Gobernu Kontseiluak Foru Arau Proiektua onartu du, tamaina handiko talde multinazionalen eta nazionalen gutxieneko zerga-ordainketa bermatzeko

Gipuzkoako Foru Aldundiko Gobernu Kontseiluak Gipuzkoako Lurralde Historikoko Zerga Osagarriaren foru araua onartu du. Araudi autonomoko zerga itundua da, eta talde multinazionalen eta talde nazional handien mozkinen gaineko % 15eko gutxieneko tributazio globala ezartzen du.

Zerga hori talde nazional edo multinazional handiak osatzen dituzten erakundeei aplikatuko zaie, baldin eta azken lau ekitaldietako bitan, gutxienez, 750 milioi euroko edo gehiagoko negozio-zifra kontsolidatua badute. Zerga honen aplikazioa 2022ko abenduaren 15eko Europako Kontseiluaren 2022/2523 Zuzentarauan ezarritakoaren arabera aplikatzen da. Espero da foru arau hori urtea amaitu baino lehen onartzea Gipuzkoako Batzar Nagusietan.

Aldez aurretik eta EBren zuzentarauan ezarritakoa betetze aldera, Gipuzkoako Foru Aldundiak premiazko foru dekretu araua onartu zuen, Gipuzkoako Batzar Nagusiek 2025eko otsailean baliozkotua, zergadunei beharrezko segurtasun juridikoa bermatzeko, zerga osagarriak ondorioak baititu 2023ko abenduaren 31tik aurrera hasten diren zergaldietan.