteen jarduna aitortzeko saria ezartzeko garaian. Halaxe sortu zen Abadia saria, harrezkero bi urtean behin edo urtero eman izan dena eta Hizkuntza Berdintasuneko foru zuzendaritzak antolatzen duena. Arrasate Euskaldun Dezagun, Dionisio Amundarain, Karmele Esnal, Juan Zelaia, Juanba Berasategi, Imanol Urbieta, Joxerra Gartzia, Ixa Taldea, Kike Amonarriz, Ibon Sarasola, Arantxa Urretabizkaia dira saria merezimendu osoz jaso duten izen ezagunetako batzuk. Azken hiru edizioetan, berriz, Fagor Taldeak, Garabide elkarteak eta Ruper Ordorikak euskararen alde egindako lana izan dira aitortuak. Gainera, Abadia saria emateko ekitaldia euskararen alorreko elkarte eta eragileren topalekua ere izan da, urte hauetan guztietan.