Ogi-apurra

Eduki publikatzailea

Arreta bulegoa ikusmen-urritasuna duten pertsonentzat irisgarriago egin dute Aldundiak eta ONCEk

Arreta bulegoa ikusmen-urritasuna duten pertsonentzat irisgarriago egin dute Aldundiak eta ONCEk

QR kodeak, braille hizkuntzan markak, biniloak eta norabide marrak jarri ditu foru erakundeak, ONCEk aurretiaz eginiko analisiaren ondotik.

2020/10/02
Foto Arreta bulegoa...

Gipuzkoako Foru Aldundiak hobekuntzak egin ditu Foru Jauregiko sarretan eta eraikinaren beheko solairuan duen herritarren arretarako bulegoan, ikusmen-urritasuna duten pertsonentzako irisgarritasuna hobetzeko. Neurriak hartzerako orduan, ONCEk instalazioen irisgarritasunari buruz egindako gomendioak hartu dira kontuan. Eider Mendoza Gobernantzako foru diputatuak eta Roberto Doval ONCEren Donostiako zuzendariak tokian bertan ezagutu dituzte aplikatutako hobekuntzak: ikusmen-mugak dituzten pertsonentzako QR kodeak instalatzea, braille, binilo eta norabide-zerrendetako markak instalatzea, esaterako.

Foru Aldundiak bere zerbitzu guztien irisgarritasunean hobekuntzak egiten jarraitzeko borondate irmoa duela azpimarratu du foru arduradunak. "Izan ere, bidezkoa da gipuzkoar guztiek zerbitzu horiek baldintza berdinetan eskuratu ahal izatea", azaldu du. Hori dela eta, Aldundiak ONCE erakundearekin duen lankidetza balioan jarri du, "egiten dizkiguten ekarpenekin, arlo honetan aurrera egiten laguntzen baitigute". Foru bozeramaileak azpimarratu duenez, Aldundia gobernantza eredu ireki eta elkarlanaren aldeko apustua egiten ari da azken urteotan, "irtenbide partekatuak bilatzen ari baikara lurralde gisa ditugun erronkei modu eraginkorragoan erantzuteko".

Zehazki, honako hobekuntza hauek egin dira: kontraste handiagoko biniloak instalatu dira sarrerako ate lerragarrietan; norabide marra ilunak instalatu dira lurrean, arreta-bulegora eta lan-eskaintza publikoei buruzko informazio-mahaietara joateko; braillezko marka bat jarri da, ilara kudeatzailearen botoia non dagoen adierazteko; arretarako mahaien adierazleen tamaina handitu da; eta itsuentzako edo ikusmen urriko pertsonentzako QR kodeak instalatu dira, herritarrei arreta emateko bulegoak dituen atalen berri ematen dutenak.

Bere aldetik, Roberto Doval Donostiako ONCEren Laguntza Zuzendaritzako zuzendariak azpimarratu duenez, "ONCEk, hasieratik, argi izan zuen, inklusio eraginkor eta egiazkora iristeko, beharrezkoa dela eguneroko bizitzako esparru desberdinek desgaitasuna duten pertsona guztiei sarbidea ematea". Horretarako, "profesional eta teknikari espezializatuen talde zabala dago errehabilitazioan edo tifloteknologian, besteak beste. Itsuei edo ikusmen-urritasun larriak dituzten pertsonei estaldura hori ematen diete, eta beste erakunde batzuei aholkularitza ere bai, desgaitasuna duten pertsonak gure artean erabat sar daitezen lortzeko”.

  

547