Gipuzkoak 300 profesional inguru formatu ditu mendekotasuna duten adinekoak beren etxeetan zaintzeko

Gipuzkoako Foru Aldundiak eta ADINBERRI Fundazioak abian jarri dute adinekoen zaintzaren inguruko profesionalak formatzeko ikastaroaren hirugarren edizoa. Helburua da, aurrez aurre dugun errealitateari erantzuna ematea: geroz eta adineko gehiago dituen lurraldean, mendekotasun egoerak ere gora egin du. Eta hortaz, etxean, mendekotasun egoeran zaintza behar duten adinekoak ere geroz eta gehiago dira.

Kalkulatzen da 2030ean 36.000 pertsona inguru egongo direla mendekotasun-egoeran lurraldean — gaur egun 31.024 pertsona dira —, eta gehienek zainketak beharko dituzte beren etxeetan. Erronka honi erantzun ahal izateko, Gipuzkoak 9.000 pertsona inguru beharko ditu arlo honetan. Era berean, sektoreko lanak ere gora egingo du etengabe; izan ere, kalkuluen arabera, Euskadin 25.000 enplegu inguru izango dira zuzeneko zaintza-lanetan.

"Kasu gehienetan, familietako zaintza-lan horiek emakume migratzaileek egiten dituzte, familiek zuzenean kontratatuta. Ibilbide malguen gabeziak zaildu egiten du emakume horiek prestakuntza profesional bat izateko aukera, eta horrek egiturazko desberdintasuna betikotzen du", azaldu du Maite Peña Zainketa eta Gizarte Politiketako diputatuak prentsaurrekoan. Berarekin izan dira agerraldian, Rakel San Sebastian ADINBERRIko zuzendaria eta Ana Monge Inmakulada Lanbide Ikastolako zuzendaria; era berean, bertaratu dira Oihana Hernández Nazareteko zuzendaria eta Maialen López CIFP Plaiaundiko zuzendari exekutiboa.

Doako ikastaro hau ADINPREST programaren baitan kokatzen da, eta helburua da etxeko arreta soziosanitarioko profesionaltasun-ziurtagiria lortzeko aukera erraztea, bide ez-formalaren bidez, Laguntza Pertsonalerako Prestazio Ekonomikoaren baitan. Zaintzaile profesional bat kontratatuta duten mendeko pertsonei ematen die Foru Aldundiak prestazio hori. Hirugarren edizio honetan, helburua da 80 pertsona formatzea; aurreko bi edizioetan prestakuntza 200 lagun inguruk jaso dute.

Premiazko prestakuntza-behar bati erantzuteaz gain, ikastaroa jasotzen duten pertsonei egokitzen dira, "zaintzaile horien enplegagarritasuna eta aintzatespena hobetzera" bideratuta baitago proiektu hau, ADINBERRI Gipuzkoako Foru Aldundiko Zahartzearen Berrikuntzarako Fundazioaren zuzendariak adierazi duenez. Ad hoc prestakuntza horren bidez, langile horiek ikastaroak egiteko dituzten oztopo nagusiak eraisten dira, hala nola kontziliazioa, eten digitala edo hizkuntza-segurtasunik eza.

San Sebastianek gogorarazi du ADINBERRIk Prestakuntza Integraleko Plana (ADINPREST) duela, adinekoen zaintzaren sektorea profesionalizatzeko eta duintzeko estrategia, lanerako prestakuntza jarraitua eta arautua sustatuz sei jarduera-ildotan, eta zerbitzuen zaintza eta kudeaketa-praktiken berrikuntza bultzatzen duela.

Hiru zentro Gipuzkoako lurraldeen arteko oreka bermatzeko

Oraingo honetan, Nazaret (Donostialdea), Inmakulada Lanbide Ikastola (Tolosaldea) eta Plaiaundi (Bidasoa) prestakuntza-zentroek eskainiko dute ikastaroa, %100eko dirulaguntza jaso duen prestakuntza. Prestakuntza urriaren 3an hasiko da eta oraindik ere irekita dago izen-ematea. Ikastaroa 480 prestakuntza-ordukoa da, zehazki zuzentzen zaion kolektiboaren beharretara eta prestasunera egokitzen da, eta pertsonarengan oinarritutako Gipuzkoako zainketa-ereduarekin lerrokatzen da.

Prestakuntza mistoa izango da. Alde batetik, autoprestakuntza-modalitatea bultzatuko da, parte-hartzaileen beharren arabera, eta, bestetik, prestakuntza-zentroetako instalazioetan aurrez aurreko, taldeko eta/edo banakako modalitatea sustatuko da. Ildo horretan, material espezifiko bat prestatuko da, pertsonek aurrez aurreko saioak egin ditzaten, zalantzak argitzeko.

Doako prestakuntzan izena eman nahi dutenek telefono hauetan egin dezakete: 747 458 620 (Nazaret); 688 860 444 (Plaiaundi); eta 943 673 629 (Inmakulada Lanbi-de Ikastola).

6.962 pertsonek jasotzen dute Gipuzkoan LPPE

Gipuzkoan dagoeneko 6.962 pertsonak jasotzen dute Laguntza Pertsonalerako Prestazio Ekonomikoa (LPPE). Laguntza horri esker, mendekotasuna duten pertsonek zaintzailea kontratatu ahal izango dute eguneroko bizitzako oinarrizko jardueretan laguntzeko eta beren etxeetan ahalik eta autonomia handienarekin bizitzen jarraitu ahal izateko.

Zainketa eta Gizarte Politiketako diputatuak azpimarratu du, LPPEari esker, familiek etxean kalitatezko zaintza bermatzeko beharrezko babesa dutela: "Aldundiaren helburua argia da: zaintzaileak profesionalizatzea eta gaitasun teknikoak ematea, mendekotasuna duten pertsonek beren ingurunean jasotzen duten arreta hobetzeko".

Horrela, mendekotasun-egoeran dagoen edonork eska dezake prestazio hori bere udalerriko gizarte-zerbitzuen bidez. Eskaeraren ondoren, Aldundiko profesionalek balorazioa egiten dute etxean, mendekotasun-gradua eta laguntza-beharrak amaitzeko.

Peñak gogorarazi du, LPPEa eskuratu ahal izateko, zenbait baldintza bete behar direla, besteak beste: "Gipuzkoan erroldatuta egotea, zerbitzua emateko lan-kontratu bat dagoela egiaztatzea, kontratatutako pertsona adinez nagusia izatea eta arreta soziosanitarioko lanbide-kualifikazioa edo aparteko gaikuntza izatea".

Zenbatekoei dagokienez, prestazioa aldatu egiten da bizikidetza-unitatearen mendekotasun-mailaren eta baliabide ekonomikoen arabera, eta gehieneko zenbatekoaren % 30erainoko dedukzioa aplika daiteke.

Era berean, diputatuak azpimarratu du laguntza horrek hazkunde iraunkorra izan duela azken bost urteetan, 2021ean 5.974 onuradun izatetik gaur egun 6.962 izatera igaro baita. Peñak adierazi duenez, "eboluzio horrek agerian uzten du gero eta familia gehiagok aukeratzen dutela baliabide hori etxean beharrezko laguntzekin bizitzen jarraitu ahal izateko", eta Aldundiak eredu hori indartzen jarraitzeko duen konpromisoa berretsi du, "uste baitugu etxean ere ondo zaindu behar dela, profesional kualifikatuekin eta eskubideak bermatuz".