Gipuzkoako Foru Aldundiak desgaitasunaren arloan dauden erronkak aztertu ditu San Telmon

Gipuzkoako Foru Aldundiak, Giza Eskubideen eta Kultura Demokratikoaren Zuzendaritzaren bitartez eta UPV/EHUko Giza Eskubideen eta Botere Publikoen Katedrarekin lankidetzan, ‘Gainditu gabeko erronkak desgaitasunean’ jardunaldia antolatu du gaur San Telmo Museoan. Topaketan erakundeetako eta hirugarren sektoreko ordezkariak elkartu dira, desgaitasuna duten pertsonen gizarteratzearen eta eskubideen arloan egun dauden erronkei buruz hausnartzeko.

Hitzordua bi testuingurutan kokatzen da: batetik, Aniztasunaren Europako Hilabetea, maiatzero Europar Batasun osoan ospatzen dena berdintasuna eta pertsona guztien inklusioa sustatzeko helburuarekin; eta, bestetik, Desgaitasuna duten Pertsonen Eskubideei buruzko Konbentzioaren 20. urteurrena, NBEk 2006an onartua eta Espainiak 2007an berretsia. Nazioarteko itun horrek aldaketa paradigmatikoa ekarri zuen desgaitasuna ulertzeko moduan, eta erdigunean jarri zituen desgaitasuna duten pertsonen duintasuna, giza eskubideak eta gizartean erabateko partaidetza izateko aukera.

Gaiari buruzko bi adituren hitzaldiekin hasi da jardunaldia. Ana Peláez doktoreak, unibertsitateko irakasle eta desgaitasunen bat duten pertsonen eskubideen defendatzaile sutsuak, NBEren Konbentzioa onartu zenetik egindako aurrerapenei eta erronkei buruzko azterketa sakona eskaini du, eta bereziki azpimarratu du desgaitasuna duten emakumeen eta neskatoen egoera. Jarraian, Patricia Navas doktoreak adimen eta garapen urritasunak dituzten pertsonen bizi-kalitatea izan du mintzagai, lortutako lorpenak eta oraindik gainditu gabe dauden erronkak jorratuz.

Programaren bigarren zatian, Gipuzkoako desgaitasunaren esparruan erreferentzia diren hiru erakundek hartu dute hitza: Elkartu, Atzegi eta Agifes. Ikuspegi pertsonaletik, arduradunek — Mikel Malkorra, Mietxel Lakunza eta Ruth Encias, hurrenez hurren — beren erakundeen esperientziak, lurraldeko lanaren bilakaera eta desgaitasuna duten pertsonek oraindik dituzten erronkak partekatu dituzte.

Jardunaldiaren bi aldeek eztabaidarako eta hausnarketarako guneak izan dituzte, eta eragile parte-hartzaileen artean ideiak eta jardunbide egokiak trukatzea bultzatu dute. Topaketa honekin, Gipuzkoako Foru Aldundiak berretsi egiten du giza eskubideen defentsarekin eta gizarte inklusibo, ekitatibo eta anitza eraikitzearekin duen konpromisoa.