Gipuzkoako Foru Aldundiak eta Azkoitiko Udalak Garbiñe Otegi Eguneko Zentroa inauguratu dute, zaintza eredu berriaren eta komunitatearekiko loturaren erakusle

Gipuzkoako Foru Aldundiak eta Azkoitiko Udalak Garbiñe Otegi eguneko zentro berria inauguratu dute gaur, Burdinoleta kalean. Zentro honek aurrekoa ordezkatzen du, San Jose egoitzan dagoena, eta aurrerapauso nabarmena da herrian adinekoei ematen zaien arretan. Kokapen berriak, askoz zentrikoagoa eta irisgarriagoa denak, hiri-ingurunearekin eta komunitate-bizitzarekin lotura izatea errazten du, erabiltzaileen autonomia eta gizartearen parte izatea bultzatuz. Proiektuak 680.478,74 euroko aurrekontua izan du.

Zentroaren izena Garbiñe Otegi da, azkoitiar arkitekto teknikoa, Foru Aldunditik proiektu honen diseinuan eta sustapenean funtsezko papera bete zuena. Otegi iaz hil zen istripu batean, eta omenaldi honek Gipuzkoako gizarte zerbitzuak hobetzeko izan zuen konpromisoa aitortzen du.

Inaugurazio ekitaldian izan dira Eider Mendoza diputatu nagusia, Maite Peña Zainketa eta Gizarte Politiketako diputatua eta Ana Azkoitia Azkoitiko alkatea. Bertan izan dira, halaber, egungo zentroko erabiltzaileak eta haien familiak, bai eta zentroari izena ematen dion Garbiñe Otagiren senideak ere.

"Udalerriz udalerri, zerbitzuan, zaintza-eredu berria zabaltzen ari gara Gipuzkoako lurralde osoan, pertsonalizatuagoa, berritzaileagoa eta komunitatearekin lotuagoa. Azkoitiko eguneko zentro berri honen irekierarekin, beste urrats bat eman dugu norabide horretan", gogorarazi du Eider Mendoza ahaldun nagusiak, adinekoen eta haien senideen “ongizatearen mesedetan egindako" ahalegin kolektiboa. Garbiñe Otegiri buruz ere hitz egin du Mendozak. "Askotan ahaztu egiten zaigu funtzio publikoan aritzen direnen lanaren balioa eta lan horrek gizartean duen eragin zuzena. Garbiñek ezagutza, jakintza eta ilusioa eskaini zizkion espazio hau sortzeari, leku atsegina izan zedin, pertsonen zerbitzura egon zedin. Keinu horrekin, betiko geratuko da gogoan", adierazi du.

Ana Azkoitia alkateak azaldu du “Gizartea gero eta zaharragoa da, eta horren aurrean, erne gaude, zaintzaren ekosistema sendo bat eraikitzen jarraitu behar dugulako. Gure zerbitzuak, baliabideak eta espazioak berritu, aldatu edo egokitu beharko ditugu. Erabiltzaileen eta familien bidelagun proaktiboak izan behar dugu. Horretarako, giltzarri da erakundeon arteko lankidetza. Udalak eta Aldundiak 2022an hitzartutako akordioa da horren adibide. Akordioari esker, San Jose egoitzan unitate psikogeriatrikoa guztiz berritzea eta Eguneko Zentroa herrigunera ekartzea ahalbidetu dugu. Osasuntsu zahartzea ez da beti posible. Duintasunez, zentzuz, konpainian eta beharrak aseta zahartzea, posible da. Hori da gure ardura eta horretan ari gara lanean”.

Eguneko zentro berriak 356 m²-ko azalera du eta 30 plaza eskaintzen ditu, aurrekoan baino hamar gehiago. Instalazio hauek ditu: atsedenlekuak, jangela, bi komun estandar eta bi geriatriko, bulegoa, aldagelak, biltegia eta instalazio-gela. Gainera, alboko plazan 65 m²-ko kanpo-espazio bat jartzea aurreikusten da, oraindik izapidetzeke dagoena, zentroaren luzapen natural gisa pentsatua. Aire zabaleko espazio hori funtsezkoa izango da erabiltzaileen ongizate fisikoa eta emozionala sustatzeko, eta ingurune seguru, irisgarri eta abegikorra eskainiko die, kanpoarekiko harremanaz, argi naturalaz eta komunitate-bizitzaz gozatzeko.

Inaugurazio hau Gipuzkoako Foru Aldundiak bultzatzen duen zainketa-ereduaren eraldaketaren barruan kokatzen da, arkitekturatik askoz haratago doan eraldaketa. Pertsona erdigunean jartzea da helburua, pertsonalizazioan, hurbiltasunean eta erritmo eta lehentasun indibidualekiko errespetuan oinarritutako ikuspegiarekin. Helburua da ingurune funtzionalak eta eskuragarriak ez ezik, goxoak, abegikorrak eta eguneroko bizitzarekin konektatuak ere sortzea. Autonomia eta ongizatea sustatzen duten espazioak, zaintza esku hartzekoa baino gehiago dela erakusten dute. Begirada berri honek ingurune sozial eta komunitarioarekiko loturak ere indartzen ditu, zaintza ezin baita zentroen barrura bakarrik mugatu, pertsona bakoitzarekin, komunitatearekin eta bizi-ingurunearekin konektatuta ere egon behar du.

Ate irekiak

Gipuzkoako Foru Aldundiak eta Azkoitiko Udalak ate irekien jardunaldia antolatuko dute ekainaren 11n, 18:30ean, azkoitiarrei Garbiñe Otegi Eguneko Zentro berria ezagutarazteko. Aukera bat izango da herritarrak, interesdunak, ingurukoak eta zainketen arloko eragileak hurbiltzeko, zentroa bertatik bertara ezagutzeko eta Gipuzkoako zainketa-eredu berrian sakontzeko.

San Jose egoitza

Aldi berean, obrak egiten ari dira Azkoitiko San Jose egoitzan, zaintza-eredu berrira egokitzeko. Jarduera horien artean daude Psikogeriatriako Unitatea (UPSI) osorik eraberritzea, komun propioa duten banakako 15 logela sortzeko. Obra horiek datozen hilabeteetan amaitzea aurreikusten da.